Baahlodi 18:1-31
18 Mehleng yeo kua Isiraele go be go se na kgoši, e bile moloko wa Dani o be o nyaka naga yeo o ka dulago go yona, ka gobane go fihla ka nako yeo o be o se wa hwetša naga ya bohwa gare ga meloko ya Isiraele.
2 Badani ba roma banna ba bahlano go tšwa molokong wa bona, bao ba bego ba swanelega gore ba ye ba hlole naga le go e lekola. Banna bao ba be ba etšwa Tsora le Eshithaolo. Badani ba re go banna bao: “Eyang le yo lekola naga.” Ge ba fihla dithabeng tša Efuraime ntlong ya Mika, ba ile ba robala moo.
3 Ge ba le kgauswi le ntlo ya Mika, ba kwa lesogana la Molefi le bolela gomme ba tseba lentšu la lona. Ke moka ba ya go lona, ba re: “O tlišitšwe ke mang mo, gona o dira’ng mo? O nyakang mo?”
4 La ba botša seo Mika a le diretšego sona le gore o le hirile gore e be moperisita wa gagwe.”
5 Ke moka ba re go lona: “Hle botšiša Modimo gore leeto la rena le tla atlega na?”
6 Moperisita a re go bona: “Sepelang ka khutšo. Jehofa o tla ba le lena leetong la lena.”
7 Ka gona, banna ba bahlano ba tloga gomme ba fihla Laishi. Ba ile ba bona gore batho ba moo ga ba ithekge ka motho yo mongwe go swana le Basidone bao ba sa ithekgego ka batho ba bangwe. Ba be ba iketlile e bile ba sa nagane gore ba ka hlaselwa. Go be go se na mmuši yo a hlaselago naga ya bona goba go ba tshwenya. Ba be ba dula kgole le Basidone e bile ba sa dirišane le batho ba bangwe.
8 Ge ba boela go bana babo bona kua Tsora le Eshithaolo, bana babo bona ba ile ba ba botšiša gore: “Le sepetše bjang?”
9 Ba araba ba re: “A re yeng re yo hlasela Laishi ka gobane re bone gore naga ya bona ke e botse kudu. Le reng le dikadika? Le se ke la tšwafa go yo tšea naga yeo gore e be ya lena.
10 Ge le fihla, le tla hwetša batho bao ba sa naganego gore ba ka hlaselwa, bao ba nago le naga e kgolo kudu. Modimo o tlo le thuša gore le ba fenye. Naga yeo ya bona ga e hloke selo.”
11 Go tšwa molokong wa Dani go ile gwa tšwa banna ba 600 (makgolo a tshelelago) bao ba itokišeditšego ntwa, bao ba tšwago Tsora le Eshithaolo.
12 Ba ile ba rotoga gomme ba hloma ditente Kiriathe-jearima kua Juda. Ke ka baka leo lefelo le leo le lego ka bodikela bja Kiriathe-jearima le bitšwago Mahane-dani go fihla le lehono.
13 Go tloga moo, ba ya dithabeng tša Efuraime gomme ba fihla ntlong ya Mika.
14 Ke moka banna ba bahlano bao ba bego ba ile go hlola naga ya Laishi ba re go bana babo bona: “Na le be le tseba gore ka mo dintlong tše go na le efoda,* modingwana wa lapa,* seswantšho se se betlilwego le seswantšho sa tšhipi? Kgethang seo le tlago go se dira.”
15 Ba ema gomme ba tsena ka ntlong ya Mika moo lesogana leo la Molefi le bego le dula gona, ke moka ba le dumediša.
16 Ka nako yeo, banna ba 600 (makgolo a tshelelago) ba moloko wa Dani, bao ba bego ba itokišeditše ntwa, ba be ba eme keiting ya motse.
17 Banna ba bahlano bao ba bego ba ile go hlola naga ba tsena, gomme ba tšea seswantšho se se betlilwego, efoda le medingwana ya lapa le seswantšho sa tšhipi. (Moperisita o be a eme keiting ya motse a na le banna ba 600 [makgolo a tshelelago] bao ba bego ba itokišeditše ntwa.)
18 Ba tsena le ka ntlong ya Mika gomme ba tšea seswantšho se se betlilwego, efoda, medingwana ya lapa le seswantšho sa tšhipi. Ke moka moperisita a re go bona: “Le dira’ng?”
19 Eupša ba re go yena: “Homola. O se ke wa bolela selo gomme o sepele le rena gore o yo ba moeletši* le moperisita wa rena. Se se kaone go wena ke’ng? Na ke gore o be moperisita ntlong ya monna o tee goba ke gore o be moperisita wa moloko le wa lapa la Isiraele?”
20 Ka gona moperisita o ile a kgotsofatšwa ke seo, ke moka a tšea efoda, modingwana wa lapa le seswantšho seo se betlilwego gomme a sepela le batho ba moloko wa Dani.
21 Ba sepela gomme ba tšea bana, diruiwa le dilo tše bohlokwa ba di etiša pele.
22 Ge bana ba Dani ba le kgojana le ntlo ya Mika, baagišane ba Mika ba kgobokana gore ba ba kitimiše, mafelelong ba ile ba ba swara.
23 Ge ba goeletša bana ba Dani, bona ba ile ba retologa ba re go Mika: “Molato ke’ng? Ke ka baka la’ng o etla le batho ba bantši?”
24 Ka gona Mika a re: “Le tšere medimo yeo ke itiretšego yona, la ba la tšea le moperisita wa ka, bjale ke šetše ka’ng? Bjale le re’ng le mpotšiša gore: ‘Molato wa gago ke’ng?’”
25 Bana ba Dani ba re go yena: “O se ke wa bolela le rena ka tsela ye, go sego bjalo banna ba ba galefilego ba tla go hlasela gomme ba go bolaya le lapa la gago ka moka.”
26 Bana ba Dani ba sepela. Ka ge Mika a be a lemoga gore ba mo feta ka matla, o ile a gomela morago.
27 Ka morago ga gore ba tšee medingwana yeo Mika a bego a e dirile le moperisita wa gagwe, ba ile ba ya Laishi go yo lwa le batho bao ba bego ba iketlile e bile ba sa nagane gore ba ka hlaselwa. Ba ile ba ba bolaya ka sabola gomme ba tšhuma motse ka mollo.
28 Go be go se na motho yo a ka ba phološago ka gobane Laishi e be e le kgole le Sidone e bile e le moeding wa Bethe-rehobo. Le gona, ba be ba sa dirišane le batho ba bangwe. Ke moka bana ba Dani ba tsošološa motse woo gomme ba dula go wona.
29 Go oketša moo, ba fetoša leina la motse woo ba re ke Dani, e lego leina la tatago bona Dani yo a belegwego ke Isiraele. Eupša leina la motse woo peleng e be e le Laishi.
30 Ka morago ga moo, bana ba Dani ba hloma seswantšho se se betlilwego gore ba se rapele. Ke moka Jonathane morwa wa Gerishome yo e lego morwa wa Moshe gotee le barwa ba gagwe, ya ba baperisita ba moloko wa Dani go fihla letšatšing leo badudi ba naga yeo ba ilego ba išwa bothopša ka lona.
31 Ke moka ba hloma seswantšho se se betlilwego seo Mika a bego a se dirile gore ba se rapele. Sa dula moo matšatši ka moka ao ntlo* ya Modimo wa nnete e bego e le Shilo ka ona.
Mengwalo ya tlase
^ Mohlomongwe ke seaparo seo se swanago le thetho seo se nago le bokamorago le bokapele.
^ Phetolelo ya lentšu ka lentšu e re, “terafimi.”
^ Phetolelo ya lentšu ka lentšu e re, “tate.”
^ Goba, “taberenakele.”
