Diema 29:1-27
29 Motho yo a kgalemelwago leboelela eupša a no ngangabala,O tla robega ka pela gomme a se fole.
2 Ge baloki e le ba bantšhi, batho ba a thaba,Eupša ge go buša batho ba babe, batho ba a lla.
3 Motho yo a ratago bohlale o thabiša tatagwe,Eupša yo a gweranago le bagweba-ka-mmele o senya dilo tša gagwe tše bohlokwa.
4 Kgoši e tiiša naga ya yona ka go dira dilo tša toka,Eupša motho yo a nyakago pipamolomo o senya naga yeo.
5 Motho yo a foraforetšago wa gaboO ipeela molaba.
6 Motho yo mobe o tanywa ke dilo tše mpe tšeo a di dirilego,Eupša moloki o thabile e bile o a opela.
7 Moloki o a tshwenyega ge badiidi ba sa swarwe ka toka,Eupša yo mobe ga a tshwenyege.
8 Batho ba go ikgantšha ba tšhuma motse,Eupša ba bohlale ba a itshwara ge ba galefile.
9 Ge motho yo bohlale a ngangišana le lešilo,Ba ka se fihlelele selo ntle le go galefa le go kwerana.
10 Batho ba go rata go bolaya ba hloile bao ba se nago molato,E bile ba nyaka go bolaya baloki.*
11 Setlaela se ntšha bogale bja sona ka moka,Eupša yo bohlale o dula a thekgile ditho.
12 Ge mmuši a rata go theetša dipolelo tša maaka,Bahlanka ba gagwe ka moka e tla ba ba babe.
13 Modiidi le motho yo a gatelelago ba bangwe ba swana ka se:
Jehofa ke yena a ba fago bophelo.
14 Ge kgoši e ahlola badiidi ka toka,Pušo ya yona e tla dula e tiile.
15 Kgati le kgalemelo di a hlalefiša,Eupša ngwana wa go se laolege o hlabiša mmagwe dihlong.
16 Ge batho ba babe ba oketšega, bobe le bjona bo a oketšega,Eupša baloki ba tla bona ge ba fedišwa.
17 Laya morwa wa gago gore o se sa tshwenyega,Gomme yena o tla go thabiša kudu.
18 Ge batho ba sa diriše tlhahlo ya Modimo, ga ba laolege,Eupša go thaba bao ba latelago molao.
19 Mohlanka ga a phošollwe ka mantšu feela,Ka gobane le ge a a kwešiša ga a a latele.
20 Na o kile wa bona motho yo a phakišetšago go bolela?
Go kaone go thuša setlaela gore se fetoše tsela ya sona go e na le go thuša motho yoo.
21 Ge mohlanka a ka lepeletšwa go tloga e sa le moswa,Le ge a šetše a godile, o tla hloka tebogo.
22 Motho yo a galefago ka pela o baka diphapano.Yo mongwe le yo mongwe yo a galefago, o dira melato e mentšhi.
23 Motho o tla kokobetšwa ke boikgogomošo bja gagwe,Eupša yo mongwe le yo mongwe yo a ikokobetšago o tla hlomphiwa.
24 Yo a dirišanago le lehodu o ipakela mathata.
A ka botšwa gore a tle a hlatsele taba e itšego eupša a se bolele selo.
25 Go tšhaba batho go wetša molabeng,Eupša yoo a tshepilego Jehofa, o tla šireletšwa.
26 Batho ba bantšhi ba nyaka go bolela le mmuši gore ba swarwe ka toka,Eupša Jehofa ke yena a thušago motho gore a swarwe ka toka.
27 Motho wa go hloka toka o šišimiša baloki,Eupša motho yo mobe o šišimišwa ke motho yo a dirago dilo tše dibotse.
Mengwalo ya tlase
^ Goba mohlomongwe, “baloki ba nyaka go šireletša maphelo a bona.”
