Psalme 103:1-22
Koša ya Dafida.
103 Anke ke rete Jehofa,Anke ke rete leina la gagwe le lekgethwa ka pelo ya ka ka moka.
2 Anke ke rete Jehofa,O ka re nka dula ke gopola dilo ka moka tšeo a ntiretšego tšona.
3 O ntebalela dibe tša ka ka moka,Gomme o nthuša mathateng a ka ka moka.
4 O mphološa lehung,*O mpontšha lerato la gagwe le le botegago le kgaugelo.
5 O mpha dilo tše dibotse bophelo bja ka ka moka,E le gore ke dule ke le yo moswa le go ba le matla go swana le nonyana yeo e bitšwago ntšhu.
6 Jehofa o swara bao ba gateletšwego ka go lokaE bile o ba thuša gore ba swarwe ka toka.
7 O tsebišitše Moshe ditsela tša gagwe,A tsebiša Baisiraele mediro ya gagwe.
8 Jehofa o na le kgaugelo e bile o kwela bohloko,Ga a galefe ka pela e bile o na le lerato le legolo.*
9 A ka se dule a nyakana le diphošo tša rena,Le gona a ka se dule a re galefetše go ya go ile.
10 Ga se a re swara go ya ka dibe tša rena,E bile ga se a re otla go ya ka melato ya rena.
11 Gobane lerato la gagwe le le botegago leo a le bontšhago bao ba mmoifagoKe le legolo kudu go swana le ge magodimo a le kgole le lefase.
12 Go swana le ge bohlabela bo le kgole le bodikela,Le dibe tša rena o di lahletše kgole le rena.
13 Go etša ge tate a kwela bana ba gagwe bohloko,Le Jehofa o kwela bohloko bao ba mmoifago.
14 Gobane o tseba gabotse gore re a fokola,Ga a lebale gore re lerole.
15 Motho o phela bophelo bjo bokopana go swana le bjang bjo botala,O swana le matšoba a naga.
16 Ge moya o foka letšoba leo le a hwa,Gwa ba bjalo ka ge eka ga sa nka la ba gona.
17 Eupša Jehofa o bontšhaBao ba mmoifago lerato la gagwe le le botegago go ya go ile,Gomme a bontšha ditlogolo tša bona gore o lokile.
18 Ditlogolo tšeo di bolokago kgwerano ya gagweLe tšeo di latelago ditaelo tša gagwe.
19 Sedulo sa Jehofa sa bogoši se tla dula se le gona magodimong,E bile o buša selo se sengwe le se sengwe.
20 Retang Jehofa lena barongwa ba gagwe ka moka bao ba nago le matla a magolo,Lena bao le theetšago lentšu la gagwe le go latela melao ya gagwe.
21 Retang Jehofa lena barongwa ba gagwe ka moka,Bao ba mo hlankelago le go dira thato ya gagwe.
22 Retang Jehofa lena dibopiwa tša gagwe ka moka,Tšeo di lego mafelong ka moka ao a a bušago.
Anke ke rete Jehofa ka pelo ya ka ka moka.
