Lengwalo le le Yago go Bakolose 1:1-29
1 Nna Paulo, moapostola wa Kriste Jesu go ya ka thato ya Modimo, le Timotheo ngwanabo rena,
2 ke ngwalela bakgethwa le banababo rena ba ba botegago bao ba lego boteeng le Kriste, bao ba lego Kolose ke re:
Re rapela gore Modimo Tatago rena a le bontšhe botho bja gagwe bjo bogolo a be a le fe le khutšo.
3 Re dula re leboga Modimo Tatago Morena wa rena Jesu Kriste ge re le rapelela,
4 ka gobane re kwele ka tumelo yeo le nago le yona go Kriste Jesu le lerato leo le le bontšhago bakgethwa bohle,
5 ka baka la ditšhegofatšo tšeo Modimo a tlago go le nea tšona magodimong. Le kwele ka tšona ge go be go bolelwa molaetša wa therešo wa ditaba tše dibotse.
6 Ditaba tše dibotse tšeo le di kwelego di a oketšega e bile di enywa dienywa. Le go lena go bjalo, ga e sa le go tloga letšatšing leo le di kwelego le go kwešiša gabotse gore botho bjo bogolo bja Modimo ke eng.
7 Se ke seo le ithutilego sona go Epafora mohlankagotee le rena yo a rategago. Mohlanka yo yoo a botegago wa Kriste o dira modiro woo re bego re ka o dira ge nkabe re na le lena.
8 O ile a ba a re tsebiša le gore moya o mokgethwa o le thuša gore le bontšhe lerato.
9 Ke ka baka leo go tloga letšatšing leo re kwelego ka lerato la lena le tumelo ya lena, re sa kago ra kgaotša go le rapelela le go le kgopelela gore le be le tsebo e nepagetšego ya thato ya Modimo gomme le be ba bohlale le go kwešiša dilo tša Modimo,
10 gore le kgone go phela ka tsela yeo Jehofa a e amogelago e le gore le mo thabiše dilong ka moka gore le lena ka mo go swanago le dire mediro e mebotse gomme le dule le oketša tsebo ya lena e nepagetšego ka Modimo.
11 Re rapela le gore Modimo a le fe matla a gagwe a magolo e le gore le kgone go kgotlelela le sa fele pelo e bile le thabile,
12 gomme le leboge Modimo, yena Tate. Ka gobane o le lokišeleditše gore le tle le hwetše bohwa bjoo a bo tshepišitšego bakgethwa bao ba lego seetšeng.
13 O re ntšhitše leswiswing* gomme a re iša mmušong wa Morwa wa gagwe yo a rategago,
14 yoo a re lokollotšego sebeng ka topollo gomme ra lebalelwa dibe tša rena.
15 Ke yena seswantšho sa Modimo yo a sa bonagalego, leitšibulo la tlholo yohle,
16 ka gobane Modimo o dirišitše yena go bopa dilo ka moka tšeo di lego magodimong le tšeo di lego lefaseng, tšeo re kgonago go di bona le tšeo re sa kgonego go di bona, e ka ba e le babuši goba baetapele goba mebušo goba balaodi. Dilo tše dingwe ka moka di hlodilwe go dirišwa yena e bile di hloletšwe yena.
17 Le gona, o bile gona pele dilo tše dingwe ka moka di ka ba gona e bile Modimo o dirišitše yena go bopa dilo tše dingwe ka moka.
18 Ke yena hlogo ya phuthego yeo e lego mmele wa gagwe. Ke yena mathomo a dilo ka moka, e bile ke motho wa mathomo go tsošwa bahung. E dula e le wa mathomo dilong ka moka,*
19 ka gobane Modimo o be a nyaka gore dika tša gagwe ka moka di be go Kriste.
20 Le gona, Modimo o boelantše dilo ka moka go yena a diriša madi a Kriste ao a tšholotšwego koteng ya tlhokofatšo, go sa šetšwe gore ke dilo tše di lego magodimong goba tšeo di lego lefaseng.
21 Ruri lena bao le bego le le kgole le Modimo, e bile le le manaba a gagwe ka gobane le nagana dilo tše mpe,
22 ga bjale Modimo o le boelantše le yena a diriša mmele wa yoo a ilego a ineela gore a hwe e le gore a le bone le le ba bakgethwa, le se na bosodi e bile go se na seo le latofatšwago ka sona,
23 ge feela le tšwela pele le tiile tumelong gomme le sa šišinyege, le sa lahle kholofelo yeo le bilego le yona ka morago ga go kwa ditaba tše dibotse tšeo di bego di bolelwa lefaseng ka moka. Nna Paulo ke kgethilwe gore ke bolele ditaba tše tše dibotse.
24 Ga bjale ke a thaba gaešita le ge ke tlaišega ka baka la lena. Eupša ke kwa okare ga se ka tlaišega ka mo go lekanego ka baka la mmele wa Kriste woo e lego phuthego.
25 Ke hlankela batho ba Modimo ka gobane Modimo o nkgethetše tirelo ye. Go dira bjalo go hola lena. Ke ka baka leo ke dirago sohle seo nka se kgonago gore ke bolele lentšu la Modimo,
26 e lego sephiri sa Modimo se sekgethwa. Sephiri seo se be se sa tsebje lefaseng e bile le batho bao ba phetšego nakong ya kgale ba be ba sa se tsebe. Eupša ga bjale o se utolletše bakgethwa ba gagwe.
27 Modimo o utolletše ditšhaba sephiri sa gagwe se sekgethwa seo se tletšego ka letago le dilo tša gagwe tše bohlokwa. Sephiri seo ke sa gore Kriste o boteeng le lena e lego seo se bolelago gore le na le kholofelo ya go tlo tagafatšwa le yena.
28 Ke yena yo re botšago batho ka yena. Re lemoša batho ka moka e bile re ba ruta ka bohlale e le gore re lebiše motho yo mongwe le yo mongwe go Modimo e le morutwana wa Kriste yo a godilego ka tsebo.
29 Se ke sona seo ge e le gabotse ke se šomelago ka thata e bile ke dira sohle seo nka se kgonago ka baka la matla ao a mphago ona.
Mengwalo ya tlase
^ Phetolelo ya lentšu ka lentšu e re, “O re hlakodišitše matleng a leswiswi.”
^ Ke gore, “ke wa mathomo ka maemo le ka bohlokwa.”
