Puku ya Bobedi ya Dikoronika 31:1-21
31 Ge ba se na go fetša go dira dilo tše ka moka Baisiraele ka moka bao ba bego ba le gona ba ile ba ya metseng ya Juda gomme ba pšhatlaganya diphilara tše kgethwa, ba rema dikota tše kgethwa* le go phušula mafelo a phagamego ao go rapelwago go ona le dialetare Juda ka moka le Benjamini, le tšeo di bego di le Efuraime le Manase go fihlela ge ba di fedišitše. Ka morago ga moo Baisiraele ka moka ba boela metseng ya bona, yo mongwe le yo mongwe a ya gae ga gagwe.
2 Ke moka Hesekia a kgetha baperisita go ya ka dihlopha tša bona le Balefi go ya ka dihlopha tša bona, e le gore yo mongwe le yo mongwe wa bona a dire mošomo wa gagwe wa go dira dibego tša go fišwa le go dira dihlabelo tša go dira khutšo le Modimo*, a hlankela Jehofa, a mo leboga ebile a mo tumiša dikeiting tša malapa a gagwe.
3 Kgoši e be e na le karolo yeo e e neelago ya dibego tša go fišwa go tšwa dithotong tša yona, e lego dibego tša go fišwa tšeo di neelwago mesong le mantšiboa gotee le dibego tša go fišwa tšeo di neelwago ka disabatha, ge ngwedi o moswa o thoma go bonagala le dinakong tša menyanya go ya ka seo se ngwadilwego Molaong wa Jehofa.
4 Go oketša moo, a laela badudi ba Jerusalema gore ba fe baperisita le Balefi karolo yeo ba swanetšego go ba fa yona. O boletše seo ka gobane o be a nyaka gore Baperisita le Balefi ba dire modiro wa bona go ya le kamoo molao wa Jehofa o bego o laetše ka gona.
5 Ge molao o se na go ntšhiwa, Baisiraele ba ile ba neela ka dilo tše dintšhi kudu, e lego mabele ao a butšwitšego pele, beine e mpsha, makhura, le todi ya dinose gotee le dilo ka moka tšeo di bunnwego mašemong. Ba ile ba tliša karolo ya lesome ya selo se sengwe le se sengwe, dilo tšeo e be e le tše dintšhi.
6 Batho ba Isiraele le ba Juda bao ba bego ba dula metseng ya Juda, le bona ba ile ba tliša karolo ya lesome ya dikgomo le dinku, le karolo ya lesome ya dilo tše kgethwa tšeo di bego di kgethagaleditšwe Jehofa Modimo wa bona. Ba ile ba tliša dilo tšeo ba di paka gomme ya ba mekgobo e mentšhi.
7 Kgweding ya boraro ba ile ba thoma go paka meneelo ya bona ka mekgobo gomme ba fetša kgweding ya bošupa.
8 Ge Hesekia le baetapele ba etla gomme ba bona mekgobo yeo, ba ile ba reta Jehofa ke moka ba šegofatša setšhaba sa gagwe sa Isiraele.
9 Hesekia o ile a botšiša baperisita le Balefi ka mekgobo yeo,
10 ke moka Asaria moperisita yo mogolo ntlong ya Tsadoko a re go yena: “Go tloga ge batho ba ba be ba thoma go tliša meneelo ntlong ya Jehofa, ba be ba eja gomme ba khora ebile go eba le tšeo di šalago ka gobane Jehofa o šegofaditše setšhaba sa gagwe gomme dilo tše dintšhi tšeo di šetšego ke tše.”
11 Ke moka Hesekia a ba botša gore ba lokiše diphapoši tšeo go bewago dilo go tšona* ka ntlong ya Jehofa. Ke moka bona ba di lokiša.
12 Ba ile ba dula ba tliša meneelo, dikarolo tša lesome le dilo tše kgethwa ka go tshepega. Molefi yo a bitšwago Konania o ile a kgethwa gore a hlokomele dilo tšeo ka moka gomme Shimei ngwanabo o be a mo latela ka maemo.
13 Kgoši Hesekia o ile a laela gore Jehiele, Asasia, Nahathe, Asahele, Jerimothe, Josabadi, Eliele, Isimakia, Mahathe le Benaya e be baetapele, gomme ba thušana le Konania le Shimei ngwanabo, gomme Asaria e be e le moetapele ntlong ya Modimo wa nnete.
14 Morwa wa Jimina e lego Kore wa Molefi yoo a bego a leta keiti ya ka bohlabela o be a hlokometše meneelo yeo batho ba bego ba e ntšha ka go rata ba e ntšhetša Modimo wa nnete. O be a abela batho bao ba šomago ka tempeleng meneelo yeo e bego e ntšhetšwa Jehofa le dilo tše kgethwakgethwa.
15 Yena o be a okametše Edene, Miniamini, Jeshua, Shemaya, Amaria le Shekania bao ba bego ba le metseng ya baperisita gomme ba dira tirelo ya bona ka go tshepega, gore ba abele banababo bona dimpho tšeo go bego go neetšwe ka tšona. Ba be ba swanetše go abela batho ba bagolo le ba banyenyane ka go lekana.
16 Go be go balwa le batho ba batona bao ba bego ba ngwadišitšwe go ya ka meloko go tloga ka ba mengwaga e meraro go ya godimo, bao ba bego ba dula ba etla go hlankela ntlong ya Jehofa letšatši le lengwe le le lengwe le go dira mešomo yeo ba bego ba e abetšwe dihlopheng tša bona.
17 Baperisita ba be ba ngwadišwa go ya ka malapa a borakgolokhukhu ba bona go swana le Balefi bao ba bego ba ngwadišwa go tloga ka ba mengwaga e 20 go ya godimo le go ya ka mešomo yeo ba bego ba e filwe dihlopheng tša bona.
18 Go be go ngwadišwa le bana ba bona ka moka, basadi ba bona, barwa ba bona le barwedi ba bona, ke gore phuthego ka moka, ka gobane ba be ba dula ba ikgethagaditše ge ba be ba dira tirelo ya bona e kgethwa ka go tshepega,
19 gotee le ditlogolo tša Arone, bona baperisita bao ba bego ba dula mafelong ao a dikologilego metse ya bona. Metseng ka moka go be go kgethilwe banna go ya ka maina a bona gore ba abele motho yo mongwe le yo mongwe yo motona dijo gare ga baperisita, ba be ba abele motho yo mongwe le yo mongwe yoo a ngwadišitšwego lelokong la Balefi.
20 Hesekia a dira se Juda ka moka, ebile a tšwela pele a dira dilo tše di lokilego le tše dibotse gomme a botegela Jehofa Modimo wa gagwe.
21 Mošomo o mongwe le o mongwe wo a bego a o dira e le gore a hlankele Modimo wa gagwe, go sa šetšwe gore ke mošomo wo o sepedišanago le tirelo ya ntlong ya Modimo wa nnete goba molao le ditaelo, o be a o dira ka pelo ya gagwe ka moka ebile a atlega.
Mengwalo ya tlase
^ Bona Tlhaloso ya Mantšu.
^ Goba, “dihlabelo tša mohlakanelwa.”
^ Goba, “diphapoši tša go jela.”
