Dillo tša Jeremia 3:1-66
-
Jeremia o bolela kamoo a ikwago ka gona le ka dilo tšeo a di holofetšego
א [Aleph]
3 Nna ke monna yo a hlakišitšwego ka gobane Modimo o galefile kudu gomme a re otla.
2 O nthakile gomme a ntshepediša leswiswing e sego seetšeng.
3 O lwa le nna letšatši ka moka.
ב [Beth]
4 O dirile gore mmele wa ka o fele matla le gore letlalo la ka le gagoge,A ba a roba le marapo a ka.
5 O agile leboto la go ntikologa a ntikanetša ka dimela tša mpholo le ka ditlaišego.
6 O nkgapeleditše go dula mafelong a leswiswi go etša batho bao ba hwilego kgale.
ג [Gimel]
7 O nthibetše ka leboto gore ke se tšhabe.A ntlema ka diketane tše boima tša koporo.
8 Le gona, ge ke llela gore a nthuše ga a theetše thapelo ya ka.
9 O thibile ditsela tša ka ka maswika ao a betlilwego,A dira gore ditsela tša ka di se sepelege.
ד [Daleth]
10 O ntalela ditseleng go etša bere le go etša tau yeo e nyakago go ntlhasela.
11 O nkgapeleditše go tšwa ditseleng tša ka gomme a rathaganya ditho tša ka,A ntira gore ke šale ke le lešope.
12 O ngangile bora bja gagwe gomme a ntebantšha ka mosebe.
ה [He]
13 O hlabile dipshio tša ka ka mesebe yeo e tšwago mokotleng wa gagwe.
14 Ke segwa ke batho ka moka, ke hlwa ke le kopelo ya bona letšatši ka moka.
15 O ntirile gore ke je dijo tše di galakago gomme a nnweša lengana.*
ו [Waw]
16 O robile meno a ka ka lekgwara,A nkgoromeletša meloreng.
17 O nkamogile khutšo, ka ba ka lebala gore botse ke eng.
18 Ke ka baka leo ke rego: “Letago la ka le fedile e bile ga go seo ke se letetšego go tšwa go Jehofa.”
ז [Zayin]
19 Gopola mohlako wa ka le gore ga ke na legae. Gopola gore ke nwa lengana le go ja dimela tša mpholo.
20 Ka nnete o tla nkgopola gomme wa tla wa nthuša.
21 Ke tla dula ke gopola seo gomme ka go letela ke sa fele pelo.
ח [Heth]
22 Jehofa ga se a re fediša,Ka gobane kgaugelo* ya gagwe ga e fele.
23 O re bontšha kgaugelo ya gagwe mesong e mengwe le e mengwe. Ka mehla o phetha seo a se holofeditšego.
24 Ke itše: “Jehofa ke bohwa bja ka, ke ka baka leo ke tla mo letelago ke sa fele pelo.”
ט [Teth]
25 Jehofa o lokile go motho yo a mo tshepago le go yo a dulago a mo tsoma.
26 Go kaone gore motho a ikhomolele gomme a letele gore Jehofa a mo phološe.
27 Go kaone gore motho a lebane le mathata e sa le yo moswa.
י [Yod]
28 A a dule a nnoši gomme a ikhomolele ge Modimo a mo rweša morwalo.
29 A a iname a ikokobetše, a tsenye sefahlego sa gagwe mmung. Mohlomongwe a ka phološwa.
30 A a batametše lerama la gagwe gore ba mmethe. A a lewe ke dihlong.
כ [Kaph]
31 Jehofa a ka se re lahlele sa ruri.
32 Le ge a re kwešitše bohloko, o tla re gaugela ka baka la lerato la gagwe le le botegago.
33 Ka gobane ga a kgahlwe ke go hlakiša goba go kweša bana ba batho bohloko.
ל [Lamed]
34 Go gatakelwa ga bagolegwa ka moka ba lefase,
35 Go se sware motho ka toka pele ga yo Godimodimo
36 Le go hlalefetša motho molatong wa gagwe,Ka moka ga tšona Jehofa ga a di rate.
מ [Mem]
37 Ke mang yo a ka bolelago selo gomme sa direga mola Jehofa yena a sa nyake gore selo seo se direge?
38 Na yo Godimodimo a ka bolela dilo tše mpeA buša a bolela tše dibotse?
39 Ke ka baka la’ng motho a swanetše go belaela ka ditlamorago tša sebe sa gagwe?
נ [Nun]
40 Anke re hlahlobeng boitshwaro bja rena gomme re boeleng go Jehofa.
41 A re kgopeleng Modimo wa magodimong ka dipelo ka moka re emišetšeng matsogo a rena go yena, re re:
42 “Re sentše ra ba ra tlogela ditsela tša gago gomme wena ga se wa re lebalela.
ס [Samekh]
43 O re galefetše gomme wa se kwe dithapelo tša rena.O re kitimišitše gomme wa re bolaya o sa re kwele bohloko.
44 O re thibetše ka leru gore o se ke wa re kwa ge re go rapela.
45 O dirile gore batho ba ditšhaba ba re lebelele re le bjalo ka maudi le ditšhila.”
פ [Pe]
46 Manaba a rena ka moka a bolela gampe ka rena.
47 Re phela re tšhogile e bile re a tlaišega, re senyegile e bile re bjalo ka lešope.
48 Mahlo a ka a ela megokgo bjalo ka ge eka ke noka ka gobane morwedi wa batho ba gešo o sentšwe.
ע [Ayin]
49 Ke lla ke sa kgaotše e bile nka se homole,
50 Go fihla Jehofa a lebelela a le legodimong gomme a bona kamoo batho ba gagwe ba tlaišegago ka gona.
51 Ke kwele bohloko o šoro ka baka la seo ke se bonego se diragalela metse ka moka yeo e lego kgauswi le motse wa gešo.
צ [Tsade]
52 Manaba a ka a ntsomile bjalo ka ge eka a tsoma nonyana gaešita le ge a se na lebaka la gore a ntlhoye.
53 A ntahletše ka gare ga molete e le gore a mpolaye. Le gona a ile a dulela go mphoša ka maswika.
54 Meetse a nkhupeditše hlogo gomme ka re: “Go fedile ka nna!”
ק [Qoph]
55 Wena Jehofa, ke biditše leina la gago ke le tlasetlase moleteng.
56 Ekwa lentšu la ka. Ge ke go llela gore o nthuše o se ke wa mphuralela.
57 O ile wa mpatamela letšatšing la ge ke go bitša gomme wa re: “O se ke wa boifa.”
ר [Resh]
58 Wena Jehofa, o ntwetše kgorong ya tsheko, o phološitše bophelo bja ka.
59 Wena Jehofa, o bone bobe bjo ke bo dirilwego. Ke kgopela o nkahlole ka toka.
60 O bone ge ba itefeletša go nna, wa ba wa bona le ge ba ntogela maanomabe.
ש [Sin] goba [Shin]
61 Wena Jehofa, o kwele ge ba nkwera wa ba wa bona le ge ba ntogela maanomabe.
62 O kwele ge baganetši ba ka ba bolela ka nna letšatši ka moka e bile ba seba ka nna.
63 Hle lebelela dilo ka moka tšeo ba di dirago. Ba nkwera le ka dikoša tša bona.
ת [Taw]
64 Wena Jehofa, o tla ba lefetša go ya ka mediro ya bona.
65 O tla ba rogaka ka go ba dira gore dipelo tša bona e be tše thata.
66 Wena Jehofa o tla ba kitimiša o galefile gomme wa ba fediša ka tlase ga magodimo a gago.
