Go Bafilipi 4:1-23
4 Bjale lena banabešo bao ke ba ratago le bao ke hlologetšego go ba bona, lena bao ba nthabišago le bao ba swanago le mphapahlogo go nna, emang le tiile le le balatedi ba Morena.
2 Ke eletša Ebodia le Sintike gore e be ba monagano o tee ge ba dutše ba hlankela Morena.
3 Ke kgopela le wena mošomigotee le nna yo a tshepegago gore o tšwele pele o thuša basadi ba bao ba šomilego le nna ka thata go bolela ditaba tše dibotse, e bile ba šomile le Klemente le Bakristegotee le rena ba bangwe bao maina a bona a lego ka pukung ya bophelo.
4 Dulang le thabile ka baka la Morena. Ke tla bolela gape ka re, Thabang!
5 Anke batho ka moka ba boneng gore le kgona go fetofetoga le maemo.* Le se ke la lebala gore Morena o kgauswi.
6 Le se ke la belaela ka selo, eupša ge go na le dilo tšeo le di nyakago, di botšeng Modimo ka thapelo, le mo rapeleng ka pelo ka moka* le be le mo leboge.
7 Ke moka Modimo o tla šomiša Kriste Jesu go le nea khutšo yeo batho ba sa kgonego go e kwešiša gomme khutšo yeo e tla šireletša dipelo tša lena le menagano ya lena.
8 Ka gona banabešo, tšwelang pele le naganišiša ka dilo le ge e le dife tšeo e lego tša nnete, dilo le ge e le dife tšeo di lego bohlokwa, dilo le ge e le dife tše di lokilego, dilo le ge e le dife tše di hlwekilego, dilo le ge e le dife tše di rategago, dilo le ge e le dife tšeo go bolelwago gabotse ka tšona, dilo le ge e le dife tše di kgahlišago le dilo le ge e le dife tšeo batho ba ka di tumišago.*
9 Tlwaelang go dira dilo tšeo le ithutilego tšona go nna la ba la di amogela, le tšeo le kwelego ke di bolela le tšeo le bonego ke di dira, ke moka Modimo wa khutšo o tla le šegofatša.
10 Ka ge ke le mohlanka wa Morena, ke thaba kudu gore le boetše le bontšha gore le nagana ka nna gape. Le be le dutše le nagana ka nna eupša le se na sebaka sa go mpontšha seo.
11 Ga ke bolele se ka gobane ke nyaka gore le mphe dilo ka ge ke ithutile gore go sa šetšwe gore maemo a ka a bjang, ke kgotsofalele dilo tšeo ke nago le tšona.
12 Ke a tseba gore go bjang go ba le dilo tše dintšhi le go ba le dilo tše dinyenyane. Le gona ke ithutile sephiri sa go kgotsofala dilong ka moka le maemong ka moka, go sa šetšwe gore ke na le dilo tše dintšhi goba tše dinyenyane, ke swerwe ke tlala goba ke khoše.
13 Ka gona ke kgona go dira dilo ka moka ka ge Morena a mpha matla.
14 Eupša le dirile gabotse ka go nthuša ge ke be ke tlaišega.
15 Lena Bafilipi, le tseba gabotse gore ka morago ga gore le ithute ditaba tše dibotse le ka morago ga gore ke tloge Matsedonia, go diphuthego ka moka tšeo ke di thušitšego, ke phuthego ya lena feela yeo e ilego ya nthuša,
16 ka gobane le ge ke be ke le kua Thesalonika, le ile la nthomela dilo tšeo ke bego ke di hloka ka makga a mabedi.
17 Ga se gore ke nyaka le nthomela dimpho, eupša ke nyaka gore le oketše dilo tše dibotse tšeo le di direlago Modimo.
18 Ke na le dilo ka moka tšeo ke di hlokago e bile ke tše dintšhi, ka gobane ke hweditše dilo tšeo le romilego Epaforodito gore a mphe tšona. Dilo tšeo di bjalo ka sehlabelo seo se nkgago bose le seo se thabišago Modimo.
19 Ka baka leo, Modimo wa ka yo a nago le dilo tše dintšhi o tla diriša Kriste Jesu go le nea dilo ka moka tšeo le di hlokago.
20 Bjale a re tumišeng Modimo Tatago rena go ya go ile. Amene.
21 Ke kgopela le ntumedišetšeng bakgethwa ka moka bao ba lego boteeng le Kriste Jesu. Banabešo bao ba nago le nna le bona ba a le dumediša.
22 Bakgethwa bohle ba a le dumediša, kudukudu bao ba lego ntlong ya Kesara.
23 Anke Morena Jesu Kriste a le bontšhe botho bjo bogolo ka baka la moya o mobotse wo le o bontšhago.
Mengwalo ya tlase
^ Goba, “go lekalekana.”
^ Goba, “le mo lopeng.”
^ Goba, “tšeo di ka thabišago Modimo.”
