Lengwalo la Bobedi la Johane 1:1-13
1 Nna mokgalabje, ke ngwalela wena kgarebe yeo e kgethilwego ke Modimo, e bile ke ngwalela le bana ba gago bao ke ba ratago kudu. Le gona bana bao ga ba ratwe ke nna ke nnoši, eupša ba ratwa le ke batho ka moka bao ba tsebago nnete,
2 ka baka la nnete yeo e dulago e le ka dipelong tša rena gomme e tlago go dula e le moo go ya go ile.
3 Modimo yo e lego Tatago rena wa legodimong le Morwa wa gagwe Jesu Kriste, ba tla re nea botho, kgaugelo le khutšo yeo e tšwago go Modimo, e bile ba tla re rata gomme ba re ruta nnete.
4 Ke thaba kudu ka gobane ke tsebile gore ba bangwe ba bana ba gago ba sepela tseleng ya nnete, go etša ge Tatago rena a re laetše gore re dire bjalo.
5 Bjale wena kgarebe, ke go ngwalela lengwalo le go go kgopela gore re ratane. Ye ga se taelo e mpsha, eupša ke yeo re bilego le yona go tloga ge re be re thoma go ithuta ka Kriste.
6 Ge e ba re na le lerato re tla tšwela pele re phela ka melao ya gagwe. Taelo yeo le e kwelego go tloga mathomong ke ya gore le dule le bontšha lerato.
7 Le itlhokomele ka gobane go na le batho ba bantši bao ba tšweletšego lefaseng bao ba forago batho, e lego batho bao ba sa dumelego gore Jesu Kriste o ile a tla e le motho. Batho bao ba fora batho e bile ba lwa le Kriste.
8 Itlhokomeleng gore le se ke la loba dilo tšeo re di šometšego ka thata, ge le ka dira bjalo le tla hwetša ditšhegofatšo ka moka tšeo Modimo a le lokišeleditšego tšona.
9 Motho yo a sa latelego dithuto tša Kriste, e bile a rutago dilo tšeo di sa dumelelanego le tšona, Modimo ga a mo amogele. Eupša yo a tšwelago pele a latela dithuto tša Kriste, o amogelwa ke Tate le Morwa.
10 Ge e ba motho a etla go lena gomme a sa tliše thuto ye, le se ke la mo amogela magaeng a lena goba la mo dumediša.
11 Ka gobane yo a mo dumedišago o thekga mediro ya gagwe e mebe.
12 Le ge ke na le dilo tše dintši tšeo nka le ngwalelago tšona, ga ke nyake go dira bjalo ka pampiri le enke, eupša ke holofela go tla go lena gomme ke bolele le lena re lebantše difahlego gore le thabe kudu.
13 Bana ba sesi wa gago yo a kgethilwego ba a go dumediša.
