Baahlodi 19:1-30
-
Babenjamini ba kata mosadi kua Gibea (1-30)
19 Mehleng yeo ya ge go be go se na kgoši kua Isiraele, Molefi yo mongwe yo a bego a dula dikarolong tša kgole kudu tša dithaba tša Efuraime o ile a tšea mosadi wa serethe yo a tšwago Betlelehema ya Juda gore e be mosadi wa gagwe.
2 Eupša mosadi yoo wa serethe o ile a se botegele monna wa gagwe, gomme a mo tlogela a ya ntlong ya tatagwe kua Betlelehema ya Juda. O ile a dula moo dikgwedi tše nne.
3 Ke moka monna wa gagwe a mo šala morago gore a mo kgopele gore a boelane le yena. O tlile a na le mohlanka wa gagwe wa monna le ditonki tše pedi. Ge a fihla moo, mosadi yoo o ile a mo tsenya ka ntlong ya tatagwe gomme tatagwe a thabela go mmona.
4 Ka gona ratswale wa gagwe a mo kgodiša gore a dule le bona ka matšatši a mararo. Ba ja ba nwa gomme a robala moo.
5 Ka letšatši la bone ge ba tsoga ka masa, tatago mosadi a re go mokgonyana wa gagwe: “Eja pele o sepela.”
6 Ka gona ba dula gomme ba ja le go nwa beine mmogo. Ka morago, tatago mosadi a re go monna yoo: “Ke kgopela o robale mo gomme o ipshine.”
7 Ge monna yoo a tsoga gore a sepele, ratswale wa gagwe o ile a mo kgopela gore a dule, gomme monna yoo a robala moo gape.
8 Letšatšing la bohlano ge a tsoga a re o a sepela, tatago mosadi a re: “Hle, eja gore o be le matla.” Ba dula ba ja go fihlela letšatši le eya go dikela.
9 Ge monna yoo a re o tšea mosadi wa gagwe wa serethe gotee le mohlanka wa gagwe gore ba sepele, ratswale wa gagwe a re go yena: “Bona! E thoma go ba bošego. Hle robalang, letšatši le kgauswi le go dikela. Robalang mo gomme le ipshine. Gosasa le tsoge e sa le ka masa gomme le sepele le ye ntlong ya lena.”
10 Lega go le bjalo, monna yoo o be a sa nyake go robala gape. Ka gona a tloga a sepela go fihla Jebusi, ke gore Jerusalema. O be a na le mosadi wa gagwe wa serethe le mohlanka wa gagwe gotee le ditonki tša gagwe tše pedi.
11 Ge ba le kgauswi le Jebusi, letšatši le be le šetše le eya go dikela. Ka gona mohlanka a re go mong wa gagwe: “Na re ka se tsene mo motseng wo wa Jebusi gomme ra robala gona.”
12 Eupša mong wa gagwe a re go yena: “Ga se ra swanela go tsena motseng wa batho bao e sego Baisiraele. Re tla tšwela pele ka leeto go fihla Gibea.”
13 Ke moka a re go mohlanka wa gagwe: “A re leke go fihla Gibea goba Rama, re tla robala go le lengwe la mafelo ao.”
14 Ba tšwela pele ka leeto la bona gomme letšatši la thoma go dikela ge ba le kgauswi le Gibea ya Babenjamini.
15 Ba tsena Gibea gore ba yo robala gona. Ge ba fihla ba dula mmarakeng wa motse, eupša ga go motho yo a ilego a ba amogela ntlong ya gagwe gore ba robale gona.
16 Mokgalabje yo mongwe a fihla moo thapama a etšwa mašemong. O be a etšwa dithabeng tša Efuraime gomme a dula Gibea, eupša badudi ba moo e be e le Babenjamini.
17 Ge mokgalabje yoo a bona monna wa mosepedi mmarakeng wa motse, o ile a re: “O tšwa kae, gona o ya kae?”
18 Yena a re: “Re tšwa Betlelehema ya Juda re ya kgole kua dithabeng tša Efuraime, moo ke dulago gona. Ke be ke ile Betlelehema ya Juda gomme ke ya ntlong ya Jehofa,* eupša ga go le yo a nkamogelago ntlong ya gagwe.
19 Re swaretše ditonki tša rena dijo tše di lekanego, e bile nna, mosadi wa ka wa serethe le mohlanka wa rena, re na le senkgwa le beine. Re na le dilo ka moka tšeo re di hlokago.”
20 Lega go le bjalo, mokgalabje yoo a re: “Gona sepela le nna,* ke tla go hlokomela ka dilo tše dingwe tšeo o ka di hlokago. O se ke wa robala mmarakeng wa motse.”
21 A ba iša ntlong ya gagwe gomme a nea ditonki tša bona dijo. Ke moka ba hlapa maoto gomme ba ja le go nwa beine.
22 Ge ba be ba sa thabile, banna ba babe ba moo motseng ba ile ba dikanetša ntlo gomme ba betha mojako, ba dulela go botša mokgalabje yo e lego mong wa ntlo gore: “Ntšha monna yo a tlilego ntlong ya gago gore re robale le yena.”
23 Ge ba re’alo, mong wa ntlo a tšwela ka ntle, a re go bona: “Aowa bana bešo, le se ke la dira selo se se sebe, monna yo ke moeng ntlong ya ka. Le se ke la dira selo se seo se hlabišago dihlong.
24 Morwedi wa ka yo a sa kago a robala le monna le mosadi wa serethe wa monna yo šeba. E re ke ba ntšhe gomme le ba dire seo le nyakago go ba dira sona. Eupša le se ke la dira monna yo dilo tšeo tše di lešago dihlong.”
25 Eupša banna bao ba gana go theetša. Ke moka monna wa Molefi a kgoromeletša mosadi wa gagwe wa serethe ka ntle gore a ye go bona. Banna bao ba mo kata le go mo goboša bošego ka moka go fihlela mesong, ke moka ge go esa ba mo tlogela.
26 Ke moka mosadi yoo a tla e sa le ka masa, a wela mojakong wa ntlo ya mokgalabje yoo monna* wa gagwe a lego ka go yona, a robala moo go fihla ge letšatši le hlaba.
27 Ge monna wa Molefi a tsoga mesong a bula mejako gore a tšwele pele ka leeto la gagwe, a bona mosadi wa gagwe wa serethe a wetše mojakong wa ntlo gomme diatla tša gagwe di le moo mojakong.
28 A re go yena: “Tsoga re sepele.” Eupša mosadi yoo a se arabe. Ke moka monna yoo a mo nametša tonki gomme a ya le yena gae.
29 Ge a fihla gae a tšea thipa ya go hlaba diphoofolo gomme a ripaganya setopo sa mosadi wa gagwe wa serethe ka diripa tše 12, gomme a romela setho molokong o mongwe le o mongwe wa Isiraele.
30 Batho ka moka bao ba bonego se ba re: “Selo sa mohuta wo ga se sa ka sa direga goba sa bonwa ga e sa le Baisiraele ba etšwa Egepeta go fihla le lehono. Sekasekang taba ye, gomme le re botše gore re dire eng.”
Mengwalo ya tlase
^ Goba mohlomongwe, “ke hlankela ntlong ya Jehofa.”
^ Phetolelo ya lentšu ka lentšu e re, “Khutšo a e be le wena!”
^ Phetolelo ya lentšu ka lentšu e re, “mong wa gagwe.”
