Amose 3:1-15
3 “Ekwang seo nna Jehofa ke se boletšego mabapi le lena Baisiraele, e lego seo se lego mabapi le lapa ka moka leo ke le ntšhitšego nageng ya Egepeta. Ke re:
2 ‘Le ge go na le ditšhaba tše dintšhi mo lefaseng, ke kgethile lena feela gore le be batho ba ka.
Ke ka baka leo ke tlago go le sekiša ka baka la melato ya lena ka moka.
3 Na batho ba babedi ba ka sepela mmogo ba se ba dumelelana?
4 Na tau e ka rora sethokgweng go se na phoofolo yeo e nyakago go e bolaya?
Na tawana e ka rora e le ka moleteng wa yona e se ya swara selo?
5 Na nonyana e ka tanywa ge e ba go se na motho yo a e beetšego moreo?
Na moreo o ka tswalela ge e ba o se wa tanya selo?
6 Ge e ba lenaka le letšwa mo motseng, na batho ba ka se thothomele ka baka la letšhogo?
Ge e ba go e ba le masetlapelo motseng, na ga se Jehofa a dirilego se?
7 Mmuši Morena Jehofa a ka se dire seloKa ntle le ge a boditše bahlanka ba gagwe ba baporofeta seo a nyakago go se dira.*
8 Tau e rorile! Ke mang yo a ka se tšhogego?
Mmuši Morena Jehofa o boletše! Ke mang yo a ka se porofetego?’
9 “‘Tsebatšang mošate wa AshidodoLe mošate wa Egepeta,
Le re: “Kgobokanang dithabeng tša Samaria,Le boneng tlhakatlhakanoLe boradia bjo bo tletšego moo.
10 Le gona ga ba tsebe go dira dilo tše di lokilego.” Ke nna Jehofa ke bolelago se.“Mešate ya bona ba e tladitše ka dilo tšeo ba di hweditšego ge ba be ba dira bošoro.”’
11 Ka gona Mmuši Morena Jehofa o re:‘Lenaba le tla dikanetša naga,Gomme le tla le fetša matla.Dilo ka moka tšeo le di kgobokeditšego ka mešate ya lena di tla tšewa.’
12 Jehofa o re:‘Go swana le ge modiši a ubula maoto a mabedi a phoofolo goba karolwana ya tsebe ya nku molomong wa tau,Le Baisiraele bao ba dutšego mepeteng ya manobonobo le disofeng tše dibotsebotse kua Samaria,Le bona ba tla ubulwa ka yona tsela yeo.’
13 Mmuši Morena Jehofa, yena Modimo wa madira o re: ‘Ekwang le be le lemošeng ba ntlo ya Jakobo.’
14 ‘Mohlang ke sekiša Baisiraele ka ge ba ntlhanogetše,Ke tlo fediša le dialetare tša Bethele.Ke tla ripa manaka a aletare gore a wele fase.
15 Ke tla phušola dintlo tša marega le tša selemo.’
‘Dintlo tšeo di dirilwego ka lenaka la tlou di tla senyega, le dintlo tše dikgolo di tla fedišwa.’Ke nna Jehofa ke bolelago se.”
Mengwalo ya tlase
^ Goba “sephiri sa gagwe.”
