Baahlodi 17:1-13
-
Medingwana ya Mika le moperesita wa gagwe (1-13)
17 Go be go na le monna yo mongwe yo a bego a dula dithabeng tša Efuraime, leina la gagwe e be e le Mika.
2 A re go mmagwe: “O sa gopola ditsekana tše 1 100 (sekete le lekgolo) tša silifera tšeo di utswitšwego go wena, tšeo ke kwelego o roga motho yo a di utswitšego? Ke tše, ke nna ke di tšerego.” Ge a re’alo, mmagwe a re: “Morwa wa ka, eka Jehofa a ka go šegofatša.”
3 Ke moka a fa mmagwe ditsekana tšeo tša silifera tše 1 100 (sekete le lekgolo) eupša mmagwe a re: “Ke tla nea Jehofa silifera ye. Ke nyaka o itirele seswantšho sa go betlwa le seswantšho sa tšhipi ka yona. Bjale ke e bušetša go wena.”
4 Ge a se na go nea mmagwe silifera yeo, mmagwe o ile a tšea ditsekana tše 200 (makgolo a mabedi) tša silifera gomme a nea motho yo a dirago dilo tša silifera. Motho yoo a dira seswantšho se se betlilwego le seswantšho sa tšhipi gomme tša bewa ntlong ya Mika.
5 Mika o be a na le ntlo yeo a rapelago medimo ya diswantšho ka go yona, a dira efoda* le modingwana wa lapa* gomme a bea yo mongwe wa barwa ba gagwe gore e be moperisita wa gagwe.
6 Mehleng yeo go be go se na kgoši kua Isiraele. Yo mongwe le yo mongwe o be a dira seo a bonago se lokile.
7 Bjale, go be go na le lesogana le lengwe leo le bego le dula Betlelehema ya Juda, leo e bego e le la moloko wa Juda. E be e le Molefi gomme le dula moo ka nakwana.
8 Lesogana leo le ile la tloga Betlelehema ya Juda gore le yo hwetša lefelo leo le ka dulago go lona. Ge le le tseleng le ile la fihla ntlong ya Mika yeo e bego e le dithabeng tša Efuraime.
9 Ke moka Mika a re go lona: “O tšwa kae?” Lona la re: “Ke Molefi yo a tšwago Betlelehema ya Juda, ke tseleng ya go yo nyaka lefelo leo nka dulago go lona.”
10 Ka gona, Mika a re go lona: “Dula le nna gore o be moeletši* le moperisita wa ka, ke tla go nea ditsekana tše lesome tša silifera ka ngwaga le diaparo tša boperisita gotee le dijo.” Molefi yoo a dula le yena.
11 Lesogana leo la Molefi la dumela go dula le yena, la ba bjalo ka yo mongwe wa barwa ba gagwe.
12 Go oketša moo, Mika a dira lesogana leo la Molefi gore e be moperisita wa gagwe gomme la dula le yena ntlong ya gagwe.
13 Ke moka Mika a re: “Bjale gona ke a tseba gore Jehofa o tla ntshwara gabotse, ka gobane Molefi yo ke moperisita wa ka.”
Mengwalo ya tlase
^ Bona seswantšho go Dit. B5
^ Phetolelo ya lentšu ka lentšu e re, “terafimi.”
^ Phetolelo ya lentšu ka lentšu e re, “tate.”
