Go Bafilipi 2:1-30
2 Ka ge le kgothatšana ka baka la ge le le boteeng le Kriste, ka ge le homotšana ka gobane le ratana, ka ge le naganelana le šokelana e bile le kwelana bohloko,
2 tšwelang pele le dira dilo tše, le nagana go swana, le bontšhana lerato le le swanago, le be ngatana e tee e bile le be batee ka kgopolo. Ge le dira bjalo le tla nthabiša kudu.
3 Le se dire selo ka tshele goba ka gobane le ipona le le bohlokwa kudu, eupša ikokobetšeng le tšee ba bangwe ba le feta ka bogolo.
4 Le se ke la tshwenyega ka lena le nnoši eupša le tshwenyege le ka batho ba bangwe.
5 Dulang le nagana ka tsela yeo Kriste Jesu le yena a bego a nagana ka yona.
6 Le ge a be a swana le Modimo ka sebopego, ga se a ka a leka go lekana le Modimo ka tsela le ge e le efe.
7 Go e na le moo, o ile a tlogela dilo ka moka tšeo a bego a na le tšona a ba bjalo ka mohlanka, a ba motho.
8 Go oketša moo, ge a etla e le motho, o ile a ikokobetša gomme a bontšha gore o a kwa go fihlela a ehwa koteng ya tlhokofatšo.
9 Ka baka leo, Modimo o ile a mo phagamiša a mo fa maemo a godimo gomme a mmontšha botho ka go mo nea leina la go feta maina ka moka,
10 e le gore yo mongwe le yo mongwe a khuname leineng la Jesu, a ka ba a le legodimong goba a le lefaseng goba a le ka tlase ga lefase,*
11 le gore motho yo mongwe le yo mongwe* a dumele phatlalatša gore Jesu Kriste ke Morena gore Modimo Tate a tumišwe.
12 Banabešo le dikgaetšedi ba ba rategago, le be le dutše le ekwa Modimo ge ke be ke na le lena, gomme gona bjale le mo kwa le go feta le ge ke se gona. Tšwelang pele le šoma ka thata gore le tle le phološwe gomme le dire bjalo ka tlhompho e kgolo le poifo.
13 Gobane Modimo ke yena yo a le fago mafolofolo, a le neago kganyogo le matla a gore le dire dilo tšohle tšeo a di ratago.
14 Dulang le dira dilo tšohle ka ntle le go ngongorega le go ngangišana,
15 e le gore le be ba ba hlwekilego le bao ba se nago molato, le be bana ba Modimo bao ba hlokago sebe gare ga moloko wo o mobe wo o sa dirego dilo tša go loka, wo le phadimago bjalo ka dietša gare ga wona,
16 le swareletše ka go tia lentšung la Modimo leo le re neago bophelo, e le gore ge letšatši la Kriste le fihla ke thabišwe ke gore ga se ka kitimela lefeela goba go šomela lefeela.
17 Lega go le bjalo, ke le thabetše kudu le ge ke tšhollwa bjalo ka sebego sa seno tirelong e kgethwa yeo le e amogetšego ka baka la tumelo ya lena.
18 Ka mo go swanago, le lena le swanetše go thaba le nna.
19 Ge e ba e le thato ya Morena Jesu, ke duma go romela Timotheo go lena kgauswinyane, e le gore ke kgothatšwe ke dilo tšeo a tlago go nkanegela tšona ka lena.
20 Gobane ga ke na yo mongwe yo a swanago le yena* yo a tlogago a tshwenyegile ka lena.
21 Gobane ba bangwe ka moka ba nyaka tšeo di kgahlago bona, e sego Jesu Kriste.
22 Eupša yena o ipontšhitše gore ga a swane le bona ka gobane o ile a hlankela le nna go boleleng ditaba tše dibotse, go swana le ngwana yoo a šomago le tatagwe.
23 Ka gona, ke yena ke nyakago go mo romela go lena gateetee ge ke se na go bona gore go tla direga eng ka nna.
24 Ke kgodišegile gore ge e ba e le thato ya Morena le nna ke tla tla go lena e se kgale.
25 Eupša gona bjale ke bona go swanetše gore ke le romele ngwanešo Epaforodito, yo le yena e lego lešole la Kriste le modirišani gotee le nna, le be le mo rometše go nna gore a tle a ntlhankele le go nthuša ka dilo tšeo ke di hlokago.
26 Gona bjale o hlologetše go le bona gomme o gateletšegile kudu ka ge le kwele gore o a babja.
27 Yena ka nnete o be a babja a le kgauswi le go hwa, eupša Modimo o ile a mo kwela bohloko, a ba a kwela le nna bohloko e le gore ke se ke ka kwa bohloko godimo ga bjo bongwe.
28 Ka gona, ke mo romela go lena kapelapela gore ge le mmona le boele le thabe gomme le nna ke se ke ka belaela kudu.
29 Mo amogeleng ka pelo ka moka ka tsela yeo le dulago le amogela balatedi ba Morena, gomme le dule le swara banna ba mohuta woo ka tlhompho,
30 ka gobane o nyakile a ehwa ka baka la modiro wa Kriste, a ba a bea bophelo bja gagwe kotsing ka gore a tle a ntlhankele ka ge lena le be le ka se kgone go tla.
Mengwalo ya tlase
^ Mo go bolelwa ka bahu bao ba tlago go tsošwa.
^ Phetolelo ya lentšu ka lentšu e re, “leleme le lengwe le le lengwe.”
^ Phetolelo ya lentšu ka lentšu e re, “yo a nago le kgopolo e swanago le ya gagwe.”
