Puku ya Bobedi ya Dikgoši 4:1-44
4 Yo mongwe wa basadi ba barwa ba baporofeta o ile a llela Elisha a re: “Monna wa ka yo e lego mohlanka wa gago o hlokofetše, e bile wena o tseba gabotse gore mohlanka wa gago o be a boifa Jehofa. Bjale monna yoo monna wa ka a bego a mo kolota o tlile go tlo tšea bana ba ka ba babedi gore a ba dire makgoba.”
2 Elisha a re go yena: “Ke go direle eng? Mpotše, o na le eng ka ntlong?” Mosadi yoo a re: “Ke no ba le sebjana sa letsopa sa molongwana sa makhura.”
3 Ke moka a re: “Eya go baagišane ba gago ka moka o ye go kgopela dibjana tšeo di se nago selo. O kgopele tše dintšhi kamoo o ka kgonago ka gona.
4 Ke moka o tle o itswalelele ka ntlong le barwa ba gago. Gomme o tlatše makhura ka dibjaneng tšeo ka moka, tšeo di tletšego o di beele ka thoko.”
5 Ke moka mosadi yoo a tloga go yena.
Ge yena le barwa ba gagwe ba tsene ka ntlong ba tswaletše lebati, barwa bao ba ile ba mo fa dibjana gomme yena a tšhela makhura.
6 Ge dibjana tšeo di tletše mosadi yoo o ile a re go yo mongwe wa barwa ba gagwe: “Tliša sebjana se sengwe.” Eupša morwa yoo a re: “Ga go sa na dibjana tše dingwe.” Ke moka makhura a se sa tšwa.
7 Ka gona mosadi yoo a tla go mohlanka wa Modimo wa nnete, ke moka mohlanka yoo a re: “Eya o yo rekiša makhura ao gomme o patele dikoloto tša gago ka moka, ke moka wena le barwa ba gago le tla iphediša ka tšhelete yeo e šetšego.”
8 Ka letšatši le lengwe ge Elisha a be a ile Shunema, moo go bego go na le mosadi yo mongwe wa go tuma, mosadi yoo o ile a mo mema gore a tle go ja dijo. Ka mehla ge Elisha a be a feta moo, o be a eya go mosadi yoo gore a ye go ja dijo.
9 Ka gona mosadi yoo o ile a re go monna wa gagwe: “Ke a tseba gore monna yo a fetago mo go rena ka mehla ke mohlanka yo a kgethegilego wa Modimo.
10 Ke kgopela re mo direle kamora e nyenyane ya ka godimo ga ntlo, re mmeele mpete, tafola, setulo le sehlomelamabone. Nako le nako ge a etla go rena o tla dula moo.”
11 Ka letšatši le lengwe a tla moo, ke moka a ya ka kamoreng ya ka godimo gore a yo robala.
12 Ka gona a botša mohlanka wa gagwe Gehasi a re: “Mpiletše mosadi wa Moshunema.” Ka gona a mmitša, mosadi yoo a tla a ema pele ga gagwe.
13 Ke moka Elisha a re go Gehasi: “Ke kgopela o botše mosadi yo o re: ‘Ka ge o itshwentše ka rena ka go re hlokomela, o nyaka re go direla eng? Na o nyaka ke go bolelele le kgoši goba le molaodi wa mašole?’” Ka gona mosadi yoo a araba Gehasi a re: “Ke dula le batho ba gešo.”
14 Elisha a re go Gehasi: “Bjale re ka mo direla eng?” Gehasi a re: “Ga a na morwa e bile monna wa gagwe o tšofetše.”
15 Elisha a napa a re: “Mmitše.” Ka gona Gehasi a mmitša gomme mosadi yoo a tla a ema mojako.
16 Ke moka a re: “Ka yona nako ye ngwageng o tlago o tla be o na le morwa.” Eupša mosadi yoo a re: “Aowa mong wa ka, wena mohlanka wa Modimo wa nnete. O se ke wa botša nna mohlanka wa gago maaka.”
17 Ka gona mosadi yoo a ima, a belega morwa ka yona nako yeo ngwageng o latetšego. Gwa direga feela bjalo ka ge Elisha a mmoditše.
18 Ngwana yoo a gola, gomme ka letšatši le lengwe a ya go tatagwe yo a bego a na le babuni.
19 A dulela go botša tatagwe a re: “Ke opa ke hlogo, joo ke opa ke hlogo!” Ke moka tatagwe a re go mohlanka yo mongwe: “Mo rwale o mo iše go mmagwe.”
20 Ka gona a mo iša go mmagwe. Mmagwe a mo kuka go fihlela thapama, mafelelong a hlokofala.
21 Ke moka mmagwe a ya a mo robatša mpeteng wa mohlanka wa Modimo wa nnete, gomme a tšwa a tswalela lebati.
22 Ka gona mosadi yoo a bitša monna wa gagwe a re: “Ke kgopela o mphe mohlanka o tee le tonki, gore ke ye go mohlanka wa Modimo wa nnete gomme ke boe.”
23 Eupša monna wa gagwe a re: “Ke ka baka la eng o nyaka go mmona lehono? Ga se monyanya wa ngwedi o moswa goba sabatha.” Eupša mosadi yoo a re: “O se ke wa tshwenyega, ga go na bothata.”
24 Ke moka mosadi yoo a lokiša tonki gomme a re go mohlanka wa gagwe: “Dira gore tonki ye e kitime. O se ke wa fokotša lebelo ka baka la ka, ka ntle le ge nka go botša gore o fokotše.”
25 Ka gona mosadi yoo a ya go mohlanka wa Modimo wa nnete Thabeng ya Karamele. Ge mohlanka wa Modimo wa nnete a se na go mmona a sa tla kgole, o ile a re go mohlanka wa gagwe Gehasi: “Bona! Mosadi yola wa Moshunema šole.
26 Kitima hle, o mmotšiše o re: ‘Na o phetše gabotse? Na monna wa gago yena o phetše gabotse? Na ngwana wa gago le yena o phetše gabotse?’” Mosadi yoo a araba a re: “Dilo ka moka di gabotse.”
27 Ge a se no fihla go mohlanka wa Modimo wa nnete thabeng, a mo swara maoto. Gehasi a batamela gore a kgorometše mosadi yoo, eupša mohlanka wa Modimo wa nnete a re: “Mo tlogele, ka gobane o kwele bohloko kudu, eupša ga ke tsebe gore o kwešitšwe ke eng bohloko ka gobane Jehofa ga se a mpotša.”
28 Ke moka mosadi yoo a re: “Na ke go kgopetše gore o ntire gore ke be le morwa? Na ga se ka go botša gore: ‘O se ke wa mpotša maaka?’”
29 Ka yona nako yeo Elisha a re go Gehasi: “Tlema seaparo sa gago mathekeng, o tšee molamo wa ka o sepele. Ge o ka kopana le motho o se ke wa mo dumediša, ge e ba yena a ka go dumediša, o se ke wa mo araba. Ge o fihla moo o bee molamo sefahlegong sa mošemane yoo.”
30 Ka gona mmago mošemane yoo a re: “Ke ikana ka wena le ka Jehofa Modimo yo a phelago, nka se go tlogele mo.” Ka gona Elisha a emelela a sepela le mosadi yoo.
31 Gehasi a ba eta pele, a fihla a bea molamo sefahlegong sa mošemane yoo, ke moka mošemane yoo a se ntšhe lentšu goba go šišinyega. A boela morago a kopana le Elisha a re go yena: “Mošemane yola ga se a tsoga.”
32 Ge Elisha a tsena ka ntlong, o ile a hwetša mošemane a robetše mpeteng a hlokofetše.
33 Ke moka a tsena a tswalela lebati. E be e le yena le mošemane yoo feela, ke moka a thoma go rapela Jehofa.
34 Ke moka Elisha a inama, a bea molomo wa gagwe godimo ga molomo wa mošemane yoo, mahlo a gagwe a le godimo ga a mošemane yoo, le diatla tša gagwe di le godimo ga tša mošemane yoo ke moka mmele wa mošemane yoo wa thoma go ruthela.
35 Elisha o ile a ya godimo le fase ka moo ntlong a inamela godimo ga mošemane yoo gape. Ke moka mošemane yoo a ethimola gašupa, ka morago ga moo a bula mahlo.
36 Bjale Elisha a bitša Gehasi a re: “Bitša mosadi wa Moshunema.” Yena a mmitša gomme mosadi yoo a tla go Elisha. Ke moka Elisha a re: “Kuka morwa wa gago.”
37 Mosadi yoo a tsena ke moka a wela maotong a Elisha gomme a mo khunamela, ka morago ga moo a kuka morwa wa gagwe gomme a tšwa.
38 Ge Elisha a boela Giligala o ile a hwetša go wele tlala moo nageng. Barwa ba baporofeta ba be ba dutše pele ga Elisha, gomme Elisha a re go mohlanka wa gagwe: “Bea pitša e kgolo mollong o apeele barwa ba baporofeta dijo.”
39 Yo mongwe wa bahlanka o ile a ya nageng go yo kga merogo, a hwetša mohlare wa go swana le moterebe o entšwe dienywa tša go swana le maraka, ke moka a di kga a di tlatša seaparo sa gagwe. A boa le tšona a di ripelela gomme a di lahlela ka pitšeng eupša ba be ba sa tsebe gore dienywa tšeo ke eng.
40 Ka morago ba solela barwa ba baporofeta bao gore ba je, eupša ge ba se na go di ja ba goeletša ba re: “Wena mohlanka wa Modimo wa nnete, go na le mpholo ka mo dijong.” Ba palelwa ke go di ja.
41 Ka gona a re: “Etlang le folouru.” Ge a se na go e tšhela ka pitšeng, a re: “Solelang barwa ba ba baporofeta gore ba je.” Ba hwetša go se sa na mpholo.
42 Gwa tla monna yo a bego a etšwa Baali-shalisha ke moka a tlišetša mohlanka wa Modimo wa nnete dinkgwa tše 20 tšeo di dirilwego ka mabele a mathomo a go butšwa gotee le mokotla woo o bego o na le mabele a maswa. Ke moka Elisha a re: “Solelang barwa ba ba baporofeta gore ba je.”
43 Eupša mohlanka wa Elisha a re: “Dijo tše di ka se lekane le batho ba 100.” Elisha a re: “Ba fe tšona gore ba je, ka gobane Jehofa o re: ‘Ba tlo ja gwa ba gwa ba le tšeo di šalago.’”
44 Ka gona a bea dijo tšeo pele ga bona gomme ba ja gwa ba gwa ba le tšeo di šalago, go ya ka seo Jehofa a se boletšego.
