Dillo tša Jeremia 5:1-22
5 Wena Jehofa, gopola seo se re diragaletšego.
Lebelela gomme o bone ge re nyatšwa.
2 Bohwa bja rena bo filwe bašele gomme dintlo tša rena tša fiwa batho bao e sego Baisiraele.
3 Re fetogile ditšhiwana tšeo di se nago tate. Bommago rena ba bjalo ka bahlologadi.
4 Re swanetše go reka meetse a go nwa le dikgong.
5 Bao ba re kitimišago ba kgauswi le go re swara.Re lapile eupša ga ba re khutšiše.
6 Re be re ithekgile ka Egepeta le Asiria gore re hwetše dijo tšeo di lekanego.
7 Borakgolokhukhu ba rena bao ba dirilego sebe ba hlokofetše, eupša rena re rwele melato ya bona.
8 Gona bjale re bušwa ke bahlanka e bile ga go yo a re namolelago diatleng tša bona.
9 Re bea maphelo a rena kotsing gore re hwetše dijo ka baka la bao ba swerego ditšhoša lešokeng.
10 Matlalo a rena a fiša go swana le mollo ka baka la go swarwa ke tlala kudu.
11 Ba katile basadi ba rena bao ba lego kua Tsione le dikgarebe tšeo di lego metseng ya Juda.
12 Baetapele ba fegilwe ka diatla tša bona, gomme banna ba bagolo ga ba hlomphiwe.
13 Masogana a šila lwaleng gomme bašemanyana ba kgopilwe ba rwele dikgong tša go imela.
14 Banna ba bagolo ga ba sa dula kgorong gomme masogana ga a sa letša mmino wa ona.
15 Lethabo la rena le fedile. Go e na le gore re bine, re a lla.
16 Mphapahlogo wa rena o wele. Re ba madimabe ka gobane re dirile sebe!
17 Ke ka baka leo dipelo tša rena di lego bohlokoE bile mahlo a rena a se sa bonago gabotse.
18 Ka ge thaba ya Tsione e le lešope, diphukubje di sepelasepela go yona.
19 Ge e le wena Jehofa, o tla dula sedulong sa gago sa bogoši go ya go ile.
Bogoši bja gago ke bja go ya go ile.
20 Ke ka baka la’ng o re lebetše sa ruri, e bile o re tlogetše ka nako e telele?
21 Wena Jehofa, re bušetše go wena gomme re tla boa ntle le go senya nako.
Dira gore re ipshine go swana le kgale.
22 O re lahletše sa ruri
E bile o re galefetše kudu.
