Amose 9:1-15
9 Ka bona Jehofa a eme ka godimo ga aletare a re: “Itia dihlogwana tša diphilara gore ntlo e šikinyege. O kgaole dihlogwana tša tšona, gomme batho bao ba šetšego ke tla ba bolaya ka tšhoša. Ga go le o tee wa bona yo a tlago go tšhaba goba go phologa.
2 Le ge ba ka ikepela mabitleng,Seatla sa ka se tlo ba ntšha moo.Le ge ba ka rotogela magodimong,Ke tla ba fološa moo.
3 Le ge ba ka ikuta ntlheng ya thaba ya Karamele,Ke tla ba nyaka moo gomme ka ba swara.
Le ge ba ka ikuta fasefase lewatleng,Ke tla laela noga gore e ba lome.
4 Le ge manaba a bona a ka ba iša bothopša,Ke tla botša batho gore ba ba bolaye ka tšhoša.Ke tla nyaka ditsela tša go ba dira dilo tše mpe, e sego tše dibotse.
5 Mmuši Morena Jehofa wa madira ke yena a kgwathago naga gomme ya šikinyega.Badudi ba yona ka moka ba tlo lla.Go tlo ba le diphetogo tše dikgolo mo nageng,Go swana le ge meetse a Nile a phophoma e bile a fokotšega.
6 ‘Yena yo a agago ditepisi tša gagwe magodimong,Le moago wa gagwe godimo ga lefase.Yo a kgoboketšago meetse a lewatleGore a tle a a tšhollele lefaseng.Yena yoo leina la gagwe ke Jehofa.’
7 Jehofa o re: ‘Lena Baisiraele, na go nna ga le swane le Baethopia?*
Na ga se ka ntšha Baisiraele nageng ya Egepeta,Le gona na Bafilisita ga se ka ba ntšha Kereta, gomme Basiria ka ba ntšha Kiri?’
8 ‘Tsebang gore nna Mmuši Morena Jehofa ke lebeletše mmušo wa go dira dibe,Gomme ke tla o fediša mo nageng.
Eupša ditlogolwana tša Jakobo nka se di fedišetše sa ruri,’ ke nna Jehofa ke bolelago se.
9 ‘Tsebang gore ke ntšha taelo,Gomme ba ntlo ya Isiraele ba tla gašana ditšhabeng ka moka.Ke tla ba šikinya go swana le ge motho a šikinya sefo,Gomme ga go le thoro e tee yeo e tlago go wela fase.
10 Badiradibe ka moka gare ga batho ba ka ba tla bolawa ka tšhoša,E lego bao ba rego: “Re ka se batamelwe ke kotsi goba ya re wela.”’
11 “‘Letšatšing leo ke tla tsoša ntlo ya Dafida yeo e welego,Ka lokiša le mašoba a yona,Ke tla tsošološa marope a yona,Ka e aga leswa gomme ya swana le kamoo e bego e le ka gona kgale,
12 E le gore batho ba ka ba ka fenya Baedomo bao ba sa phelago,Gomme ba laola ditšhaba ka moka tšeo di bitšwago ka leina la ka.’ Ke nna Jehofa yo a tlago go dira se.
13 Jehofa o re: ‘Nakong e tlago,Pele batho ba ka ba ka fetša go buna, ba tlo swanelwa ke go thoma go lema.Le gona pele ba ka fetša go gatakela diterebe, ba tlo swanelwa ke go thoma go bjala peu.Dithabeng go tla rotha beine e bose,Gomme meboto ka moka ya tšweletša beine e ntšhi.
14 Ke tla buša batho ba ka ba Isiraele bothopša,Gomme ba tla aga leswa metse ya bona yeo e sentšwego ba dula go yona.Ba tla bjala dirapa tša diterebe ba nwa beine ya tšona,Gomme ba lema dirapa ba ja dienywa tša tšona.’
15 Jehofa Modimo wa gago o re:‘Ke tla ba bušetša* nageng ya bona,Gomme le ka mohla go ka se be le motho yo a ba rakago* nageng ya bona yeo ke ba neilego yona.”
Mengwalo ya tlase
^ Goba, “Bakushe.”
^ Phetolelo ya lentšu ka lentšu e re, “bjala.”
^ Phetolelo ya lentšu ka lentšu e re, “tumolago.”
