Baahlodi 11:1-40
11 Jefeta wa Mogileada e be e le lešole le matla. E be e le morwa wa mosadi wa mogweba-ka-mmele, gomme tatagwe e le Gileada.
2 Mosadi wa Gileada o ile a mmelegela barwa. Ge barwa ba mosadi yoo ba gotše ba ile ba raka Jefeta, ba re go yena: “O ka se hwetše bohwa lapeng la tatago rena ka gobane o morwa wa mosadi yo mongwe.”
3 Ka gona Jefeta a tšhaba ka baka la bana babo, a yo dula nageng ya Tobe. Banna bao ba bego ba sa šome ba ile ba thekga Jefeta gomme ba mo šala morago ya ba moetapele wa bona.
4 Ka morago ga nakwana Baamoni ba ile ba lwa le Baisiraele.
5 Ge Baamoni ba elwa le Baisiraele, gateetee banna ba bagolo ba Gileada ba yo tšea Jefeta nageng ya Tobe.
6 Ke moka ba re go Jefeta: “Etla o be molaodi wa rena gore re yo lwa le Baamoni.”
7 Eupša Jefeta a re go banna ba bagolo* ba Gileada: “Na ga se lena bao le bego le ntlhoile kudu moo le ilego la ba la nthaka ntlong ya tate? Bjale go re’ng le etla go nna ge le le tlalelong?”
8 Ge Jefeta a re’alo, banna ba bagolo ba Gileada ba re go yena: “Ke ka baka leo re tlilego go wena, ge o ka sepela le rena gore re yo lwa le Baamoni, o tla ba moetapele wa badudi ka moka ba Gileada.”
9 Ka gona Jefeta a re go banna ba bagolo ba Gileada: “Ge e ba ka nnete le nyaka gore ke boele le lena morago gore re yo lwa le Baamoni gomme Jehofa a nthuša gore ke ba fenye, gona ke tla ba moetapele wa lena!”
10 Ke moka banna ba bagolo ba Gileada ba re go Jefeta: “Anke Jehofa e be hlatse ya rena gomme a re ahlole ge e ba re ka se dire seo o se boletšego.”
11 Ke moka Jefeta a sepela le banna ba bagolo ba Gileada gomme setšhaba sa mo dira moetapele le molaodi wa sona. Jefeta a ema pele ga Jehofa kua Mitsipa gomme a bušeletša mantšu ka moka ao a bego a a boletše.
12 Ke moka Jefeta a romela baromiwa go kgoši ya Amoni, a re: “Ke go dirile’ng ge o bile o etla mo nageng ya ka go tlo lwa le nna?”
13 Ka gona, Kgoši ya Baamoni ya fetola baromiwa ba Jefeta ya re: “Ke tlo lwa le wena ka gobane Baisiraele ba tšere naga ya ka ge ba be ba etšwa Egepeta. Ba e tšere go tloga Arinoni go fihla Jaboko le go fihla Nokeng ya Jorodane. Ka gona e bušetše go nna gore go be le khutšo gare ga rena.”
14 Eupša Jefeta a buša a roma baromiwa go kgoši ya Baamoni
15 ba re go yona:
“Jefeta o re: ‘Baisiraele ga se ba tšea naga ya Bamoaba le ya Baamoni,
16 ka gobane ge Baisiraele ba be ba etšwa Egepeta ba ile ba phatša lešokeng go fihla Lewatleng le Lehwibidu gomme ba fihla Kadeshe.
17 Ke moka Baisiraele ba romela molaetša go kgoši ya Edomo, ba re: “Re kgopela go feta ka gare ga naga ya gago,” eupša kgoši ya Edomo ya gana. Ba kgopela kgoši ya Moaba, le yona ya gana. Ka gona, Baisiraele ba tšwela pele ba dula Kadeshe.
18 Ge ba dutše ba feta lešoka, ba ile ba dikologa naga ya Edomo le naga ya Moaba, ba leba ka bohlabela bja naga ya Moaba gomme ba hloma ditente tikologong ya Arinoni. Ga se ba tshela mollwaneng wa Moaba ka gobane Arinoni e be e le mollwane wa Moaba.
19 “‘Ka morago Baisiraele ba romela molaetša go Sihoni kgoši ya Baamore, yoo a bego a buša a le Heshibone, gomme ba re: “Re kgopela go feta ka gare ga naga ya gago gomme re ye nageng ya rena.”
20 Sihoni o be a sa tshepe Baisiraele ka gona a se ba dumelele gore ba fete ka gare ga naga ya gagwe. Ke moka Sihone a kgoboketša mašole a gagwe ka moka, a hloma ditente kua Jahatsa gomme ba lwa le Baisiraele.
21 Ke moka Jehofa Modimo wa Isiraele a thuša Baisiraele gore ba fenye Sihoni le mašole a gagwe ka moka. Baisiraele ba thopa naga ka moka yeo Baamore ba bego ba dula go yona ya ba ya bona.
22 Ka go re’alo, ba thopa naga ka moka ya Baamore go tloga Arinoni go fihla Jaboko le go tloga lešokeng go fihla Nokeng ya Jorodane.
23 “‘Jehofa Modimo wa Isiraele ke yena a rakilego Baamore nageng ye gore a e fe setšhaba sa gagwe sa Isiraele, gomme na wena o nyaka go se raka?
24 Na naga e nngwe le e nngwe yeo Kemoshi modimo wa gago a go neago yona, ga o e tšee? Ka gona naga e nngwe le e nngwe yeo Jehofa Modimo wa rena a re neago yona re tla e tšea ya ba ya rena.
25 Na wena o phala Balaka morwa wa Tsiporo, kgoši ya Moaba? Na o kile a bakišana le Baisiraele goba a lwa le bona?
26 Ge Baisiraele ba be ba dutše Heshibone le metseng ya yona, Aroere le metseng ya yona gotee le metseng ka moka yeo e lego kgauswi le noka ya Arinoni ka mengwaga e 300 (makgolo a mararo), gona o re’ng o se wa leka go tšea dinaga tšeo ka nako yeo?
27 Nna ga se ka go senyetša, eupša wena o dira phošo ka go lwa le nna. Anke lehono Jehofa Moahlodi yo Mogolo, a ahlole magareng ga Baisiraele le Baamoni.’”
28 Eupša kgoši ya Baamoni ya se theetše molaetša woo Jefeta a e rometšego wona.
29 Bjale Jefeta a tlelwa ke moya wa Jehofa, gomme a sepela gare ga naga ya Gileada le ya Manase a ba a feta gare ga naga ya Mitsipa ya Gileada, gomme go tloga Mitsipa ya Gileada a fetela go Baamoni.
30 Ke moka Jefeta a enela Jehofa a re: “Ge o ka nthuša gore ke fenye Baamoni,
31 gona motho yo a tšwago mojakong wa ntlo ya ka a etla go nkgahlanetša ge ke boela gae ka morago ga go fenya Baamoni, yena yoo e tla ba wa gago wena Jehofa, gomme ke tla mo neela bjalo ka sebego sa go fišwa.”
32 Ka gona Jefeta a lwa le Baamoni gomme Jehofa a mo thuša gore a ba fenye.
33 Jefeta a ba bolaya gasehlogo go tloga Aroere go fihla Minithe, e lego metse e 20 le go fihla Abele-keramima. Ka go re’alo, Baamoni ba fenywa ke Baisiraele.
34 Mafelelong Jefeta a fihla legaeng la gagwe kua Mitsipa gomme a bona morwedi wa gagwe a etšwa a tlo mo gahlanetša a itia moropa e bile a bina! E be e le yena ngwana a nnoši, ntle le yena o be a se na morwa goba morwedi.
35 Eitše ge a mmona, a gagola diaparo tša gagwe a re: “Joo, morwedi wa ka! O nkwešitše bohloko kudu, ka gobane go bjalo ka ge eka ke go lahlile. Ke tshepišitše Jehofa gomme ke swanetše go dira seo ke mo tshepišitšego sona.”
36 Eupša yena a re: “Tate, ge e ba o tshepišitše Jehofa, gona ntire seo o mo tshepišitšego sona, ka ge Jehofa a go thušitše go fenya manaba a gago, e lego Baamoni.”
37 Ke moka a tšwela pele a re go tatagwe: “Ke kgopela selo setee feela: Ke kgopela go ya dithabeng ka dikgwedi tše pedi, ke yo llela bokgarebe bja ka ke na le bagwera ba ka ba banenyana.”*
38 Ge a re’alo, tatagwe a re: “Sepela!” A mo dumelela gore a sepele ka dikgwedi tše pedi, a yo llela bokgarebe bja gagwe dithabeng a na le bagwera ba gagwe ba banenyana.
39 Ge dikgwedi tše pedi di fedile, a boela go tatagwe, ke moka tatagwe a dira seo a bego a se tshepišitše Modimo. Ge e le morwedi wa Jefeta, ga a ka a robala le monna le ka mohla. Baisiraele ba ile ba itlwaetša gore:
40 Ngwageng o mongwe le o mongwe barwedi ba Baisiraele ba ye go reta morwedi wa Jefeta wa Mogileada ka matšatši a mane.
Mengwalo ya tlase
^ Go bonagala bana babo Jefeta ba be ba tumile kudu gare ga banna ba bagolo ba Gileada.
^ Goba, “ke lle ke na le bagwera ba ka ka gobane nka se tsogile ke nyetšwe.”
