Daniele 4:1-37
4 Kgoši ya ngwala gore: “Wo ke molaetša wo o tšwago go Kgoši Nebukadinetsara wo o yago go batho ba ditšhaba ka moka le maleme ka moka bao ba lego lefaseng ka moka: Anke le be le khutšo le be le atlege!
2 Ke thabela go le tsebiša ka mehlolo le dilo tše dibotse tšeo Modimo yo Godimodimo a ntiretšego tšona.
3 Mehlolo ya gagwe ke e megolo e bile dilo tšeo a di dirago di bontšha gore o na le matla. Mmušo wa gagwe ke wa go ya go ile e bile o buša go tloga molokong o mongwe go ya go o mongwe.
4 “Nna Nebukadinetsara ke be ke iketlile ka ntlong ya ka e bile dilo di sepela gabotse ka mošate wa ka.
5 Ke ile ka lora toro yeo e ilego ya ntšhoša. Ge ke be ke robetše mpeteng wa ka, ke ile ka bona diswantšho le dipono tšeo di ilego tša ntšhoša.
6 Ka gona ka ntšha taelo ya gore go bitšwe banna ka moka ba bohlale ba Babilona e le gore ba tle ba mpotše gore toro yeo e ra goreng.
7 “Ka nako yeo go ile gwa tsena baperisita bao ba dirago dilo tša maleatlana, boramalea, Bakaladea le batho bao ba tsebago thuto ya dinaledi. Ge ke ba botša gore ke lorile eng, ba ile ba palelwa ke go ntlhathollela toro yeo.
8 Mafelelong gwa tla Daniele, e lego Belteshatsara, yo a reeletšwego leina la modimo wa ka, e bile o be a na le moya wa medimo e mekgethwa. Ke ile ka mo anegela toro yeo, ka re:
9 “‘Wena Belteshatsara, wena yo mogolo go baperisita bao ba dirago dilo tša maleatlana, ke a tseba gore o na le moya wa medimo e mekgethwa e bile ga go na sephiri seo o palelwago ke go se utolla. Bjale ntlhalosetše gore ke bone eng torong ya ka le gore toro yeo e ra goreng.
10 “‘Ge ke be ke robetše mpeteng wa ka, ke ile ka bona mohlare woo o bego o le gare ga lefase. E be e le o motelele ka tsela e tšhošago.
11 Mohlare woo o ile wa gola, wa tia, wa ba wa fihla magodimong ka botelele. Le gona o be o bonagala lefaseng ka moka.
12 Matlakala a wona e be e le a mabotse e bile o na le dienywa tše dintšhi tšeo di bego di fepa batho ka moka le diphoofolo ka moka. Diphoofolo tša naga di be di dula ka tlase ga moriti wa wona, dinonyana tša magodimong di dula makaleng a wona gomme dibopiwa ka moka di eja dienywa tša wona.
13 “‘Ge ke le mpeteng wa ka ke ile ka bona dipono. Ke ile ka bona moleti yo e lego mokgethwa, a theoga a etšwa magodimong.
14 O ile a goeletša a re: “Remang mohlare woo le ripe makala a wona. Hlohlorang matlakala a wona le gašanyeng dienywa tša wona. Anke diphoofolo tša naga di tšhabe ka fase ga wona, le dinonyana di tšhabe makaleng a wona.
15 Eupša le tlogele kutu ya wona le medu ya wona mobung. Le tleme kutu yeo ka lepanta la tšhipi le koporo gare ga bjang bja naga. Anke e kolobišwe ke phoka ya magodimong gomme e dule le diphoofolo tša naga gare ga dimela tša lefase.
16 Anke pelo ya wona e fetošwe gore e se sa ba pelo ya motho gomme e fiwe pelo ya phoofolo ya naga. Le gona anke go fete dinako tše šupago e dutše e le boemong bjoo.
17 Ye ke taelo yeo e tsebišitšwego ke baleti e bile e kgopetšwe ke bakgethwa, e le gore batho bao ba phelago ba tsebe gore Modimo yo Godimodimo ke Mmuši wa mebušo ya batho. Le gona mmušo woo o o nea yoo a nyakago go mo nea wona e bile a ka o fa le motho wa maemo a tlase gare ga batho ka moka.”
18 “‘Ye ke yona toro yeo nna Kgoši Nebukadinetsara ke e lorilego. Bjale wena Belteshatsara mpotše gore toro ye e ra goreng, ka gobane banna ba bangwe ba bohlale ka moka ba mmušong wa ka ga ba kgone go e hlatholla. Eupša wena o ka kgona go e hlatholla ka gobane o na le moya wa medimo e mekgethwa.’
19 “Ka nako yeo, Daniele yoo leina la gagwe e bego e le Belteshatsara o ile a tšhoga ka nakwana a ba a tšhošwa ke dilo tšeo a bego a di nagana.”
Ke moka ka re: “Wena Belteshatsara, o se ke wa tšhošwa ke toro yeo le tlhathollo ya yona.”
Belteshatsara a re: “Kgoši mong wa ka, okare dilo tšeo o di lorilego di ka diragalela batho bao ba go hloilego gomme tlhathollo ya toro yeo ya diragalela manaba a gago.
20 “Mohlare woo o o bonego, woo o ilego wa gola, wa tia wa ba wa fihla magodimong ka botelele e bile o bonagala lefaseng ka moka,
21 le woo matlakala a wona e bego e le a mabotse e bile o na le dienywa tše dintšhi tšeo di bego di fepa batho ka moka le diphoofolo ka moka, woo diphoofolo tša naga di bego di dula ka fase ga wona, dinonyana tša magodimong di dula makaleng a wona,
22 ke wena kgoši, ka gobane o ile wa gola kudu gomme wa ba le matla. O ile wa gola kudu wa ba wa fihla magodimong gomme wa buša go fihla dinageng tša kgole.
23 “Kgoši e ile ya bona moleti yoo e lego mokgethwa, a theoga a etšwa magodimong, yoo a bego a re: ‘Remang mohlare woo le o senye, eupša le tlogele kutu ya wona le medu ya wona mobung. Le tleme kutu yeo ka lepanta la tšhipi le koporo gare ga bjang bja naga. Anke e kolobišwe ke phoka ya magodimong gomme e dule le diphoofolo tša naga go fihlela go feta dinako tše šupago e dutše e le boemong bjoo.’
24 Wena kgoši, ye ke tlhathollo ya toro yeo o e lorilego. Ke taelo yeo Modimo yo Godimodimo a e ntšhitšego gore e diragalele wena kgoši mong wa ka.
25 O tla rakwa gare ga batho, wa dula le diphoofolo tša naga gomme wa fula bjang go swana le dipoo. O tla kolobišwa ke phoka ya magodimo gomme go tla feta dinako tše šupago o dutše o le boemong bjoo, go fihlela o tseba gore Modimo yo Godimodimo ke Mmuši wa mebušo ya batho e bile mmušo woo o o nea yoo a nyakago go mo nea wona.
26 “Eupša ka ge taelo e be e itše kutu le medu ya wona di tlogelwe, ka morago ga gore o tsebe gore Modimo o a buša magodimong, mmušo wa gago o tla boela go wena gape.
27 Ka gona, wena kgoši anke o amogele keletšo ya ka. Tlogela go dira dibe gomme o dire dilo tša go loka. O tlogele go dira dilo tše mpe gomme o gaugele badiidi. Mohlomongwe dilo di ka go sepelela gabotse ka nako e telele.”
28 Dilo tše ka moka di ile tša diragalela Kgoši Nebukadinetsara.
29 Ka morago ga dikgwedi tše 12 o be a itshepelela ka godimo ga ntlo ya mošate wa Babilona.
30 Kgoši Nebukadinetsara o be a ipotša a re: “Na ye ga se Babilona e Kgolo yeo ke e agilego ka matla a ka gore e be mošate e le gore ke hlomphiwe ka baka la bogolo bja ka?”
31 Ya re ge kgoši e sa dutše e bolela, gwa kwagala lentšu le etšwa magodimong le re: “Wena Kgoši Nebukadinetsara, o botšwa gore: ‘Mmušo o tlogile go wena,
32 e bile o rakwa bathong. O tla dula le diphoofolo tša naga gomme o tla fula bjang go swana le dipoo. Le gona go tla feta dinako tše šupago o dutše o le boemong bjoo go fihlela o tseba gore Modimo yo Godimodimo ke Mmuši wa mebušo ya batho. Le gona, mmušo woo, o o nea yoo a nyakago go mo nea wona.’”
33 Ka yona nako yeo, dilo tšeo di boletšwego ka Nebukadinetsara, di ile tša phethagala. O ile a rakwa gare ga batho gomme a thoma go fula bjang go swana le dipoo. Ke moka mmele wa gagwe wa kolobišwa ke phoka ya magodimong go fihlela moriri wa gagwe e eba o motelele go swana le mafofa a dintšhu gomme manala a gagwe a swana le manala a dinonyana.
34 Ke moka kgoši ya re: “Ge dinako tšeo di fedile, nna Nebukadinetsara ka lebelela magodimong gomme mogopolo wa ka wa boa gape. Ke moka ka reta Modimo yo Godimodimo gomme ka tumiša yo a phelago go ya go ile ka ba ka mo tagafatša ka gobane bogoši bja gagwe ke bja go ya go ile gomme o buša go tloga molokong o mongwe go ya go o mongwe.
35 Batho ka moka bao ba dulago lefaseng, ga se selo ge ba bapetšwa le Modimo. O dira dilo ka go dumelelana le thato ya gagwe gare ga madira a magodimong le gare ga batho bao ba dulago lefaseng e bile ga go na motho yo a ka mo thibelago goba a re go yena: ‘O dirile eng?’
36 “Ka nako yeo, mogopolo wa ka o ile wa boa gape. Gwa boa mmušo wa ka le seriti sa wona. Ka boela ka hlomphiwa le go tagafatšwa gape. Bahlankedi ba ka ba bagolo le batho ba maemo ba thoma go bontšhana mabaka le nna gape. Le gona ke ile ka bušetšwa mmušong wa ka, ka ba ka hlomphiwa go feta le peleng.
37 “Bjale nna Nebukadinetsara ke tumiša Kgoši ya magodimong e bile ke a e tagafatša. Dilo ka moka tšeo e di dirago di lokile e bile ditsela tša yona ke tša toka ka gobane e kgona go kokobetša bao ba ikgantšhago.”
