Puku ya Bobedi ya Dikgoši 12:1-21
12 Jehoashe o bile kgoši ngwageng wa bošupa wa ge Jehu a buša, gomme o bušitše Jerusalema ka mengwaga e 40. Leina la mmagwe e be e le Sibia wa go tšwa Beresheba.
2 Jehoashe o ile a tšwela pele a dira dilo tše dibotse pele ga Jehofa nakong ka moka ya ge moperisita Jehoyada a be a mo hlahla.
3 Eupša ga se a ka a fediša mafelo a phagamego ao go rapelwago go ona, le gona setšhaba se be se sa dutše se dira dihlabelo tšeo di thuntšhago muši mafelong ao.
4 Jehoashe o ile a re go baperisita: “Tšeang tšhelete ka moka ya dibego tše kgethwa yeo e tlišitšwego ntlong ya Jehofa, tšhelete yeo yo mongwe le yo mongwe a swanetšego go e ntšha, tšhelete yeo yo mongwe le yo mongwe a dirilego keno ya gore a ka kgona go e ntšha le tšhelete ka moka yeo motho yo mongwe le yo mongwe a e ntšhago ka go rata ntlong ya Jehofa.
5 Baperisita ba tla tšea tšhelete yeo go batho bao ba e ntšhitšego gomme ba e diriša go lokiša ntlo ya Modimo. Ba lokiše gohle mo e senyegilego gona.”*
6 Ka ngwaga wa bo-23 wa ge go buša Kgoši Jehoashe, baperisita ba be ba se ba tšwa ba lokiša moo ntlo ya Modimo e bego e senyegile gona.
7 Ka gona Kgoši Jehoashe a bitša moperisita Jehoyada le baperisita ba bangwe gomme a re go bona: “Ke ka baka la eng le sa lokiše ntlo ya Modimo? Ka gona le se sa hlwa le tšea tšhelete e nngwe go batho bao ba e ntšhago ka ntle le ge e ba tšhelete yeo e tlo dirišetšwa go lokiša ntlo ya Modimo.”
8 Ka gona baperisita ba dumelelana gore ba ka se sa hlwa ba tšea tšhelete setšhabeng le go se sa ikarabela ka go lokiša ntlo ya Modimo.
9 Moperisita Jehoyada a tšea lepokisi, a phula lešoba sekhurumelong sa lona gomme a le bea kgauswi le aletare ka go le letona la ge motho a tsena ka ntlong ya Jehofa. Ke moo baperisita bao e lego baletamejako ba bego ba tsenya tšhelete ka moka yeo e bego e tlišwa ka ntlong ya Jehofa.
10 Nako le nako ge mongwaledi wa kgoši le moperisita yo mogolo ba bona gore lepokisana la tšhelete yeo e tlišitšwego ka ntlong ya Jehofa le tletše, ba be ba tšea tšhelete yeo gomme ba e bala.*
11 Ba be ba tšea tšhelete yeo ba e badilego gomme ba e fa batho bao ba bego ba abetšwe gore ba hlokomele mošomo woo o bego o dirwa ka ntlong ya Jehofa. Ke moka batho bao ba be ba patela batho bao ba šomago ka kota le baagi bao ba bego ba šoma ka ntlong ya Jehofa,
12 gotee le batho bao ba agago ka maswika goba ditena le bao ba bego ba sega maswika. Ba ile ba reka le dikota le maswika ao a segilwego gore ba lokiše ntlo ya Jehofa gomme ba diriša tšhelete e nngwe go patela ditshenyagalelo ka moka tšeo di bilego gona ge ba lokiša ntlo yeo.
13 Tšhelete yeo e tlišitšwego ntlong ya Jehofa ga se ya ka ya šomišwa go dira dibjana tša silifera, dilo tša go tima mabone, dibjana, diphalafala goba dilo le ge e le dife tša gauta goba tša silifera tšeo di lego ka ntlong ya Jehofa.
14 Tšhelete yeo e be e fiwa feela bašomi gomme bona ba e dirišetša go lokiša ntlo ya Jehofa.
15 Banna bao ba bego ba filwe tšhelete gore ba efe bašomi ba be ba sa botšišwe gore ba dirile eng ka yona ka gobane ba be ba tshepega.
16 Eupša tšhelete ya dibego tša molato le tšhelete ya dibego tša sebe e be e sa tlišwe ka ntlong ya Jehofa, e be e le ya baperisita.
17 Ka nako yeo Hasaele kgoši ya Siria o ile a ya go lwa le Gathe gomme a e thopa, ka morago ga moo a ya go hlasela Jerusalema.
18 Ke moka Kgoši Jehoashe wa Juda a tšea dibego ka moka tše kgethwa tšeo borakgolokhukhu ba gagwe e lego Jehoshafate, Jehorama le Ahasia, e lego dikgoši tša Juda, ba bego ba di kgethagaditše. A ba a tšea le dibego tša gagwe tše kgethwa le gauta ka moka yeo e bego e le ka matlotlong a ntlo ya Jehofa le ka ntlong ya kgoši, a di romela go Hasaele kgoši ya Siria. Ka gona Hasaele a se sa hlasela Jerusalema.
19 Ditaba ka moka tša Jehoashe le dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Juda.
20 Eupša bahlanka ba Jehoashe ba ile ba mo logela maanomabe gomme ba mmolaela ntlong ya Mmotong,* tseleng yeo e theogelago Sila.
21 O bolailwe ke bahlanka ba gagwe e lego Josakara morwa wa Shimeathe le Jehosabadi morwa wa Shomere. O bolokilwe le borakgolokhukhu ba gagwe Motseng wa Dafida, gomme morwa wa gagwe Amatsia a ba kgoši legatong la gagwe.
Mengwalo ya tlase
^ Goba, “gohle moo go nago le menga.”
^ Goba, “ba be ba e tsenya ka mekotleng.” Phetolelo ya lentšu ka lentšu e re, “ba be ba e tlema.”
^ Goba, “Bethe-milo.”
