Puku ya Bobedi ya Dikgoši 11:1-21
11 Ge Athalia mmago Ahasia a bona gore morwa wa gagwe o hlokofetše, o ile a fediša ba leloko la bogoši ka moka.
2 Eupša Jehosheba morwedi wa Kgoši Jehorama kgaetšedi ya Ahasia, o ile a utswa Jehoashe morwa wa Ahasia gare ga barwa ba kgoši bao ba bego ba swanetše go bolawa. A tšea yena le moledi wa gagwe gomme a ba khutiša ka kamoreng ya ka garegare. Ba ile ba mo khutiša gore Athalia a se ke a mmolaya.
3 Jehoashe o ile a dula a khutile ka ntlong ya Jehofa ka mengwaga e tshela ya ge Athalia a be a buša nageng.
4 Ka ngwaga wa bošupa Jehoyada o ile a romela molaetša gore go bitšwe baetapele ba bahlapetši ba Karia ba 100 le bahlokomedi ba mošate ba 100 gore ba tle go yena ka ntlong ya Jehofa. A ba kgopela gore ba ene ba le ka ntlong ya Jehofa gore ba tla dula ba botegela tumelelano yeo ba e dirilego, ke moka a ba bontšha morwa wa kgoši.
5 A ba laela a re: “Dirang se: Ikaroleng ka dihlopha tše tharo e le gore sehlopha se sengwe se dule se beile ntlo ya kgoši leihlo ka Sabatha,
6 sehlopha se sengwe se be Keiting yeo e bitšwago Fantešeni, gomme sehlopha se sengwe se be keiting yeo e lego ka morago ga bahlokomedi ba mošate. Le tla šiedišana ka go dula le beile ntlo ya kgoši leihlo.
7 Dihlopha tše dingwe tše pedi tšeo di sa šomego ka sabatha, di swanetše go dula di beile ntlo ya Jehofa leihlo e le gore di šireletše kgoši.
8 Le swanetše go dikologa kgoši ka mahlakoreng ka moka, yo mongwe le yo mongwe a swere dibetša tša gagwe. Motho yo a ka lekago go tsena gare ga mašole a bolawe. Le dule le na le kgoši kae le kae moo e yago gona.”
9 Baetapele ba dihlopha tša mašole a 100, ba ile ba dira seo moperisita Jehoyada a ba laetšego sona. Yo mongwe le yo mongwe a tšea mašole a gagwe ao a bego a šoma ka sabatha le ao a bego a sa šome ka sabatha gomme a ya go moperisita Jehoyada.
10 Ke moka moperisita Jehoyada a fa baetapele ba dihlopha tša mašole a 100 marumo le dikotse tša dinkgokolo tšeo e bego e le tša Kgoši Dafida, tšeo di bego di le ka ntlong ya Jehofa.
11 Ka gona bahlokomedi ba mošate ba ema mafelong ao ba šomelago go ona, yo mongwe le yo mongwe a swere dibetša tša gagwe. Ba be ba eme go tloga ka lehlakoreng le letona la ntlo go fihla ka lehlakoreng le letshadi la ntlo, ba bangwe ba le kgauswi le aletare gomme ba bangwe ba le kgauswi le ntlo. Ka moka ba be ba dikologile kgoši.
12 Ke moka Jehoyada a tliša morwa wa kgoši ka ntle gomme a mo rweša mphapahlogo le Molao Woo o Ngwadilwego,* ba mo tlotša ka makhura gomme ba mo dira kgoši. Ke moka ba thoma go phaphatha matsogo ba re: “Anke kgoši e phele go ya go ile!”
13 Ge Athalia a ekwa lešata la batho bao ba kitimago, o ile a napa a ya go batho bao ka ntlong ya Jehofa.
14 Ke moka a bona kgoši e eme kgauswi le philara go ya ka setlwaedi. Baetapele ba mašole le baletši ba diphalafala ba be ba na le kgoši gomme batho ka moka ba moo nageng ba be ba thabile e bile ba letša diphalafala. Ge Athalia a bona seo, o ile a gagola diaparo tša gagwe gomme a goeletša a re: “Ba logile maanomabe! Ba logile maanomabe!”
15 Eupša moperisita Jehoyada a laela baetapele ba dihlopha tša mašole a 100 bao ba bego ba kgethilwe gore ba hlokomele mašole, a re go bona: “Mo ntšheng ka mo gare ga mašole. Le gona ge e ba go ka ba le motho yoo a mo emelelago, a bolawe ka sabola!” Ka gobane moperisita o be a itše: “Le se ke la mmolaela ka ntlong ya Jehofa.”
16 Ka gona, ba mo swara gomme ge a fihla lefelong leo dipere di tsenago ka lona ge di tsena ka mošate, ba mmolaela gona moo.
17 Ke moka Jehoyada a dira kgwerano magareng ga Jehofa, kgoši le setšhaba, e le gore setšhaba se tšwele pele e le sa Jehofa, a ba a dira kgwerano magareng ga kgoši le setšhaba.
18 Ka morago ga moo setšhaba ka moka sa ya tempeleng ya Baali gomme sa phušola dialetare tša gagwe, sa pšhatlaganya diswantšho tša gagwe, sa ba sa bolaya le Matane moperisita wa Baali pele ga dialetare tšeo.
Ke moka moperisita a kgetha balebeledi bao ba hlokomelago batho bao ba hlankelago ntlong ya Jehofa.
19 Le gona, o ile a tšea baetapele ba dihlopha tša mašole a 100, bahlapetši ba Karia, bahlokomedi ba mošate le batho ka moka ba moo nageng, gore ba tšwe le kgoši ka ntlong ya Jehofa gomme ba tsena mošate ka tsela yeo e fetago keiting ya mohlokomedi wa mošate. Ke moka Jehoashe a dula setulong sa bogoši sa dikgoši.
20 Ka gona, setšhaba ka moka sa moo nageng sa thaba gomme motseng gwa ba le khutšo ka gobane Athalia o be a bolailwe ka sabola ntlong ya kgoši.
21 Jehoashe o be a na le mengwaga e šupa ge a eba kgoši.
Mengwalo ya tlase
^ Mohlomongwe ke lengwalo la go phuthwa leo le nago le Molao wa Modimo.
