Dillo tša Jeremia 4:1-22
א [Aleph]
4 Gauta yeo e phadimago ga e sa phadima, yona gauta e botse kudu!
Maswika a makgethwa a gašantšwe magahlanong ka moka a ditsela!
ב [Beth]
2 Ge e le badudi ba ba rategago ba Tsione, e lego bao ba kilego ba ba bohlokwa bjalo ka gauta e sekišitšwego,Ba be ba tšewa bjalo ka dibjana tša letsopa,Tšeo di dirwago ke motho yo a šomago ka letsopa!
ג [Giʹmel]
3 Gaešita le diphukubje di fepa bana ba tšona.Eupša morwedi wa batho ba gešo o sehlogo go swana le dimpšhe tša lešokeng.
ד [Daleth]
4 Leleme la lesea leo le sa anyago letswele le kgomaretše magalagapeng a lona ka baka la lenyora.
Bana ba kgopela dijo, eupša ga go na yo a ba fago tšona.
ה [He]
5 Bao ba bego ba eja dijo tše dibose ba bolawa ke tlala diterateng.
Bao ba godišitšwego ba apara diaparo tša go tura ba rapaletše mebotong ya melora.
ו [Waw]
6 Kotlo ya morwedi wa batho ba gešo ke e kgolo go feta kotlo* ya Sodoma,Yeo e ilego ya fedišwa ka pelapela go se yoo a ka e thušago.
ז [Zayin]
7 Banasari* ba gagwe ba be ba sekile go feta lehlwa, ba šweufetše go feta maswi.
Letlalo la bona le be le hwibitše go swana le maswika a bohlokwa a ka lewatleng. Ba be ba swana le maswika a phadimišitšwego a safire.
ח [Heth]
8 Ba ntshofetše go swana le mošidi. Ga ba tsebje diterateng.Letlalo la bona le kgomaretše marapong a bona,
Le omile go etša kota.
ט [Teth]
9 Bao ba bolailwego ka tšhoša ba kaone go phala bao ba hwilego ka baka la tlala,Ka gobane bona ba felelwa ke matla ka baka la go hloka dijo, gwa ba bjalo ka ge eka ba hlabilwe.
י [Yod]
10 Basadi bao peleng ba bego ba na le lešoko ba apeile bana ba bona,
Bana bao ba fetogile dijo tša bona tša go ba homotša nakong ya go senywa ga morwedi wa batho ba gešo.
כ [Kaph]
11 Jehofa o bontšhitše gore o galefile kudu.O tšholotše bogale bja gagwe bjo bo fišago.
O thomile mollo kua Tsione wa tšhuma le metheo ya yona.
ל [Lamed]
12 Dikgoši tša lefase le batho bao ba dulago mafelong ao a nago le mmu o nonnego ba be ba sa tshepeGore lenaba le ka tsena dikeiting tša Jerusalema.
מ [Mem]
13 Se se diregile ka gobane baporofeta ba na le dibe gomme baperesita ba dirile diphošo,Ka go bolaya batho bao ba se nago molato kua Jerusalema.
נ [Nun]
14 Ba be ba sepela diterateng bjalo ka difofu.
Ba šilafaditšwe ke madi,E le gore go se be le yo a kgwathago diaparo tša bona.
ס [Samekh]
15 Batho ba ba goeletša ba re: “Tlogang mo! Le šilafetše! Tlogang mo! Tlogang mo! Le se ke la re kgwatha!”
Ka gobane ba be ba itshepelela ba se na magae.
Batho ba ditšhaba ba itše: “Ba ka se dule le rena mo.
פ [Pe]
16 Jehofa o ba phatlaladitše.A ka se sa ba amogela.
Batho ba ka se sa hlompha baperesita le batšofadi.”
ע [Ayin]
17 Mahlo a rena a lapišitšwe ke go tsomana le thušo re sa e hwetše.
Ke kgale re nyakana le thušo setšhabeng seo se ka se re phološego.
צ [Tsade]
18 Manaba a rena a re tsomile mo gohle moo re bego re palelwa ke go sepela diterateng.
Matšatši a rena a bophelo a kgauswi le go fela. Re kgauswi le go fela ka gobane re kgauswi le go hwa.
ק [Qoph]
19 Bao ba bego ba re kitimiša ba be ba na le lebelo la go feta la dintšhu tšeo di fofago lefaufaung.
Ba be ba re rakediša dithabeng, gomme ba re laletše lešokeng.
ר [Resh]
20 Motlotšwa wa Jehofa, yoo re bego re phela ka yena, o thopilwe moleteng wa bona o mogolo.Yena yo re boletšego ka yena ra re: “O tla re šireletša gore re phele gare ga ditšhaba.”
ש [Sin]
21 Thaba wena morwedi wa Edomo yo a dulago nageng ya Utsi.
Eupša le wena o tla tlaišega. O tla tagwa gomme wa šala o hloboletše.
ת [Taw]
22 Wena morwedi wa Tsione, molato wa gago o fedile.
Ga go na motho yo a tlago go go iša bothopša gape.
Modimo o bone molato wa gago, wena morwedi wa Edomo.
O bipolotše dibe tša gago.
