Amose 8:1-14
8 Go na le seo Mmuši Morena Jehofa a mpontšhitšego sona ponong. Ke bone manki woo o nago le dienywa tša selemo.
2 Ke moka a re: “Amose o bona’ng?” Nna ka re: “Ke bona manki wo o nago le dienywa tša selemo.” Jehofa a re: “Letšatši la gore batho ba ka ba Isiraele ba otlwe le fihlile. Le ka mohla nka se sa ba lebalela.
3 ‘Letšatšing leo dikoša tša tempeleng e tla ba tša dillo tšeo di kwešago bohloko. Go tlo ba le ditopo tše dintšhi tšeo di lahlelwago gohle, gomme gwa re tuu!’ Ke nna Mmuši Morena Jehofa ke bolelago se.
4 “Ekwang se lena bao le gatelelago badiidi,Le lena bao le fedišago batho bao ba ikokobeditšego nageng.
5 Lena bao le rego: ‘Monyanya wa ge go tšwelela ngwedi o moswa o tlo fela neng gore re yo rekiša mabele?Sabatha yona e tlo fela neng gore re tle re kalele batho mabele a manyenyane?
Gore re a turiše ge re a rekiša,Le gona re diriše dikala tša maaka,Gore re rope bao ba rekago,
6 E le gore re reke motho wa maemo a tlasana ka tšhelete ya siliferaGomme re reke modiidi ka tšhelete ya go reka dieta,Le gore re rekiše mabele a se nago mohola.’
7 Jehofa, yena Letago la Jakobo o enne ka leina la gagwe a re:‘Le ka mohla nka se lebale mediro ya bona ka moka.
8 Ka baka leo naga e tla šikinyega,Gomme batho ka moka bao ba dulago go yona ba lla.
Le gona go tlo ba le diphetogo tše dikgolo nageng,Go swana le ge meetse a Noka ya Nile a phophoma a eya godimo le fase e bile a fokotšega.’
9 Mmuši Morena Jehofa o re:‘Letšatšing leo ke tla dira gore letšatši le sobele mosegare,E bile ke tla dira gore nageng go be le leswiswi mosegare.
10 Menyanya ya lena ke tla e fetoša ya ba ya sello,Gomme dikoša tša lena ka moka ya ba tša sello.
Matheka a lena ke tla a apeša mašela ao batho ba a aparago ge ba nyamile, gomme ka kota dihlogo tša lena ka moka.Ke tla dira gore letšatši leo le be bjalo ka la ge motho a llela morwa wa gagwe a nnoši yo a hlokofetšego.Ge letšatši leo le fela go tla be go se bose.’
11 “Mmuši Morena Jehofa o re, ‘Tsebang gore go tla matšatši ao ka onaKe tla dirago gore go be le tlala le lenyora nageng,Tlala yeo e ka se be ya dijo, le lenyora leo e ka se be la go nyorelwa meetse,Eupša e tla ba tša go nyaka go kwa lentšu la Jehofa.
12 Batho ba tla thekesela go tloga lewatleng le lengwe go ya go le lengwe,Le go tloga leboa go ya bohlabatšatši.
Ba tla ya godimo le fase ba nyaka lentšu la Jehofa, eupša ba ka se le hwetše.
13 Letšatšing leo dikgarebe tše dibotse le masoganaBa tla idibala ka baka la lenyora.
14 Ba tla ena ka molato wa Samaria, ba re:“Re ena ka modimo wa gago yo a phelago wena Dani!”
E bile ba re: “Re ena ka tsela ya Beresheba!”
Ba tlo wa e bile ba ka se tsoge gape.’”
