Psalme 104:1-35
104 Anke ke rete Jehofa.
Wena Jehofa Modimo wa ka, o yo mogolo kudu.
Go no swana le ge batho ba apara diaparo, wena o ikapešitše seriti le letago.
2 O ikapešitše seetša bjalo ka ge eka o apere kobo,O ala magodimo go swana le seila ya tente,
3 Wena o aga lefelo leo o dulago go lona ka godimo ga maru,O namela maru bjalo ka ge eka o namela kariki.O sepela godimo ga phefo,*
4 O dira gore barongwa ba gago e be ba matla kudu,Gomme wa ba dira gore ba swane le mollo wo o tšhumago
5 O dirile lefase godimo ga fantešene ya lona,Le ka mohla le ka se tsoge le šikintšwe.
6 O le apešitše ka meetse a mantšhi bjalo ka ge eka o le apešitše ka kobo.
Dithaba di be di khupeditšwe ke meetse a mantšhi.
7 Ge o a kgalemela a ile a tšhaba,Ge a ekwa modumo wa legadima la gago a ile a tšhaba a tšhogile,
8 A tšhabela lefelong leo o a abetšego lona.Dithaba tša ya godimo gomme meedi ya ya fase.
9 O beetše meetse mellwane yeo a sa swanelago go e tshela,E le gore a se ke a hlwa a sa khupetša lefase.
10 O dira gore meetse a elele a eya meeding,A elela gare ga dithaba.
11 Diphoofolo tša naga tša nwa meetse ao,Gomme dipitsi tša timola lenyora.
12 Dinonyana di aga dihlaga tša tšona mehlareng yeo e lego kgauswi le meetse ao,Di letša melodi di le makaleng a mehlare.
13 Wena o nošetša dithaba o le ka diphapošing tša gago tša ka godimo.
Lefase le tletše ka dilo tšeo o di dirilego.
14 O medišetša dikgomo bjang,Wa ba wa medišetša batho dimela gore ba di diriše.O dira gore lefase le ntšhe dijo
15 Le beine yeo e dirago gore motho a thabe,Makhura ao a phadimišago sefahlegoLe senkgwa seo se dirago gore motho a be le matla.
16 Mehlare ya Jehofa e nošeditšwe gabotse,Yona mehlare ya metsedara yeo a e bjetšego kua Libanoni,
17 Moo dinonyana di agago dihlaga tša tšona.
Nonyana yeo e bitšwago mogolodi e dula mehlareng ya mejunipere.
18 Dipudi tša naga di dula dithabeng tše ditelele.Mawa ke mafelo ao dipela di tšhabelago go ona.
19 O dirile ngwedi gore o aroganye dihla.Letšatši le tseba gabotse gore le swanetše go sobela neng.
20 O dira gore go be le leswiswi gomme gwa ba bošego,Nakong ya ge dibata ka moka di sepelasepela.
21 Ditawana di a rora ge di tsomaE bile di nyakana le dijo tšeo Modimo a di fago tšona.
22 Ge letšatši le hlaba, di tlogela go tsomaGomme tša ya tša ithobalela moo di dulago gona.
23 Motho o ya mošomong wa gagweGomme a šoma go fihlela e eba mantšiboa.
24 Wena Jehofa, ruri o dirile dilo tše dintšhi!
O di dirile ka moka ka bohlale.
Lefase le tletše ka dilo tšeo o di bopilego,
25 E bile go na le lewatle le legolo kudu,Leo le nago le diphedi tše dintšhi kudu tše dikgolo le tše dinyenyane.
26 Dikepe di sepela ka gare ga lona,Gomme o bopile Lebiathane* gore le bapalele ka go lona.
27 Ka moka ga tšona di tshepile wenaGore o di fe dijo ka nako ya maleba.
28 Di ja dijo tšeo o di neago tšona.
Di thabela dilo tše dibotse tšeo o di fago tšona.
29 Ge o se sa di hlokomela di a ferekana.
Ge o di amoga moya di a hwa, gomme tša boela leroleng.
30 Ge o di fa moya wa gago di a phela,Gomme wa dira gore go be le bophelo mo lefaseng.
31 Letago la Jehofa le tla ba gona go ya go ile.
Jehofa o tla thabišwa ke dilo tšeo a di bopilego.
32 O lebelela lefase, gomme la thothomela.O swara dithaba gomme tša thunya muši.
33 Ke tla opelela Jehofa bophelong bja ka ka moka.Ke tla opelela Modimo wa ka dikoša tša go mo tumiša ge feela ke sa phela.
34 Anke dilo tšeo ke di naganago di mo kgahle,
Ke tla thaba ge ke nagana ka Jehofa.
35 Badiradibe ba tla fedišwa lefaseng,Gomme ba kgopo ba ka se sa ba gona.
Ke tla reta Jehofa. Retang Jah!*
Mengwalo ya tlase
^ Phetolelo ya lentšu ka lentšu e re, “O sepela godimo ga maphego a phefo.”
^ Bona Tlhaloso ya Mantšu.
^ Goba, “Haleluya.” “Jah” ke tsela e kopana ya go bitša leina Jehofa.
