Puku ya Bobedi ya Dikoronika 35:1-27
35 Josia a direla Jehofa Paseka kua Jerusalema gomme ba hlaba diphoofolo tša go dira sehlabelo sa Paseka ka di-14 tša kgwedi ya pele.
2 O ile a abela baperisita mešomo ya bona a ba a ba kgothaletša gore ba dire mešomo ya bona ya ntlong ya Jehofa.
3 Ke moka a bolela le Balefi, e lego bahlahli ba Baisiraele ka moka, bona bao e bego e le ba bakgethwa go Jehofa, a re: “Beang Areka e kgethwa ka ntlong yeo Solomone morwa wa Dafida kgoši ya Isiraele a e agilego. Le ka se sa e rwala magetleng. Bjale hlankelang Jehofa Modimo wa lena le setšhaba sa gagwe sa Isiraele.
4 Itokišeng go ya ka dihlopha, le latele seo se ngwadilwego ke Dafida kgoši ya Isiraele le seo se ngwadilwego ke morwa wa gagwe Solomone.
5 Le swanetše go ema lefelong le lekgethwa go ya ka dihlopha tšeo le lego go tšona. Le swanetše go ema ka tsela yeo lapa le lengwe le le lengwe le tlago go ba le sehlopha sa lapa la Balefi seo se ba hlankelago.
6 Le hlabe diphoofolo tša go dira sehlabelo sa Paseka, le ikgethagatše le be le lokišeletše banababo lena gore ba dire seo Jehofa a se boletšego a diriša Moshe.”
7 Josia o ile a neela ka diruiwa gore batho bao ba bego ba le gona ba di diriše ge ba dira dihlabelo tša Paseka. E be e le dikwana tše tona le diputšane tše tona tše 30 000 (dikete tše masometharo) gotee le dikgomo tše 3 000 (dikete tše tharo). Tše ka moka di be di etšwa diruiweng tša kgoši.
8 Baetapele ba gagwe bao a ba kgethilego, ba ile ba ntšhetša setšhaba, baperisita le Balefi moneelo ka go ithatela. Hilikia, Sakaria le Jehiele, e lego baetapele ba ntlong ya Modimo wa nnete, ba ile ba fa baperisita diphoofolo tša go dira dihlabelo tša Paseka tše 2 600 (dikete tše pedi-makgolo a tshelelago) le dikgomo tše 300 (makgolo a mararo).
9 Konania le banababo e lego Shemaya le Nethanele gotee le Hashabia, Jeiele le Josabadi, e lego baetapele ba Balefi, ba ile ba ntšhetša Balefi moneelo wa diphoofolo tše 5 000 (dikete tše hlano) tša go dira dihlabelo tša Paseka le dikgomo tše 500 (makgolo a mahlano).
10 Ba ile ba fetša go lokišetša monyanya gomme baperisita ba ema mafelong ao ba tlwaetšego go ema go ona ke moka Balefi ba ema go ya ka dihlopha tša bona go ya kamoo kgoši e bego e laetše ka gona.
11 Ba hlaba diphoofolo tša go dira dihlabelo tša paseka gomme baperisita ba tšea madi ao ba a filwego ke Balefi ba a gaša aletareng, mola Balefi bona ba be ba bua diphoofolo.
12 Ka morago, ba lokišetša dibego tša go fišwa gore ba di fe batho ka moka bao ba bego ba beakantšwe go ya ka malapa a borakgolokhukhu ba bona, e le gore batho bao ba di neele Jehofa go ya le kamoo go bego go ngwadilwe ka gona pukung ya Moshe. Le gona ba ile ba dira se se swanago le ka dikgomo.
13 Ba ile ba apea* dibego tša Paseka mollong go ya le kamoo ba bego ba tlwaetše go dira ka gona gomme ba apea dibego tše kgethwa ka dipitšeng tše dikgolo, dipitšeng tše dinyenyane le ka dipaneng. Ka morago ba di išetša batho ka moka kapelapela.
14 Ke moka, ba lokišeletša bona le baperisita dibego, ka gobane baperisita bao e lego ditlogolo tša Arone ba be ba neela dihlabelo tša go fišwa le dikarolwana tša makhura go fihlela e eba bošego. Ka gona Balefi ba lokišetša bona le baperisita bao e lego ditlogolo tša Arone.
15 Barwa ba Asafa bao e bego e le diopedi, ba be ba le mošomong wa bona go ya le kamoo ba bego ba laetšwe ke Dafida, Asafa, Hemane le Jeduthune yoo a bego a kgona go bona dipono tša kgoši. Ka gona batho bao ba bego ba leta dikeiti ba be ba le dikeiting tša go fapafapana. Go be go sa hlokege gore ba tlogele mošomo wa bona, ka gobane banababo bona ba Balefi ba be ba ba lokišeleditše dijo tša Paseka.
16 Letšatšing leo, ba ile ba fetša go lokišetša dilo ka moka tšeo Jehofa a bego a nyaka gore ba di dire gore ba kgone go keteka Paseka le gore ba kgone go neela dibego tša go fišwa aletareng ya Jehofa go ya le kamoo Kgoši Josia a bego a laetše.
17 Baisiraele bao ba bego ba le moo ba ile ba keteka Paseka ka nako yeo, ba ba ba keteka Monyanya wa Dinkgwa tše di sa Omelwago ka matšatši a šupago.
18 Go tloga mehleng ya moporofeta Samuele, go be go sa ka gwa ketekwa Paseka ya go swana le ye Isiraeleng ebile ga go na kgoši le e tee ya Isiraele yeo e ilego ya dira Paseka ya go swana le yeo e bego e dirilwe ke Josia, baperisita, Balefi le batho ka moka ba Juda le ba Isiraele bao ba bego ba le moo gotee le batho bao ba bego ba le Jerusalema.
19 Paseka yeo e ile ya ketekwa ka ngwaga wa bo-18 wa ge Josia a buša.
20 Ka morago ga dilo tše ka moka, ge Josia a be a feditše go tsošološa tempele, Kgoši Neko wa Egepeta o ile a tla ntweng kua Karakemishi kgauswi le Eforate. Ke moka Josia o ile a ya go lwa le yena.
21 Ka gona, Neko a romela molaetša go Josia a re: “Wena kgoši ya Juda, ke ka baka la eng o tlile go lwa le nna? Nna ga se ka tlela go lwa le wena lehono, eupša ke tletše go lwa le setšhaba se sengwe. Le gona Modimo o re ke dire kapelapela. Bjale e le gore o se ke wa tšhelwa ke madi a kgofa, o se ke wa lwantšha Modimo yo a nago le nna, ka gobane o tlo go fediša.”
22 Eupša Josia a se gome. Go e na le moo, o ile a apara diaparo tše dingwe e le gore batho ba se mo tsebe gomme a ya go lwa le yena. Le gona Josia o be a sa nyake go kwa seo Neko a se boletšego, e lego mantšu ao a bego a etšwa go Modimo. Ka gona a tla go lwa le yena Molaleng wa Megido.
23 Ka gona, babetši ba mesebe ba ile ba thuntšha Kgoši Josia, ke moka a botša bahlanka ba gagwe a re: “Ntlošeng mo ka gobane ke gobetše kudu.”
24 Ka gona bahlanka ba gagwe ba ile ba mo fološa ka kariking ya gagwe ya ntwa gomme ba mo nametša ka kariking ya gagwe ya bobedi ya ntwa ke moka ba mo tliša Jerusalema. Ka gona a hlokofala gomme a bolokwa mabitleng a borakgolokhukhu ba gagwe. Ke moka batho ka moka ba Juda le ba Jerusalema ba llela Josia.
25 Ka gona Jeremia a opelela Josia koša ya sello. Le gona diopedi ka moka tša banna le tša basadi di tšwela pele di opela ka Josia dikošeng tša tšona tša sello go ba go fihla le lehono. Go ile gwa dirwa phetho ya gore di opelwe Isiraeleng le gona di ngwadilwe gare ga dikoša tša sello.
26 Ditaba ka moka tša Josia le dilo ka moka tšeo a di dirilego go bontšha gore o na le botho,* ka go dira seo se ngwadilwego Molaong wa Jehofa,
27 le dilo tšeo a di dirilego go tloga mathomong go fihla mafelelong, di ngwadilwe ka Pukung ya Dikgoši tša Isiraele le tša Juda.
