Baahlodi 16:1-31
16 Ka letšatši le lengwe, Simisone o ile a ya Gatsa gomme a bona mosadi wa mogweba-ka-mmele moo, ke moka a ya ntlong ya gagwe.
2 Bagatsa ba kwa gore Simisone o be a le gona moo motseng. Ke moka ba dikanetša lefelo leo a bego a le go lona gomme ba mo lalela keiting ya motse bošego ka moka. Ba dula ba homotše bošego ka moka, ba ipotša ba re: “Ge go esa, re tla mmolaya.”
3 Lega go le bjalo, Simisone a robala ke moka a tsoga bošegogare gomme a swara keiti ya motse le dikota tša yona tše pedi a di tumola, a di rwala magetleng a gagwe gomme a di iša thabeng yeo e lego pele ga Heburone.
4 Ka morago ga moo, a ratana le mosadi yo a bego a bitšwa Delila kua Moeding wa Soreka.
5 Ka gona, babuši ba Bafilisita ba ya go Delila ba re go yena: “Mo goketše gore a go botše gore matla a gagwe a tšwa kae le gore re ka dira eng gore re mo fenye, re mo tleme, re be re mo laole. Ge o ka dira bjalo, yo mongwe le yo mongwe wa rena o tla go fa ditsekana tša silifera tše 1 100 (sekete le lekgolo).”
6 Ka morago Delila a re go Simisone: “Ke kgopela o mpotše gore matla a gago a magolo a tšwa kae le gore o ka tlengwa ka’ng gore o fenywe?”
7 Simisone a re go yena: “Ge ba ka ntlema ka dithapo tša bora tše šupago tšeo di sa tšwago go dirwa, ke tla fela matla gomme ka swana le banna ba bangwe.”
8 Babuši ba Bafilisita ba mo tlišetša dithapo tša bora tše šupago tšeo di sa tšwago go dirwa. Ke moka yena a tlema Simisone ka tšona.
9 Go be go na le banna ba bangwe bao ba bego ba mo laletše ka kamoreng e nngwe ya Delila. Ke moka Delila a goeletša a re: “Simisone, Bafilisita šebao!” Ge a re’alo, Simisone a kgaola dithapo tšeo ka diripa tše pedi go swana le garane yeo e kgaogago gabonolo ge e ekwa mollo. Ga se gwa tsebja gore matla a gagwe a tšwa kae.
10 Ke moka Delila a re go Simisone: “O ntirile setlaela wa mpotša maaka. Bjale ke kgopela o mpotše gore o ka tlengwa ka eng.”
11 Simisone a re go yena: “Ge ba ka ntlema ka go tia ka dithapo tše diswa tšeo di sa kago tša šomišwa, ke tla fela matla ka swana le banna ba bangwe.”
12 Delila a tšea dithapo tše mpsha a mo tlema ka tšona gomme a re go yena: “Simisone, Bafilisita šebao!” Ka nako yeo go be go na le banna ba bangwe bao ba bego ba mo laletše ka phaphošing ya ka gare ya Delila. Ke moka Simisone a kgaola dithapo tšeo bjalo ka ge eka o kgaola digarane.
13 Ka morago Delila a re go Simisone: “Le gona bjale o sa ntirile setlaela gomme wa mpotša maaka. Bjale mpotše gore o ka tlengwa ka eng.” Ke moka Simisone a re: “Ge o ka swaraganya melogo ye e šupa ya moriri wa ka gomme wa e loga ka garane godimo ga motšhene wa go dira mašela, ke tla fela matla.”
14 Ka gona Delila a e tiiša ka kotana, gomme a goeletša a re: “Simisone, Bafilisita šebao!” Ke moka Simisone a tsoga borokong gomme a hlomola kotana yeo e bego e le meriring ya gagwe, a ntšha le digarane tšeo di bego di logagantšwe.
15 Delila a re go yena: “O re’ng o re o a nthata, mola o sa ntshepe? O ntirile setlaela ka makga a mararo ka go se mpotše gore matla a gago a magolo a tšwa kae.”
16 Ka ge Delila a be a mmotšiša letšatši le lengwe le le lengwe e bile a mo lapiša, Simisone o ile a tenega la go hwa.
17 Mafelelong Simisone a mo utollela ditaba ka moka a re: “Legare ga se la ka la dirišwa hlogong ya ka ka ge ke le Monasari wa Modimo go tloga ge ke belegwa. Ge e ba nka kotwa moriri ke tlo felelwa ke matla gomme ka fokola ka swana le banna ba bangwe.”
18 Ge Delila a bona gore Simisone o mmoditše ditaba ka moka, gateetee a ya go babuši ba Bafilisita, a re go bona: “Bjale etlang, ka gobane o mpoditše ditaba ka moka.” Ka gona babuši ba Bafilisita ba tla go yena ba mo swaretše tšhelete gomme ba mo fa yona.
19 Delila a robatša Simisone diropeng tša gagwe. Ke moka a bitša monna yo a itšego gore a tlo kota melogo e šupago hlogong ya Simisone, ka morago ga moo Delila a kgona go mo laola ka gobane Simisone o be a se sa na matla.
20 A re go yena: “Simisone, Bafilisita šebao!” Simisone a tsoga borokong gomme a re: “Ke tla tšwa go etša dinakong tše dingwe ka tšhaba.” Eupša o be a sa tsebe gore Jehofa o be a se sa mo nea matla.
21 Ka gona Bafilisita ba mo swara, ba mo gonya mahlo, ke moka ba mo iša Gatsa, ba mo tlema ka diketane tše pedi tša koporo. Ke moka a ba šilela mabele teronkong.
22 Eupša moriri wa gagwe, o ile wa thoma go gola.
23 Ka letšatši le lengwe, babuši ba Bafilisita ba kgobokana gore ba direle Dagoni modimo wa bona dihlabelo tše dintšhi le go keteka monyanya wa phenyo ya bona. Ka gobane ba be ba re: “Dagoni modimo wa rena o re thušitše go fenya Simisone lenaba la rena!”
24 Ge batho ba bona Dagoni, ba mo reta ba re: “Modimo wa rena o re thušitše go fenya lenaba la rena leo le bego le senya naga ya rena le go bolaya batho ba bantšhi.”
25 Ka ge ba be ba thabile, ba ile ba re: “Bitšang Simisone gore re tle re dire metlae ka yena.” Ka gona ba ntšha Simisone teronkong gore ba tle ba dire metlae ka yena. Ba mo emiša magareng ga diphilara tše pedi.
26 Ke moka Simisone a re go mošemane yo a bego a mo swere ka seatla: “E re ke sware diphilara tšeo di thekgilego ntlo ye gore ke ithekge ka tšona.”
27 (Ntlo e be e tletše banna le basadi. Babuši ka moka ba Bafilisita ba be ba le gona. Tlhakeng ya ntlo go be go na le banna le basadi ba e ka bago ba 3 000 (dikete tše tharo) bao ba bego ba lebeletše ge Simisone a ba tloša bodutu.)
28 Bjale Simisone a kgopela Jehofa a re: “Mmuši Morena Jehofa, nkgopole. Ke kgopela o mphe matla la mafelelo hle Modimo wa ka o be o nthuše gore ke itefeletše go Bafilisita ba, ke lefeletše le lengwe la mahlo a ka ao ba a ntšhitšego.”
29 Ke moka Simisone a ema gare ga diphilara tše pedi tšeo di bego di thekgile moago, a ithekga ka tšona, e nngwe a e swara ka seatla sa le letona gomme e nngwe a e swara ka sa le letshadi.
30 Simisone a goeletša a re: “E re ke hwe le Bafilisita!” A kgorometša diphilara tšeo ka matla a gagwe ka moka gomme moago wa wela babuši le batho ka moka bao ba bego ba le ka go ona. Ka gona, a bolaya batho ba bantši ge a be a ehwa go feta bao a ba bolailego nakong ya ge a be a sa phela.
31 Ka morago bana babo le batho ka moka ba lapa la tatagwe ba tla gore ba tle ba mo tšee. Ba rwala setopo sa gagwe gomme ba se boloka gare ga Tsora le Eshithaolo lebitleng la Manoa tatagwe. Simisone o bile moahlodi kua Isiraele ka mengwaga e 20.
