Baahlodi 1:1-36
1 Ka morago ga lehu la Joshua, Baisiraele ba ile ba botšiša Jehofa ba re: “Mo gare ga rena, ke mang e tlago go ba wa mathomo go yo lwa le Bakanana?”
2 Jehofa a ba araba a re: “Go tla ya moloko wa Juda. Bonang! Ke tla o thuša* go fenya naga ya Kanana.”
3 Ke moka ba moloko wa Juda ba botša ba moloko wa Simeone bao e lego bana babo bona ba re: “Sepelang le rena re ye nageng yeo re e abetšwego gore re yo lwa le Bakanana. Ka morago le rena re tla ya le lena nageng ya lena.” Ke moka ba moloko wa Simeone ba sepela le bona.
4 Ge ba moloko wa Juda ba eya ntweng, Jehofa o ile a ba thuša go fenya Bakanana le Baperetse. Ba ile ba fenya banna ba 10 000 (dikete tše lesome) kua Betseka.
5 Ge ba be ba elwa le Bakanana le Baperetse bao gomme ba ba fenya, ba ile ba hwetša Adoni-betseka kua Betseka gomme ba lwa le yena.
6 Ge Adoni-betseka a tšhaba, ba mo kitimiša ba mo swara gomme ba mo kgaola menwana e megolo ya diatleng le ya maotong.
7 Ke moka Adoni-betseka a re: “Go na le dikgoši tše 70 tše ke di kgaotšego menwana e megolo ya diatleng le ya maotong, tšeo di bego di topelela dijo ka tlase ga tafola ya ka. Modimo o ntirile seo ke di dirilego sona.” Ka morago ba tla le yena Jerusalema gomme a hwela moo.
8 Ke moka barwa ba Juda ba ya go lwa le Jerusalema gomme ba e thopa, ba bolaya badudi ba moo ka sabola gomme ba fiša motse woo ka mollo.
9 Ka morago ga moo, barwa ba Juda ba ya go lwa le Bakanana bao ba bego ba dula tikologong ya dithaba, Negebe le Shefela.
10 Ke moka ba ya go lwa le Bakanana bao ba bego ba dula Heburone (pele ga moo Heburone e be e bitšwa Kiriathe-araba) gomme ba fenya Sheshai, Ahimane le Thalamai.
11 Ba tloga moo ba yo lwa le badudi ba Debiri. (Pele ga moo Debiri e be e bitšwa Kiriathe-sefere.)
12 Ke moka Kalebe a re: “Monna yo a ka hlaselago Kiriathe-sefere gomme a e fenya ya ba ya gagwe, ke tla mo nea Akisa morwedi wa ka gore e be mosadi wa gagwe.”
13 Ka morago Othiniele morwa wa Kenase, moratho wa Kalebe, a e fenya ya ba ya gagwe. Ke moka Kalebe a mo nea Akisa morwedi wa gagwe gore e be mosadi wa gagwe.
14 Ge Akisa a le tseleng ya go ya gae, a dulela go kgopela Othiniele gore a kgopele tšhemo go Kalebe tatagwe.* Ka morago Akisa a fologa tonki yeo a bego a e nametše.* Ke moka Kalebe a re go yena: “O nyaka’ng?”
15 Yena a re: “Ke kgopela o ntšhegofatše, ka ge o mphile karolo ya naga yeo e lego ka thoko ya borwa,* ke kgopela o mphe le Gulothe-maima.” Ka gona Kalebe a mo nea Gulothe ya Godimo le Gulothe ya Tlase.
16 Ke moka ditlogolo tša Mokeni yoo e bego e le ratswale wa Moshe, tša tla di etšwa motseng wa mepalema di na le ditlogolo tša Juda gomme tša ya lešokeng la Juda, leo le bego le le ka borwa bja Aradi. Tša ya tša dula le batho ba moo.
17 Eupša ba moloko wa Juda ba sepela le ba moloko wa Simeone bao e bego e le bana babo bona, ke moka ba hlasela Bakanana bao ba bego ba dula Tsefata gomme ba senya motse woo. Ke moka ba bitša motse woo gore ke Horoma.
18 Ka morago ga moo, ba moloko wa Juda ba thopa Gatsa, Ashikaloni le Ekirone gotee le ditikologo tša tšona ka moka.
19 Jehofa a thekga ba moloko wa Juda gomme ba tšea naga ya dithabeng ya ba ya bona, eupša ba se kgone go amoga badudi ba moeding naga ya bona ka gobane ba be ba na le dikoloi tša ntwa tšeo di hlometšwego disabole maotwaneng a tšona.
20 Ba fa Kalebe motse wa Heburone, go etša ge Moshe a be a mo tshepišitše. Ke moka yena a raka barwa ba bararo ba Anaki moo.
21 Eupša Babenjamini ga se ba raka Bajebusi bao ba dulago Jerusalema. Ka baka leo, Bajebusi ba sa dula le Babenjamini kua Jerusalema go fihla le lehono.
22 Ka nako yeo, ditlogolo tša Josefa di ile tša ya go lwa le badudi ba Bethele gomme Jehofa o be a di thekga.
23 Ditlogolo tša Josefa tša ya go hlola motse wa Bethele (pele ga moo, motse woo o be o bitšwa Lutsi),
24 gomme tša bona monna a etšwa motseng woo. Ka gona tša re go yena: “Hle re bontšhe tsela ya go tsena motseng gomme re tla go phološa.”
25 Ka gona, monna yoo a ba bontšha tsela ya go tsena motseng gomme ba tsena motseng woo ba bolaya batho ba motseng woo ka sabola, eupša ba tlogela monna yoo le lapa la gagwe gore ba sepele.
26 Monna yoo a ya nageng ya Bahethe, a aga motse gomme a o bitša Lutsi. Motse woo o sa bitšwa bjalo go fihla le lehono.
27 Ba moloko wa Manase ga se ba tšea Bethe-sheane le metse yeo e lego kgauswi le yona, Thaanake le metse yeo e lego kgauswi le yona, Doro le metse yeo e lego kgauswi le yona, Ibileama le metse yeo e lego kgauswi le yona gotee le Megido le metse yeo e lego kgauswi le yona. Bakanana ba ile ba gana go tloga nageng yeo.
28 Ge Baisiraele ba thoma go ba le matla, ba ile ba gapeletša Bakanana go šoma ka thata eupša ga se ba ba raka ka moka.
29 Baefuraime le bona ga se ba raka Bakanana bao ba bego ba dula Getsere. Bakanana ba ile ba tšwela pele ba dula le bona gona moo Getsere.
30 Basebulone ga se ba raka badudi ba Kitirone le badudi ba Nahalole. Bakanana ba ile ba tšwela pele ba dula le bona gomme ba gapeletšwa go šoma ka thata.
31 Baashere ga se ba raka badudi ba Ako le badudi ba Sidone, Ahalabe, Akatsibe, Heleba, Afike le Rehobo.
32 Ka gona, Baashere ba ile ba tšwela pele ba dula le Bakanana bao ba bego ba dula nageng yeo, ka gobane ga se ba ba raka.
33 Ba moloko wa Nafutali ga se ba raka badudi ba Bethe-shemeshe le badudi ba Bethe-anathe, eupša ba ile ba tšwela pele ba dula le Bakanana bao ba bego ba dula nageng yeo. Ba moloko wa Nafutali ba ile ba gapeletša badudi ba Bethe-shemeshe le ba Bethe-anathe go šoma ka thata.
34 Baamore ba ile ba gapeletša ba moloko wa Dani go dula dithabeng, ka gobane Baamore ba be ba sa ba dumelele gore ba theogele moeding.
35 Baamore ba ile ba gapeletša go dula Thabeng ya Herese, motseng wa Ajaloni le wa Shaalabima. Eupša ge ditlogolo tša Josefa di thoma go ba le matla, di ile tša ba gapeletša go šoma ka thata.
36 Naga ya Baamore e be e tloga mmotong wa Akirabimi e bile e tloga Sela gomme e rotogela mebotong.
Mengwalo ya tlase
^ Goba, “Ke o thušitše.”
^ Kalebe ke tatago Akisa.
^ Goba mohlomongwe, “o ile a phaphatha diatla a nametše tonki.”
^ Goba, “Negebe.”
