Lengwalo le le Yago go Bakolose 4:1-18
4 Lena beng ba bao ba šomago, swarang bao ba le šomelago ka tsela e botse le ya maleba, le tseba gore le lena le na le Mong wa lena legodimong.
2 Le dule le rapela. Ge le dutše le dira bjalo, le dule le phakgame gomme le leboge Modimo.
3 Le rena le re rapeleleng gore Modimo a re thuše go bolela lentšu la gagwe le sephiri se sekgethwa sa mabapi le Kriste, seo ke golegilwego ka baka la sona,
4 le gore ke se bolele gabotse kamoo ke swanetšego go se bolela ka gona.
5 Le phele ka tsela e bontšhago bohlale pele ga batho bao e sego Bakriste, le šomiše nako ya lena go dira dilo tša bohlokwa.
6 Mantšu a lena ka mehla e be ao a kgahlišago bjalo ka ge eka a tšhetšwe ka letswai, ka go re’alo le tla tseba kamoo le swanetšego go araba motho yo mongwe le yo mongwe ka gona.
7 Ngwanešo yo a rategago Tigiko, modiredi yo a botegago le mohlankagotee le nna Moreneng o tla le tsebiša ditaba tša ka ka moka.
8 Ke mo romela go lena gore a le botše gore re phela bjang le gore a le homotše.
9 O tla tla le Onesimo ngwanešo yo a botegago le yo a rategago, yo a tšwago nageng ya gabo lena, gomme ba tla le botša dilo ka moka tšeo di diregago mo.
10 Aristareko yo a golegilwego le nna o a le dumediša, le Mareka motswala wa Baranaba le yena o a le dumediša, (Mareka yo ke yo ke le laetšego gore le mo amogele ge a ka tla go lena,)
11 le Jesu yo a bitšwago Justose o a le dumediša. Ba ke ba bangwe ba bao ba bolotšego. E bile ba šoma le nna go bolela ditaba tše dibotse tša Mmušo wa Modimo gomme ba a nthuša le go mmatlafatša.
12 Epafora mohlanka wa Kriste Jesu yo a tšwago nageng ya gabo lena, o a le dumediša. O dula a le rapelela ka matla gore tumelo ya lena e tie, le gore le dumele dilo ka moka tšeo di sepedišanago le thato ya Modimo.
13 Ka gobane ke mmone gore o šoma ka thata gore a le thuše le go thuša bao ba lego Laoditsea gotee le bao ba lego Hierapoli.
14 Luka ngaka e rategago o a le dumediša, Dema le yena o a le dumediša.
15 Ntumedišetšeng banababo rena ba ba lego Laoditsea le be le dumediše le kgaetšedi Nimfa le phuthego yeo e lego ntlong ya gagwe.
16 Ge le baletšwe lengwalo le, le neeng ba phuthego ya Laoditsea gore le bona ba le bale gomme le lena le bale leo ke le rometšego Laoditsea.
17 Botšang Arekipase le re: “Dula o šoma ka thata go phetha mošomo woo o o neilwego ke Morena.”
18 Nna Paulo, ke le ngwalela tumedišo ye ka seatla sa ka. Dulang le gopola gore ke tlemilwe ka diketane mo teronkong. Eka botho bjo bogolo bja Modimo bo ka ba le lena.
