Puku ya Bobedi ya Dikoronika 2:1-18
-
O lokišetša go aga tempele (1-18)
2 Bjale Solomone a laela gore go agwe ntlo yeo e tlago go dira gore leina la Jehofa le hlomphiwe, a laela le gore yena a agelwe mošate.
2 Solomone o ile a kgetha banna ba 70 000 (dikete tše masomešupa) gore ba šome mešomo ya maemo a tlasana,* ba 80 000 (dikete tše masomeseswai) gore ba šome go betla maswika dithabeng, a ba a kgetha ba 3 600 (dikete tše tharo le makgolo a tshelelago) gore ba ba hlokomele.
3 Le gona, Solomone o ile a romela molaetša go Hirama kgoši ya Tiro a re: “Nthomele dikota tša metsedara go swana le ge o ile wa di romela Dafida tate gore a ikagele ntlo* yeo a tlago go dula go yona.
4 Ga bjale ke agela Jehofa Modimo wa ka ntlo yeo e tlago go dira gore leina la gagwe le hlomphiwe, gore ke e kgethagatše, ke fiše diorelo tšeo di nkgago bose pele ga gagwe le gore senkgwa seo se hlatlagantšwego* se dule se le moo. Go dirwe dibego tša go fišwa mesong le mantšiboa, ka disabatha, ge ngwedi o moswa o thoma go bonagala le dinakong tša menyanya ya Jehofa Modimo wa rena. Se ke seo Baisiraele ba tlago go dula ba se dira.
5 Ntlo yeo ke e agago e tlo ba e kgolo, ka gobane Modimo wa rena ke yo mogolo go feta medimo e mengwe ka moka.
6 Ruri ga go na motho yo a ka kgonago go mo agela ntlo, ka gobane gaešita le legodimo, lona legodimo la magodimo ga le kgone go mo lekana. Bjale nna ke mang moo nka mo agelago ntlo ntle le gore ke no mo agela feela lefelo leo go tlago go dirwa dihlabelo tšeo di thuntšhago muši pele ga gagwe?
7 Bjale nthomele motho yo a kgonago go šoma ka gauta, silifera, koporo, tšhipi, garane e phepolo, e hwibiduhwibidu le e talalerata, le yoo a kgonago mongwalo wa go fata. O tla šoma a le Juda le Jerusalema a na le batho ba ka bao ba tsebago mošomo wa diatla, bona bao ba kgethilwego ke Dafida tate.
8 Le gona o nthomele dikota tša metsedara, tša mejunipere le tša merekure tšeo di tšwago Libanoni, ka gobane ke tseba gabotse gore bahlanka ba gago ba na le bokgoni bja go rema mehlare ya Libanoni. Bahlanka ba ka ba tla šoma le bahlanka ba gago
9 gore ba ntokišeletše dikota tše dintšhi, ka gobane ntlo yeo ke tlago go e aga e tlo ba e botse kudu ebile ya ba e kgolo.
10 Ke tla nea bahlanka ba gago bao ba remago mehlare dijo. Ke tla ba fa korong yeo e imelago dikhilokgerama tše 3 200 000 (dimilione tše tharo le dikete tše makgolo a mabedi),* mabele* ao a imelago dikhilokgerama tše 2 600 000 (dimilione tše pedi le dikete tše makgolo a tshelelago),* beine yeo e lekanago dilithara tše 440 000 (dikete tše makgolonne-masomenne)* le makhura ao a lekanago dilithara tše 440 000 (dikete tše makgolonne-masomenne).”*
11 Ke moka Hirama kgoši ya Tiro a ngwalela Solomone molaetša a re: “Jehofa o go dirile kgoši ya batho ba gagwe ka ge a ba rata.”
12 Hirama a oketša ka gore: “Anke Jehofa Modimo wa Isiraele a retwe, yena yoo a dirilego magodimo le lefase, ka gobane o file Kgoši Dafida morwa yo bohlale, yoo a nago le temogo le kwešišo, yena yoo a tlago go agela Jehofa ntlo le go ikagela mošate.
13 Bjale ke romela Hirama-abi e lego monna yoo a nago le bokgoni bja go dira mošomo wa diatla ebile a na le kwešišo,
14 yoo e lego morwa wa mosadi wa Modani eupša tatagwe a etšwa Tiro. O kgona go šoma ka gauta, silifera, koporo, tšhipi, maswika, dikota, garane ya mmala o mophepolo, garane e talalerata, lešela le le khwibidukhwibidu le lešela le lebotse. O kgona go dira mohuta o mongwe le o mongwe wa go ngwala ka go fata ebile a ka ngwala selo se sengwe le se sengwe seo a se filwego ka mongwalo wa go fata. O tla šoma le banna ba gago bao ba nago le bokgoni bja go dira mošomo wa matsogo le banna ba mong wa ka Dafida tatago bao le bona ba nago le bokgoni bja go dira mošomo wa matsogo.
15 Bjale anke mong wa ka a romele korong, mabele, makhura le beine tšeo a di tshepišitšego bahlanka ba gagwe.
16 Rena re tla go remela mehlare kua Libanoni go ya le kamoo o nyakago ka gona, gomme re tla tlema dikota tša yona gotee, ra di lesa gore di sepele ka lewatle go fihla Jopa, ke moka wena o tla di iša Jerusalema.”
17 Ke moka Solomone a bala banna ka moka bao ba bego ba etšwa dinageng tše dingwe gomme ba dula nageng ya Isiraele. O ile a dira seo ka morago ga gore Dafida tatagwe le yena a bale batho, gomme a hwetša e le ba 153 600 (dikete tše lekgolo masomehlano-tharo le makgolo a tshelelago).
18 Ka gona gare ga banna bao o ile a kgetha banna ba 70 000 (dikete tše masomešupa) gore ba šome mošomo wa maemo a tlasana, ba 80 000 (dikete tše masomeseswai) gore ba šome go betla maswika dithabeng, a ba a kgetha le ba 3 600 (dikete tše tharo le makgolo a tshelelago) gore ba ba hlokomele ge ba dutše ba šoma.
Mengwalo ya tlase
^ Goba, “gore ba šome go rwala merwalo.”
^ Goba, “mošate.”
^ Ke gore, senkgwa seo se neetšwego Modimo.
^ Phetolelo ya lentšu ka lentšu e re, “dipitša tše 20 000.” Pitša e be e lekana le dilithara tše 220. Bona Dit. B14.
^ Phetolelo ya lentšu ka lentšu e re, “garase.”
^ Phetolelo ya lentšu ka lentšu e re, “dipitša tše 20 000.”
^ Phetolelo ya lentšu ka lentšu e re, “magapa a 20 000.” Legapa le lekana le dilithara tše 22. Bona Dit. B14.
^ Phetolelo ya lentšu ka lentšu e re, “magapa a 20 000.”
