Puku ya Bobedi ya Dikoronika 28:1-27
28 Ahasi o be a na le mengwaga e 20 ge a eba kgoši, gomme o bušitše Jerusalema ka mengwa e 16. Ga se a dira dilo tša go loka pele ga Jehofa go swana le ge rakgolokhukhu wa gagwe Dafida a ile a di dira.
2 Go e na le moo, o ile a dira dilo tšeo dikgoši tša Isiraele di ilego tša di dira a ba a itirela medimo ya diswantšho ya Bobaali.
3 O ile a dira dihlabelo tšeo di thuntšhago muši Moeding wa Morwa wa Hinomo,* a dira bjalo a ekiša dilo tše di šišimišago tšeo di bego di dirwa ke ditšhaba tšeo Jehofa a ilego a di raka pele ga Baisiraele.
4 O ile a tšwela pele a dira dihlabelo le dihlabelo tšeo di thuntšhago muši mafelong a phagamego ao go rapelwago go ona, mebotong le ka fase ga mehlare ka moka e metala.
5 Ka gona, Jehofa Modimo wa gagwe o ile a dira gore kgoši ya Siria e mo fenye gomme ba tšea batho ba bantšhi bao ba bego ba thopilwe ke moka ba boa le bona Damaseko. Le gona, Modimo o ile a dira gore Ahasi a fenywe ke kgoši ya Isiraele yeo e ilego ya bolaya mašole a mantšhi a Ahasi.
6 Peka morwa wa Remalia o ile a bolaya mašole a 120 000 (dikete tše lekgolo-masomepedi) ka letšatši letee kua Juda, e lego banna ka moka bao ba bego ba na le sebete, ka gobane ba be ba tlogetše Jehofa Modimo wa borakgolokhukhu ba bona.
7 Le gona Sikiri, e lego lešole le matla la Moefuraime o ile a bolaya Maaseya morwa wa kgoši, Aserikama yoo a bego a hlokometše ba mošate le Elikana yoo a bego a latela kgoši ka maemo.
8 Go oketša moo, Baisiraele ba ile ba thopa banababo bona ba 200 000 (dikete tše makgolo a mabedi), e lego basadi, barwa le barwedi. Ba ile ba ba tšeela dilo tše dintšhi gomme ba ya le tšona Samaria.
9 Eupša gona moo, go be go na le moporofeta wa Jehofa yoo a bitšwago Odede. O ile a ema pele ga mašole ao a bego a eya Samaria gomme a re go ona: “Tsebang gore ka ge Jehofa Modimo wa borakgolokhukhu ba lena a be a galefetše batho ba Juda o ile a dira gore le ba fenye, eupša le ile la ba bolaya gasehlogo kudu. Modimo o bone seo le se dirilego.
10 Bjale lena le nyaka go tšea batho ba Juda le Jerusalema gore le ba dire bahlanka ba lena ba banna le ba basadi. Eupša na le lena ga le na molato pele ga Jehofa Modimo wa lena?
11 Bjale ntheetšeng gomme le bušetše banababo lena bao le ba thopilego ka gobane Jehofa o le galefetše kudu.”
12 Ke moka baetapele ba Baefuraime, e lego Asaria morwa wa Jehohanani, Berekia morwa wa Meshilemothe, Jehisikia morwa wa Shalume le Amasa morwa wa Hadilai, ba kgala bao ba bego ba etšwa ntweng,
13 ba re go bona: “Le se ke la tliša batho bao le ba thopilego mo, ka gobane le tla dira gore Jehofa a re bone molato. Seo le nyakago go se dira se tlo oketša dibe tša rena le molato wa rena ka gobane molato wa rena e šetše e le o mogolo ebile Modimo o galefetše Isiraele.”
14 Ka gona mašole ao a itlhamilego a tšea batho bao a bego a ba thopile le dilo tšeo a ba tšeetšego tšona gomme ba di fa baetapele le batho ka moka bao ba bego ba kgobokane moo.
15 Ke moka banna bao ba bego ba kgethilwe ka maina ba emelela gomme ba tšea diaparo gare ga dilo tšeo ba di thopilego ba di fa batho bao ba bego ba ba thopile, ba fa batho ka moka bao ba bego ba sa apara selo bao ba bego ba thopilwe. Ka gona ba ba apeša diaparo ba ba ba ba fa le diramphašane, dijo le dino, ba ba fa le makhura a go tlola. Go oketša moo, ba ile ba tšea batho bao ba bego ba fokola gomme ba ba nametša ditonki, ke moka ba ba iša go banababo bona kua Jeriko motseng wa mepalema. Ka morago ga moo ba boela Samaria.
16 Ka nako yeo Kgoši Ahasi o ile a romela molaetša go dikgoši tša Asiria gore di tle di mo thuše.
17 Le gona Baedomo ba ile ba tla Juda gape gomme ba e hlasela ke moka ba iša ba bangwe bothopša.
18 Bafilisita le bona, ba ile ba hlasela metse ya Shefela le ya Negebe ya Juda gomme ba thopa Bethe-shemeshe, Ajaloni, Gederothe, Soko gotee le metse ya yona yeo e e dikologilego, Thimina le metse ya yona yeo e e dikologilego le Gimitso le metse ya yona yeo e e dikologilego, ke moka ba dula moo.
19 Jehofa o ile a kokobetša Juda ka baka la Kgoši Ahasi wa Isiraele, ka gobane o ile a tlogela batho ba Juda ba sa laolege, gomme seo sa dira gore ba dire dibe tše dintšhi gomme ba se sa botegela Jehofa.
20 Mafelelong Kgoši Tiligathe-pilenesere wa Asiria o ile a tla go lwa le yena, a mo dira gore a gateletšege go e na le gore a mo matlafatše.
21 Ka gobane Ahasi o be a tšere dilo tša ntlong ya Jehofa le tša ntlong ya kgoši le tša dintlong tša baetapele gomme a di file kgoši ya Asiria e le mpho, eupša seo ga se sa mo thuša ka selo.
22 Nakong ya ge Kgoši Ahasi a be a gateletšegile, o ile a dira dibe tše dintšhi le go feta gomme a se botegele Jehofa.
23 O ile a thoma go direla medimo ya Damaseko dihlabelo, yona yeo e mo fentšego, ke moka a re: “Ka ge dikgoši tša Siria di thušwa ke medimo ya tšona, gona ke tla e direla dihlabelo gore e nthuše.” Eupša medimo yeo e ile ya dira gore yena le Isiraele ka moka ba wele mathateng.
24 Le gona, Ahasi o ile a kgoboketša dibjana tša ntlo ya Modimo wa nnete gomme a di pšhatlaganya, a tswalela mabati a ntlo ya Jehofa gomme a itirela dialetare dikhoneng tša diterata tša Jerusalema.
25 Ke moka mo metseng ka moka ya Juda o ile a dira mafelo a phagamego ao go rapelwago go ona e le gore a direle medimo e mengwe dihlabelo tšeo di thuntšhago muši, le gona o ile a kgopiša Jehofa Modimo wa borakgolokhukhu ba gagwe ka go dira bjalo.
26 Ditaba tša gagwe ka moka le dilo ka moka tšeo a di dirilego go tloga mathomong go fihla mafelelong di ngwadilwe ka Pukung ya Dikgoši tša Juda le tša Isiraele.
27 Mafelelong Ahasi o ile a hlokofala go no swana le borakgolokhukhu ba gagwe, ke moka ba mmolokela motseng wa Jerusalema, eupša ga se ba mmolokela mabitleng a dikgoši tša Isiraele. Ka morago ga moo, morwa wa gagwe Hesekia a ba kgoši legatong la gagwe.
Mengwalo ya tlase
^ Bona Tlhaloso ya Mantšu, “Gehena.”
