Puku ya Bobedi ya Dikoronika 33:1-25
33 Manase o be a na le mengwaga e 12 ge a eba kgoši gomme o bušitše Jerusalema ka mengwaga e 55.
2 O ile a dira dilo tše mpe pele ga Jehofa, a dira dilo tšeo di šišimišago tšeo di bego di dirwa ke ditšhaba tšeo Jehofa a ilego a di raka pele ga Baisiraele.
3 O ile a tsošološa mafelo a phagamego ao go bego go rapelwa go ona ao Hesekia tatagwe a bego a a sentše, a direla Bobaali dialetare a ba a dira le dikota tše kgethwa, o ile a ba a khunamela letšatši, ngwedi le dinaledi gomme a di hlankela.
4 O ile a ba a aga le dialetare ka ntlong ya Jehofa, yeo Jehofa a bego a boletše ka yona a itše: “Leina la ka le tla dula Jerusalema go ya go ile.”
5 A agela letšatši, ngwedi le dinaledi dialetare ka malapeng a mabedi ao a lego ntlong ya Jehofa.
6 O ile a dira dihlabelo ka barwa* ba gagwe Moeding wa Morwa wa Hinomo, a dira maleatlana, a dira dilo tša boloi, a diriša dipheko, a hira batho bao ba rego ba bolela dilo tšeo di tlago go direga nakong e tlago le bao ba rego ba kgona go boledišana le bahu. O ile a dira dilo tše mpe kudu pele ga Jehofa, a mo kgopiša.
7 O ile a tšea seswantšho se se betlilwego seo a bego a se dirile gomme a se bea ka ntlong yeo Modimo a bego a boditše Dafida le morwa wa gagwe Solomone ka yona a itše: “Ke tla bea leina la ka go ya go ile ka ntlong ye le Jerusalema, yeo ke e kgethilego gare ga meloko ka moka ya Baisiraele.
8 Nka se sa dira gore Baisiraele ba tloge nageng yeo ke e filego borakgolokhukhu ba bona, ge feela ba ka dira dilo tšeo ke ba laetšego tšona, ba kwa Melao ka moka, ditaelo le dikahlolo tšeo ke ba filego tšona ke diriša Moshe.”
9 Manase o ile a dulela go aroša badudi ba Juda le ba Jerusalema, a ba dira gore ba dire dilo tše mpe kudu go feta tšeo di bego di dirilwe ke ditšhaba tšeo Jehofa a di fedišitšego pele ga Baisiraele.
10 Jehofa o ile a bolela le Manase le setšhaba sa gagwe, eupša ba se mo theetše.
11 Ka gona Jehofa a ba tlišetša baetapele ba mašole a kgoši ya Asiria, ba thopa Manase, ba mo tlema ka dihuku le diketane tše pedi tša koporo ke moka ba mo iša Babilona.
12 Ge a be a gateletšegile o ile a kgopela Jehofa Modimo wa gagwe gore a mo gaugele gomme a dula a ikokobeditše pele ga Modimo wa borakgolokhukhu ba gagwe.
13 O ile a tšwela pele a rapela Modimo ke moka a mo kwela bohloko, a kwa kgopelo ya gagwe ya gore a mo gaugele gomme a mmušetša Jerusalema gore a boele a be kgoši gape. Ke moka Manase a napa a tseba gore Jehofa ke Modimo wa nnete.
14 Ka morago ga moo o ile a aga leboto la ka ntle la Motse wa Dafida ka bodikela bja Gihone yeo e bego e le moeding go fihla ka Keiti ya Dihlapi, a le raretša go fihla Ofele, a le dira gore e be le le telele kudu. Go oketša moo, o ile a kgetha baetapele ba mašole metseng ka moka e šireleditšwego ya Juda.
15 Ke moka o ile a tloša medimo e mengwe le seswantšho se se betlilwego ka ntlong ya Jehofa, gomme a laela gore dialetare ka moka tšeo a bego a di agile thabeng yeo ntlo ya Jehofa e bego e le go yona le tšeo a bego a di agile Jerusalema, di lahlelwe ka ntle.
16 Le gona, o ile a lokiša aletare ya Jehofa ke moka a thoma go neela dihlabelo tša go dira khutšo le Modimo le dihlabelo tša go leboga godimo ga yona gomme a botša batho ba Juda gore ba hlankele Jehofa Modimo wa Isiraele.
17 Le ge ba be ba sa dutše ba dira dihlabelo mafelong a phagamego ao go rapelwago go ona, ba be ba di direla Jehofa Modimo wa bona feela.
18 Ditaba ka moka tša Manase, thapelo yeo a e rapetšego Modimo wa gagwe le dilo tšeo a di boditšwego ke batho bao ba bego ba kgona go bona dipono bao ba bego ba mmotša ba diriša leina la Jehofa Modimo wa Isiraele, di ngwadilwe historing ya dikgoši tša Isiraele.
19 Dilo tšeo a di dirilego pele a ka ikokobetša, di ngwadilwe gare ga mantšu a batho ba gagwe bao ba bego ba kgona go bona dipono. Dilo tšeo di akaretša thapelo ya gagwe le kamoo a ilego a fiwa dilo tšeo a bego a di kgopetše, dibe tša gagwe ka moka le go se botege ga gagwe, mafelo ao a bego a agile mafelo a phagamego ao go rapelwago go ona a ba a bea le dikota tše kgethwa,* le diswantšho tšeo di betlilwego.
20 Mafelelong Manase a hlokofala go no swana le borakgolokhukhu ba gagwe gomme ba mmolokela ntlong ya gagwe, ke moka morwa wa gagwe Amone a ba kgoši legatong la gagwe.
21 Amone o be a na le mengwaga e 22 ge a eba kgoši, gomme o bušitše Jerusalema ka mengwaga e mebedi.
22 O ile a tšwela pele a dira dilo tše mpe pele ga Jehofa go swana le ge tatagwe e lego Manase a ile a di dira. Le gona Amone o ile a tšea diswantšho ka moka tšeo Manase tatagwe a bego a di dirile gomme a di direla dihlabelo, a ba a tšwela pele a di hlankela.
23 Eupša ga se a ikokobeletša Jehofa go etša ge Manase tatagwe a ile a ikokobetša, go e na le moo, Amone o ile a oketša molato wa gagwe.
24 Mafelelong bahlanka ba gagwe ba ile ba mo logela maanomabe gomme ba mmolaela ntlong ya gagwe.
25 Eupša setšhaba ka moka sa mo nageng sa bolaya batho ka moka bao ba bego ba logetše Kgoši Amone maanomabe gomme ba bea morwa wa gagwe Josia gore e be kgoši legatong la gagwe.
Mengwalo ya tlase
^ Phetolelo ya lentšu ka lentšu e re, “a fetiša barwa ba gagwe mollong.”
^ Bona Tlhaloso ya Mantšu.
