Puku ya Bobedi ya Dikoronika 25:1-28
25 Amatsia o be a e na le mengwaga e 25 ge a eba kgoši gomme o bušitše ka mengwaga e 29 kua Jerusalema. Leina la mmagwe e be e le Jehoadine wa Jerusalema.
2 O ile a tšwela pele a dira dilo tše dibotse pele ga Jehofa, eupša e sego ka pelo ka moka.
3 Ge mmušo wa gagwe o se na go tia, o ile a bolaya banna ka moka bao ba ilego ba bolaya tatagwe yoo e bego e le kgoši.
4 Eupša ga se a ka a bolaya barwa ba banna bao ka gobane o be a dira seo se dumelelanago le seo se ngwadilwego ka pukung ya Molao wa Moshe, moo Jehofa a itšego: “Botatago bana ba se ke ba bolawa ka baka la seo bana ba bona ba se dirilego, le bana ba se ke ba bolawa ka baka la seo botatago bona ba se dirilego, eupša motho yo mongwe le yo mongwe o swanetše go bolawa ka baka la sebe sa gagwe.”
5 Amatsia a kgoboketša Bajuda, ke moka a ba emiša go ya ka malapa a borakgolokhukhu ba bona, go ya ka baetapele ba ba sekete le go ya ka baetapele ba ba lekgolo ba Juda le Benjamini ka moka. O ile a ba ngwadiša go thoma ka bao ba nago le mengwaga e 20 go ya godimo, gomme a hwetša e le mašole ao a tlwaeditšwego a 300 000 (dikete tše makgolo a mararo), ao a ka lwago dintwa ebile a kgona go šomiša lerumo le kotse e kgolo.
6 Le gona, mo go Baisiraele, o ile a hira mašole a matla a 100 000 (dikete tše lekgolo) ka silifera yeo e imelago dikhilokgerama tše 3 420 (dikete tše tharo makgolonne-masomepedi).*
7 Eupša monna yo mongwe wa Modimo wa nnete a tla go yena a re: “Wena kgoši, o se ke wa dumelela mašole a Isiraele a sepela le wena, ka gobane Jehofa ga a na Isiraele, ebile ga a na Baefuraime.
8 Eya o nnoši gomme o bontšhe sebete ntweng ye. Ka ntle le moo, Modimo wa nnete a ka dira gore o kgopše pele ga lenaba la gago ka gobane Modimo o na le matla a go thuša le a go dira gore o we.”
9 Ke moka Amatsia a re go monna wa Modimo wa nnete: “Eupša go tla direga eng ka silifera yeo e imelago dikhilokgerama tše 3 420 (dikete tše tharo makgolonne-masomepedi) yeo ke e filego mašole a Baisiraele?” Ke moka monna wa Modimo wa nnete a re: “Jehofa o tla go fa tše dintšhi kudu go feta tšeo.”
10 Ke moka Amatsia a gomiša mašole ale a bego a tlile le yena go tšwa Efuraime, a re a boele gae. Eupša a be a galefetše Juda kudu, ke moka a boela gae a galefile kudu.
11 Ke moka Amatsia a ba le sebete, gomme a etelela pele mašole a gagwe go ya Moeding wa Letswai, a bolaya banna ba go tšwa Seire ba 10 000 (dikete tše lesome).
12 Ke moka banna ba Juda ba ile ba thopa batho ba 10 000 (dikete tše lesome), ka morago ba ba iša godimo ga leswika le legolo ke moka ba ba lahlela fase. Batho bao ba pšhatlagana ka moka ga bona.
13 Eupša mašole a mangwe ao Amatsia a bego a a gomišeditše morago nakong ya ge a be a eya le yena ntweng, a ile a hlasela metse e mengwe ya Juda, go tloga ka Samaria go fihla Bethe-horoni gomme a bolaya batho ba 3 000 (dikete tše tharo) a ba tšeela dilo tša bona tše dintšhi.
14 Eupša ka morago ga gore Amatsia a boe go hlasela Baedomo, o ile a boa le medimo ya batho ba Seire gomme a ipeela yona gore e be medimo ya gagwe. O ile a thoma go e khunamela le go e direla dihlabelo tšeo di thuntšhago muši.
15 Ka gona Jehofa a galefela Amatsia kudu gomme a mo romela moporofeta yoo a ilego a mmotšiša a re: “Ke ka baka la eng o hlankela medimo ya batho yeo e paletšwego ke go phološa batho ba yona ge ba be ba elwa le wena?”
16 Eitše ge a sa bolela le yena, ke moka kgoši ya re: “Na go na le motho yo a go kgethilego gore o be moeletši wa kgoši? Homola! Na o nyaka go hwela lefeela?” Ke moka moporofeta yoo a homola a re tuu! Eupša a oketša ka gore: “Ke a tseba gore Modimo o tlo go fediša, ka gobane o dirile se e bile ga se wa theetša keletšo ya ka.”
17 Ka morago ga gore Kgoši Amatsia wa Juda a boledišane le baeletši ba gagwe, o ile a romela molaetša go Jehoashe morwa wa Jehoahase morwa wa Kgoši Jehu wa Isiraele, a re: “Etla mo re lwe.”
18 Kgoši Jehoashe wa Isiraele a romela molaetša go Kgoši Amatsia wa Juda, a re: “Mohlašana wa meetlwa wa Libanoni o ile wa romela molaetša go motsedara wa Libanoni wa re: ‘Tšea morwedi wa gago o mo nee morwa wa ka gore e be mosadi wa gagwe.’ Eupša sebata sa Libanoni se ile sa feta moo gomme sa gatakela mohlašana woo.
19 Wena o itše, ‘Ke bolaile Baedomo.’ Bjale o thomile go ikgantšha. E le ge o nyaka go tumišwa eupša tšwela pele o dutše ka ntlong ya gago. Ke ka baka la eng o hlola mpherefere, mola o tlo fenywa gomme wa dira gore wena le Bajuda ka moka le we?”
20 Eupša Amatsia a se ke a theetša, ka gobane Modimo wa nnete o be a dirile gore manaba a bona a ba fenye ka ge ba ile ba hlankela medimo ya Edomo.
21 Ka gona Kgoši Jehoashe wa Isiraele a ya go lwa le Kgoši Amatsia wa Juda kua Bethe-shemeshe ya Juda.
22 Baisiraele ba ile ba fenya Bajuda moo Mojuda yo mongwe le yo mongwe a ilego a tšhabela mo a dulago gona.*
23 Kgoši Jehoashe wa Isiraele o ile a thopa Kgoši Amatsia wa Juda, morwa wa Jehoashe, morwa wa Johoahase* kua Bethe-shemeshe. Ke moka a tla le yena Jerusalema gomme a phula lešoba lebotong la Jerusalema go tloga Keiting ya Efuraimi go fihla Keiting ya Khoneng. Lešoba leo e be e le la dimithara tše 180 (lekgolo-masomeseswai).*
24 O ile a tšea gauta ka moka le silifera ka moka le dilo ka moka tšeo di bego di le ka ntlong ya Modimo wa nnete, tšeo di bego di hlokometšwe ke Obede-edomo le tšeo di bego di le ka matlotlong ao a lego ka ntlong ya kgoši, a ba a thopa le batho ke moka a boela Samaria.
25 Ka morago ga gore Jehoashe morwa wa Jehoahase kgoši ya Isiraele a hlokofale, Amatsia morwa wa Jehoashe kgoši ya Juda o ile a phela mengwaga e 15.
26 Ditaba ka moka tša Amatsia, tša go tloga mathomong go fihla mafelelong, di ngwadilwe ka Pukung ya Dikgoši tša Juda le tša Isiraele.
27 Go tloga nakong yeo ka yona Amatsia a tlogetšego go latela Jehofa, ba ile ba mo logela maanomabe Jerusalema gomme a tšhabela Lakishi, eupša ba ile ba romela banna moo Lakishi gomme ba mmolaela moo.
28 Ka gona ba ile ba mo rwala ka dipere gomme ba mmoloka le borakgolokhukhu ba gagwe motseng wa Juda.
Mengwalo ya tlase
^ Phetolelo ya lentšu ka lentšu e re, “ditalente tša silifera tše 100.” Talente e tee e lekana le dikhilokgerama tše 34,2. Bona. Dit B14.
^ Phetolelo ya lentšu ka lentšu e re, “tenteng ya gagwe.”
^ O bitšwa gape gore ke, Ahasia.
^ Phetolelo ya lentšu ka lentšu e re, “dikubiti tše 400.” “Kubiti e tee” e lekana le disenthimithara tše 44,5. Bona Dit. B14.
