Baahlodi 21:1-25
-
Moloko wa Benjamini o a phološwa (1-25)
21 Banna ba Isiraele ba ena ba le Mitsipa ba re: “Ga go le o tee go rena yo a tlago go nyadiša morwedi wa gagwe go Babenjamini.”
2 Ke moka Baisiraele ba tla Bethele gomme ba dula moo pele ga Modimo wa nnete go fihla mantšiboa, ba goeletša e bile ba lla gabohloko.
3 Ba be ba re: “Wena Jehofa Modimo wa Isiraele, ke ka baka la’ng selo se se diragetše mo Isiraele? Ke ka baka la’ng moloko o tee o tlošitšwe Isiraele lehono?”
4 Letšatšing le le latelago, batho ba tsoga ka masa ba aga aletare gona moo gore ba dire dibego tša go fišwa le tša go dira khutšo le Modimo.*
5 Baisiraele ba re: “Ke mang gare ga meloko ka moka ya Isiraele yo a sego a tla go ema pele ga Jehofa, ka gobane ba be ba dirile keno ya gore yo mongwe le yo mongwe yo a sa tlago go ema pele ga Jehofa kua Mitsipa o swanetše go bolawa.”
6 Ka gona, Baisiraele ba nyama ka baka la seo se diragaletšego Babenjamini bana babo bona. Ke moka ba re: “Lehono re lahlegetšwe ke moloko o tee go Isiraele.
7 Re tla dira’ng gore Babenjamini ba ba šetšego ba hwetše basadi, ka gobane re enne pele ga Jehofa gore re ka se ba nee barwedi ba rena gore e be basadi ba bona?”
8 Ba botšišana ba re: “Ke mang gare ga meloko ya Isiraele yo a sego a tla pele ga Jehofa mo Mitsipa?” Ba ile ba hwetša gore go be go se le o tee yo a tšwago Jabeshe-gileada yo a bego a tlile moo batho ba bego ba kgobokane gona.
9 Ge batho ba be ba balwa, go ile gwa hwetšwa gore go be go se le o tee wa batho bao ba tšwago Jabeshe-gileada yo a bego a tlile.
10 Ke moka setšhaba sa romela mašole a matla a 12 000 (dikete tše lesomepedi) kua Jabeshe-gileada. Sa re go ona: “Eyang le bolayeng badudi ba Jabeshe-gileada ka sabola, le be le bolaye le basadi le bana.
11 Se le swanetšego go se dira se se: Le bolayeng monna yo mongwe le yo mongwe le mosadi yo mongwe le yo mongwe gomme le tlogele feela basadi bao ba sa kago ba robala le monna.”
12 Gare ga badudi ba Jabeshe-gileada, ba hwetša dikgarebe tše 400 (makgolo a mane) tšeo di sa kago tša robala le monna. Ka gona, ba di tšea ba di tliša ditenteng kua Shilo yeo e lego nageng ya Kanana.
13 Ke moka setšhaba sa Isiraele sa romela molaetša go Babenjamini bao ba bego ba le leweng la Rimone wa gore go be le khutšo magareng ga sona le bona.
14 Ka gona, Babenjamini ba boa ka yona nako yeo. Baisiraele ba ba fa basadi bao ba ilego ba ba tlogela ge ba be ba bolaya basadi ba Jabeshe-gileada, eupša ba se ba lekane.
15 Baisiraele ba ile ba nyama ka gobane Jehofa o be a arogantše Babenjamini go meloko e mengwe ya Isiraele.
16 Banna ba bagolo ba setšhaba ba re: “Re swanetše go dira’ng gore re hweletše Babenjamini bao ba šetšego basadi ka ge basadi ba Babenjamini ba bolailwe ka moka?”
17 Ke moka ba re: “Babenjamini ka moka bao ba šetšego ba swanetše go fiwa bohwa bja bona e le gore moloko wa bona o se ke wa hwelela Isiraeleng.
18 Eupša rena ga re a dumelelwa go ba nea barwedi ba rena gore e be basadi ba bona, ka gobane Baisiraele ba enne ba re: ‘Go rogakwe yo a neago Babenjamini mosadi.’”
19 Ke moka ba re: “Tsebang gore go na le monyanya wo o direlwago Jehofa ngwaga le ngwaga kua Shilo yeo e lego ka leboa la Bethele go ya ka bohlabela bja tsela e kgolo, yeo e rotogago e etšwa Bethele e leba Shikeme le ka borwa bja Lebona.”
20 Ka gona, ba laela Babenjamini ba re: “Sepelang le yo lalela dirapeng tša meterebe.
21 Ge le bona barwedi ba Shilo ba etla go bina, lena le tšwe dirapeng tša meterebe gomme le itšeele basadi go barwedi ba Shilo gomme le boele nageng ya Benjamini.
22 Ge botatago bona goba dikgaetšedi tša bona ba ka re bona molato, re tla re go bona: ‘Re kgopela le ba kweleng bohloko ka gobane rena re paletšwe ke go hweletša yo mongwe le yo mongwe wa bona mosadi ka baka la ntwa. Le gona, ge le ka ba fa basadi le tlo ba le molato.’”
23 Ka gona banna ba Benjamini ba dira seo ba se boditšwego, gomme yo mongwe le yo mongwe wa bona a itšeela mosadi go basadi bao ba bego ba bina. Ka morago ba boela nageng yeo ba bego ba e abetšwe. Ba tsošološa metse gomme ba dula go yona.
24 Ka nako yeo Baisiraele ba tloga moo, yo mongwe le yo mongwe a ya molokong wa gabo le lapeng la gagwe gomme ba tloga moo, yo mongwe le yo mongwe a ya nageng yeo a bego a e filwe gore e be bohwa bja gagwe.
25 Mehleng yeo go be go se na kgoši kua Isiraele. Yo mongwe le yo mongwe o be a dira seo a bonago se lokile.
Mengwalo ya tlase
^ Goba, “tša mohlakanelwa.”
