Go Bafilipi 3:1-21
3 Sa mafelelo banabešo, tšwelang pele le thaba ka gobane le boteeng le Morena. Ga ke lapišwe ke go le ngwalela selo setee gantšhi, e bile seo se a le šireletša.
2 Phafogelang batho bao ba itshwarago bjalo ka dimpša.* Phafogelang bao ba dirago dilo tše di gobatšago, phafogelang bao ba kgothaletšago lebollo.*
3 Ka gobane rena re bolotše e le ka kgonthe, ka ge re dira tirelo e kgethwa ka moya wa Modimo, re ikgantšha ka dilo tšeo Kriste Jesu a di dirilego, eupša ga re ikgantšhe ka dilo tšeo di dirilwego ke batho.
4 Ge e ba go e na le motho yo a nago le mabaka a go ikgantšha ka dilo tšeo di dirilwego ke batho, motho yoo ke nna.
Ke na le mabaka a mantšhi a go ikgantšha ka dilo tšeo di dirilwego ke batho.
5 Ke boloditšwe letšatšing la seswai, ke le wa setšhaba sa Isiraele, wa moloko wa Benjamini, Moheberu yo a tswetšwego ke Baheberu, gomme ka molao ke Mofarisei.
6 Ke be ke fišegela go tlaiša phuthego, ke dira dilo ka moka tšeo di bego di nyakwa ke molao e bile ke sa tshele le setee.
7 Lega go le bjalo, dilo tšeo di bego di le bohlokwa go nna ke di tlogetše ke thabile* ka baka la Kriste.
8 Ka nnete ke kgethile go tlogela dilo ka moka ka baka la tsebo e bohlokwa yeo ke e hweditšego ka Kriste Jesu Morena wa ka. Ka baka la gagwe ke ile ka amogela go tlogela dilo ka moka gomme ka di tšea e le ditšhila, e le gore ke amogele Kriste
9 gomme ke lebelelwe ke le molatedi wa gagwe, eupša ga ke bolele gore ke lokile ka ge ke latela Molao, go e na le moo ke lebelelwa ke lokile ka gobane ke dumela go Kriste. Ka nnete Modimo o lebelela bao ba dumelago go Kriste ba lokile.
10 Ke ikemišeditše go mo tseba le go tseba matla a yo a mo tsošitšego le go tlaišega go swana le yena, ka go re’alo ka ikemišetša go hwa go swana le yena,
11 ke dira se go bona ge e ba go kgonega gore ke tle ke be gare ga bao ba tlago go tsošwa tsogong ya pele.
12 Ga se gore ke šetše ke boditšwe gore ke tlo tsošwa pele goba ke šetše ke phethagetše, eupša ke sa šomela gore ke swanelegele seo Kriste Jesu a nkgethetšego sona.
13 Banabešo, ga ke itšee ke šetše ke hweditše moputso woo, eupša ke leka go lebala dilo tša kua morago gomme ka phegelela go hwetša dilo tšeo di lego kua pele.
14 Ke šomela go hwetša moputso wa Modimo wa go tsošetšwa legodimong woo a o neago ka Kriste Jesu.
15 Ka gona anke rena bao re tiilego tumelong re naganeng ka tsela ye, gomme ge e ba go na le yo mongwe yo a sa naganego ka tsela ye, Modimo o tla mo thuša gore a nagane ka tsela ye.
16 Lega go le bjalo, dilo tšeo re di dirilego gore tumelo ya rena e tie, a re tšweleng pele re di dira.
17 Banabešo, ekišang mohlala wa ka le le batee gomme le be le ekiše mohlala wa bao ba dirago dilo ka tsela e dumelelanago le mohlala wo re le beetšego wona.
18 Gobane go na le batho ba bantšhi bao ba itirilego manaba a kota ya tlhokofatšo* ya Kriste. Ke be ke rata go le botša ka bona gantšhi eupša gona bjale ke le botša ka bona ke lla.
19 Modimo wa bona ke mpa ya bona, ba ikgantšha ka dilo tšeo di lešago dihlong gomme ba dula ba nagana ka dilo tša mo lefaseng, ke ka baka leo mafelelong ba tlago go fedišwa.
20 Eupša rena ga gabo rena ke legodimong. Re fela pelo ya gore Morena Jesu Kriste a tle a re phološe a etšwa legodimong.
21 O tla diriša matla a gagwe a magolo ao a a neilwego go buša dilo ka moka le go fetola mebele ya rena e fokolago gore e swane le wa gagwe wa letago.
Mengwalo ya tlase
^ Ke gore, “batho ba sa hlwekago boitshwarong.”
^ Phetolelo ya lentšu ka lentšu e re, “bao ba ripago nama.”
^ Goba, “ke di tlogetše ka go rata.”
^ Bona Tlhaloso ya Mantšu.
