Dillo tša Jeremia 1:1-22
א [ʼAʹleph]
1 Motse wa Jerusalema woo o bego o tletše batho, gona bjale o dutše o nnoši!
Wona motse woo o bego o na le badudi ba bantšhi gare ga ditšhaba, gona bjale o swana le mohlologadi!
Bona kamoo motse wo woo o bego o tumile gare ga diprofense o fetogilego lekgoba ka gona!
ב [Beth]
2 Bošego o lla gabohloko, megokgo e elela marameng a gagwe.
Baratiwa ba gagwe ka moka ba mo tšhabetše, ga go yo a mo homotšago.
Bagwera ba gagwe ka moka ba mo radiile. Ba fetogile manaba a gagwe.
ג [Gimel]
3 Juda o ile bothopša gomme o a hlakišwa, e bile o šomišwa gabohloko.
O swanetše go dula gare ga ditšhaba, eupša ga a hwetše lefelo leo a ka iketlago go lona.
Manaba* a gagwe ka moka a mo hweditše letšatšing leo a bego a le tlalelong.
ד [Daleth]
4 Ditsela tša go ya Tsione di a lla ka gobane ga go na bao ba tlago monyanyeng.
Dikeiti tša gagwe ka moka di robegile, baperesita ba gagwe ba kwa bohloko.
Dikgarebe tša gagwe di a lla gomme yena o kwele bohloko kudu.
ה [He]
5 Ga bjale o laolwa ke manaba a gagwe. E bile manaba ao ga a na taba.
Ka gobane Jehofa o dirile gore a kwe bohloko ka baka la dibe tša gagwe tše dintšhi.
Lenaba le išitše bana ba gagwe bothopša.
ו [Waw]
6 Bobotse ka moka bja morwedi wa Tsione ga bo sa le gona go yena.
Dikgošana tša gagwe di swana le dikgama* tšeo di se nago mafulo,Gomme di sepela di se na matla pele ga batho bao ba di tlaišago.
ז [Zayin]
7 Mehleng ya ge Jerusalema e hlakišwa e bile e se na legae,E ile ya gopola dilo tša yona tše dibotse tšeo e bego e na le tšona kgale.
Ge batho ba yona ba be ba hlaselwa ke manaba e bile go se na motho yo a ka e thušago,Manaba a yona a ile a e bona gomme a e sega ka ge e wele.
ח [Heth]
8 Jerusalema o dirile sebe se segolo.
Ke ka baka leo a fetogilego selo seo se šišimišago.
Batho ka moka bao ba bego ba mo hlompha ga bjale ba a mo nyatša, ka gobane ba mmonetše.
O kwa bohloko e bile o a ba furalela ka ge a lewa ke dihlong.
ט [Teth]
9 Go se hlweke ga gagwe go kgomaretše diaparo tša gagwe.
Ga se a ka a nagana ka bokamoso bja gagwe.
O wetše fase ka tsela e makatšago. Ga a na motho yo a ka mo homotšago.
O re: “Hle Jehofa, bona mohlako wa ka, ka gobane lenaba le a ikgantšha.”
י [Yod]
10 Lenaba le tšere mahumo a gagwe ka moka.
Ka gobane Jerusalema o bone ditšhaba di tsena ka tempeleng ya gagwe,Le ge wena o be o di laetše gore di se ke tša bokana gotee le batho ba gago.
כ [Kaph]
11 Batho ba gagwe ka moka ba a lla, ba nyakana le dijo.
Ba fane ka dilo tša bona tše bohlokwa gore ba hwetše dijo, e le gore ba kgone go tšwela pele ba phela.
Lebelela hle Jehofa, gomme o bone gore ke swana le mosadi yo a hlokago mohola.
ל [Lamed]
12 Lena ka moka bao le fetago ka tsela, na dilo tše ga se selo mo go lena?
Lebelelang gomme le bone.
Na go na le bohloko bja go swana le bjo ke otlilwego ka bjona,Bjoo Jehofa a mpaketšego bjona ge a be a galefile?
מ [Mem]
13 O rometše mollo gore o fiše marapo a ka ka moka, a le kua godimo.
O lahletše nete ya go rea dihlapi maotong a ka. O mpušeditše morago.
O ntirile gore ke swane le mosadi yo a dulago a nnoši.
Ke hlwa ke lwala letšatši ka moka.
נ [Nun]
14 Dibe tša ka di bofeletšwe molaleng wa ka bjalo ka joko. O di bofile ka letsogo la gagwe.
Di bofeletšwe molaleng wa ka, gomme matla a ka a fedile.
Jehofa o dirile gore batho bao ba mphetago ka matla ba mphenye.
ס [Saʹmekh]
15 Jehofa o nkamogile banna ka moka ba dinatla bao ke bego ke na le bona gomme a ba lahlela kgole.
O mpileditše batho gore ba tle ba pšhatlaganye masogana a ka.
Jehofa o gataketše kgarebe yeo e lego morwedi wa Juda segatelong sa beine.
ע [Ayin]
16 Ke lla ka baka la dilo tše. Mahlo a ka a ela megokgo.
Ka gobane mo kgauswi le nna ga go na motho yo a ka nkhomotšago goba go ntapološa.
Barwa ba ka ga ba sa na kholofelo, ka gobane lenaba le re fentše.
פ [Pe]
17 Tsione e phurulotše diatla tša yona e kgopela thušo. Eupša ga go na yo a e homotšago.
Jehofa o laetše gore batho ka moka bao ba lego kgauswi le Jakobo e be manaba a gagwe.
Jerusalema e fetogile selo seo se šišimišago gare ga bona.
צ [Tsade]
18 Jehofa o lokile, ke nna ke tshetšego melao ya gagwe.
Theetšang lena batho ka moka, gomme le bone gore ke kwa bohloko.
Dikgarebe tša ka le masogana a ka a ile bothopša.
ק [Qoph]
19 Ke biditše baratiwa ba ka, eupša bona ba nthadiile.
Baperesita ba ka le banna ba ka ba bagolo ba hwileGe ba be ba eya go inyakela dijo gore ba kgone go tšwela pele ba phela.
ר [Resh]
20 Jehofa, bona gore ke mathateng a magolo,
E bile ke longwa ke mala.
Pelo ya ka e kwa bohloko, ka gobane ke tshetše melao ya gago.
Ka kua ntle bana ba ka ba bolailwe ke tšhoša, le ka mo ntlong batho ba a hwa.
ש [Shin]
21 Batho ba nkwele ge ke lla, eupša ga go na yo a nkhomotšago.
Manaba a ka ka moka a kwele ka dilo tšeo di nkwetšego.
A thabile, ka gobane ke wena o mpaketšego tšona.
Eupša letšatši la gore o ba dire seo o tshepišitšego gore o tlo ba dira sona, le tla fihla. Letšatšing leo ba tla swana le nna.
ת [Taw]
22 Eka o ka bona bobe bja bona ka moka, gomme o ba otle o šoro,Go etša ge o kile wa nkotla gabohloko ka baka la dibe tša ka ka moka.
Ka gona ke nyamile kudu, e bile pelo ya ka e bohloko.
Mengwalo ya tlase
^ Goba, “Bao ba mo tlaišago.”
^ Kgama ke phoofolo yeo e nyakilego e swana le phala.
