Diema 14:1-35
14 Mosadi yo bohlalehlale o aga ntlo ya gagwe,Eupša wa lešilo o phušola ntlo ya gagwe ka diatla tša gagwe.
2 Yo a dirago dilo tša go loka o boifa Jehofa,Eupša yo a dirago dilo tša bohwirihwiri o a mo nyatša.
3 Mantšu a boikgogomošo ao setlaela se a bolelago a swana le thupa,Eupša mantšu ao a bolelwago ke batho ba bohlale a tla ba šireletša.
4 Lefelo leo dikgomo di jelago go lona le dula le hlwekile ge dikgomo di se gona,Eupša puno e ba e kgolo ge e ba go na le poo e matla.
5 Hlatse yeo e tshepegago e ka se bolele maaka,Eupša hlatse ya maaka e dula e bolela maaka.
6 Motho yo a ratago go kwera ba bangwe a ka se tsoge a hweditše bohlale le ge a ka bo nyaka,Eupša yo a nago le kwešišo o ithuta gabonolo.
7 Tloga pele ga setlaelaKa gobane o ka se hwetše tsebo ge o se theetša.
8 Motho yo bohlale o nagana pele a ka dira diphetho,Eupša ditlaela di forwa ke botlaela bja tšona.*
9 Mašilo a dira metlae ka dilo tše mpe tšeo a di dirilego,Eupša baloki ba ikemišeditše go lebalelana.
10 Motho yo a nyamilego ke yena feela a kwešišago bohloko bjoo a bo kwago,E bile ga go na motho yo mongwe yoo a ka kwešišago ge a thabile.
11 Ntlo ya batho ba babe e tla fedišwa,Eupša tente ya baloki e tla gola.
12 Go na le tsela yeo motho a e bonago e lokile,Eupša e feleletša ka go iša lehung.
13 Pelo ya motho e ka ba e ekwa bohloko le ge a dutše a sega,Le gona lethabo le ka feleletša ka manyami.
14 Motho yo a sa tshepegego o tla buna seo a se bjalago,Eupša motho wa go loka o tla putswa ka baka la dilo tše dibotse tšeo a di dirago.
15 Motho yo a se nago temogo o dumela mantšu ka moka,Eupša yo bohlale o a nagana pele a dira dilo.
16 Yo bohlale o boifa Modimo gomme a tlogela go dira dilo tše mpe,Eupša setlaela ga se na taba le selo e bile se itshepa kudu.
17 Yo a phakišetšago go galefa o dira tša bošilo,Eupša yo a naganago pele a dira dilo ga a ratwe.
18 Yo a hlokago temogo, ruri e tla ba setlaela,Eupša ba bohlale ba putswa ka tsebo.
19 Batho bao ba dirago dilo tše mpe ba tla swanelwa ke go khunama pele ga bao ba lokilego,Gomme ba babe ba tla khunama dikeiting tša baloki.
20 Modiidi o hloiwa le ke batho ba gabo,Eupša bagwera ba mohumi ke ba bantšhi.
21 Yo a nyatšago wa gabo o dira sebe,Eupša go thaba yoo a kwelago modiidi bohloko.
22 Bao ba logago maano a mabe ba tla lahlega,
Eupša batho ba tla rata bao ba ikemišetšago go dira dilo tše dibotse gomme ba ba tshepa.
23 Go šoma ka thata go a hola,Eupša go no bolela go dira gore motho a diile.
24 Batho ba bohlale ba kgabišwa ke mahumo a bona,Eupša ditlaela e tla dula e le ditlaela.
25 Hlatse yeo e bolelago nnete e phološa maphelo a batho ba bangwe,Eupša hlatse ya maaka e dula e bolela maaka.
26 Yo a boifago Jehofa o mo tshepa dilong ka moka,Gomme barwa ba gagwe ba tla hwetša lefelo leo ba tšhabelago go lona.
27 Batho bao ba boifago Jehofa ba tla dula ba phela,Gomme seo se ka ba phološa lehung.*
28 Kgoši yeo e nago le setšhaba se segolo e tla hlomphiwa,Eupša moetapele yoo a hlokago setšhaba o tla felelwa ke matla.
29 Bao ba sa galefego ka pela ba bontšha bohlale,Eupša bao ba felago pelo ba bontšha bošilo.
30 Go ba le khutšo ya monagano go dira gore mmele o phele gabotse,Eupša mona o swana le bolwetši bjoo bo hlaselago marapo.
31 Yo a radiago modiidi o nyatša Mmopi wa gagwe,Eupša yo a kwelago modiidi bohloko o tumiša Modimo.
32 Yo mobe o tla wišwa ke bobe bja gagwe,Eupša moloki o tla šireletšwa ka baka la go tshepega ga gagwe.
33 Motho yo a nago le kwešišo ga a ikgantšhe ka bohlale bja gagwe,Eupša setlaela se dula se ikgantšha ka dilo tšeo se di tsebago.
34 Go dira dilo tša go loka go dira gore setšhaba se hlomphege,Eupša go dira sebe go dira gore setšhaba se lewe ke dihlong.
35 Kgoši e kgahlwa ke mohlanka yo a dirago dilo ka bohlale,Eupša e galefela yoo a dirago dilo ka tsela yeo e lešago dihlong.
Mengwalo ya tlase
^ Goba mohlomongwe, “ditlaela di fora ba bangwe.”
^ Phetolelo ya lentšu ka lentšu e re, “molabeng wa lehu.”
