Psalme 119:1-176

BAPALA

Go leboga lentšu la Modimo le bohlokwa
- ‘Baswa ba swanetše go dira’ng gore ba phele ka tsela yeo e hlwekilego?’ (9)
- “Ke rata ditaelo tša gago” (24)
- “Ke tshepile lentšu la gago” (74, 81, 114)
- “Ruri ke rata molao wa gago!” (97)
- “Ke hlalefile kudu go feta bohle bao ba nthutago” (99)
- “Lentšu la gago le swana le lebone leo le mpontšhago mo ke gatago gona” (105)
- “Dilo ka moka tšeo o di boletšego ke nnete” (160)
- Bao ba ratago molao wa Modimo ba na le khutšo (165)

^{א [ʼAleph]} 119 Go thaba bao ba botegago*Le bao ba kwago molao wa Jehofa. ² Go thaba bao ba kwago dikgopotšo tša gagweLe bao ba lekago ka thata go tsoma tlhahlo ya gagwe. ³ Ba itlwaetša go dira dilo tše di lokilegoE bile ba sepela ditseleng tša gagwe. ⁴ Wena o laetše gore ditaelo tša gagoDi latelwe ka kelohloko. ⁵ Ke duma eka nka dula ke go botegelaGore ke kwe melao ya gago. ⁶ Gona nka se lewe ke dihlongGe ke latela ditaelo tša gago ka moka. ⁷ Ke tla go reta ka pelo e lokilegoGe ke ithuta dikahlolo tša gago tša go loka. ⁸ Ke tla latela ditaelo tša gago. Anke o se ntlogelele sa ruri. ^{ב [Beth]} ⁹ Lesogana le swanetše go dira’ng gore le phele ka tsela yeo e hlwekilego? Le swanetše go dula le ekwa lentšu la gago. ¹⁰ Ke go tsoma ka pelo ya ka ka moka. O se ke wa ntumelela ke tlogela melao ya gago. ¹¹ Ke bea dilo tšeo o di bolelago pelong ya ka,E le gore ke se go direle sebe. ¹² Anke o retwe wena Jehofa.Nthute ditaelo tša gago. ¹³ Ke bolela ka ditaelo ka mokaTšeo o di boletšego. ¹⁴ Ke thabela dikgopotšo tša gagoGo feta dilo ka moka tše bohlokwa. ¹⁵ Ke tla naganišiša* ka ditaelo tša gago,Ka ba ka naganišiša ka ditsela tša gago. ¹⁶ Ke rata melao ya gago. Nka se lebale lentšu la gago. ^{ג [Gimel]} ¹⁷ Ntshware ka botho nna mohlanka wa gago,E le gore ke phele le gore ke boloke lentšu la gago. ¹⁸ Bula mahlo a ka e le gore ke kgone go bona gabotseDilo tše di makatšago tšeo di tšwago molaong wa gago. ¹⁹ Ke ikwa bjalo ka motšwantle nageng ye. O se ke wa nkutela ditaelo tša gago. ²⁰ Ke dula ke hlologelaDikahlolo tša gago. ²¹ O kgalemela batho bao ba ikgodišago,Bao ba rogakilwego ka gobane ba tlogetše ditaelo tša gago. ²² Dira gore ke se sa nyatšwa le go kwerwaKa gobane ke kwele dikgopotšo tša gago. ²³ Le ge baetapele ba ka kgobokana gomme ba bolela ka nna gampe,Nna mohlanka wa gago ke tla dula ke naganišiša ka ditaelo tša gago. ²⁴ Ke rata ditaelo tša gago.Di swana le batho bao ba nkeletšago. ^{ד [Daleth]} ²⁵ Ke rapaletše leroleng. Ntire gore ke phele go etša ge o ile wa bolela. ²⁶ Ke go boditše ditsela tša ka ka moka gomme wa nkaraba.Nthute ditaelo tša gago. ²⁷ Ntire gore ke kwešiše ditsela tša gago,E le gore ke naganišiše ka mediro ya gago e makatšago. ²⁸ Ke be ke sa robale ka baka la go kwa bohloko. Mmatlafatše go etša ge o ntshepišitše. ²⁹ Nthuše gore ke se ke ka bolela maaka,Gomme o mpontšhe botho ka go nthuta molao wa gago. ³⁰ Ke kgethile go go botegela. Ke lemogile gore dikahlolo tša gago di lokile. ³¹ Ke kgomaretše dikgopotšo tša gago. O se dumelele gore ke lewe ke dihlong, hle Jehofa. ³² Ke tla latela ditaelo tša gago ka pelo ka moka,Ka gobane o nthuša gore ke di kwešiše.* ^{ה [He]} ³³ Jehofa, hle nthute gore ke latele ditaelo tša gago,E bile ke tla di latela go fihla mafelelong. ³⁴ Ntire gore ke kwešiše,E le gore ke kwe molao wa gagoGomme ke o latele ka pelo ya ka ka moka. ³⁵ Ntlhahle gore ke kwe* melao ya gago,Ka gobane e a nkgahla. ³⁶ Nthuše gore ke rate dikgopotšo tša gago,Eupša ke se be le megabaru. ³⁷ Nthuše gore ke pheme go lebelela dilo tšeo di se nago mohola.Ntire gore ke sepele tseleng ya gago e le gore ke dule ke phela. ³⁸ Phetha seo o se tshepišitšego mohlanka wa gagoE le gore batho ba go boife. ³⁹ Tloša dihlong tšeo di mpoifišagoKa gobane dikahlolo tša gago di lokile. ⁴⁰ Ke tloga ke rata go phela ka melao ya gago. Ntire gore ke dule ke phela ka gobane o lokile. ^{ו [Waw]} ⁴¹ Hle Jehofa, anke o mpontšhe lerato la gago le le botegago,O be o mphološe go etša ge o ntshepišitše, ⁴² E le gore ke arabe yo a nkweragoKa gobane ke tshepile lentšu la gago. ⁴³ Nthuše gore ke dule ke bolela ka lentšu la gago leo e lego nneteKa gobane ke letetše kahlolo ya gago. ⁴⁴ Ke tla dula ke latela molao wa gagoGo ya go ile. ⁴⁵ Ke tla sepela lefelong leo le šireletšegilegoKa gobane ke leka ka thata gore ke kwe melao ya gago. ⁴⁶ Ke tla bolela ka melao ya gago pele ga dikgoši,E bile nka se hlabje ke dihlong. ⁴⁷ Ke rata ditaelo tša gago,Ruri ke a di rata! ⁴⁸ Ke tla go rapela ke emišitše matsogo ka gobane ke rata melao ya gago.E bile ke tla naganišiša ka melao ya gago. ^{ז [Zayin]} ⁴⁹ Gopola lentšu leo o le boditšego nna mohlanka wa gago,Leo ke letetšego gore le phethagale go etša ge o ntshepišitše. ⁵⁰ Lentšu le le a nkgothatša ge ke tlaletšwe,Ka gobane seo o se boletšego se dira gore ke tšwele pele ke phela. ⁵¹ Bao ba ikgogomošago ba nkwera gabohloko.Eupša nna ga ke tlogele molao wa gago. ⁵² Ke gopola dikahlolo tša gago tša go tloga kgale wena Jehofa,E bile di a nkgothatša. ⁵³ Ke galefile kudu ka baka la batho ba babeBao ba tlogelago molao wa gago. ⁵⁴ Kae le kae mo ke dulago gona,Ditaelo tša gago di ba bjalo ka dikoša tša ka. ⁵⁵ Bošego ke naganišiša ka leina la gago wena Jehofa,E le gore ke phethe molao wa gago. ⁵⁶ Ke šetše ke tlwaetše go naganišišaKa gobane ke nyaka go kwa melao ya gago. ^{ח [Heth]} ⁵⁷ Wena Jehofa, o bjalo ka bohwa bja ka.Ke tshepišitše gore ke tla latela mantšu a gago. ⁵⁸ Ke go kgopela ka pelo ya ka ka moka,Mpontšhe botho go etša ge o ntshepišitše. ⁵⁹ Ke hlahlobile ditsela tša ka,E le gore ke boele ke kwe melao ya gago. ⁶⁰ Ke phakišetša go kwa ditaelo tša gagoNtle le go senya nako. ⁶¹ Batho ba babe ba mpeetše melaba,Eupša ga ke lebale molao wa gago. ⁶² Ke tsoga gare ga bošego gore ke go lebogeKa gobane dikahlolo tša gago di lokile. ⁶³ Ke gwerana le bohle bao ba go boifago,Le bao ba latelago melao ya gago. ⁶⁴ Wena Jehofa, lerato la gago le le botegago le bonagala lefaseng ka moka.Nthute ditaelo tša gago. ^{ט [Teth]} ⁶⁵ Wena Jehofa, o dirišane gabotse le nna mohlanka wa gagoGo etša ge o ntshepišitše. ⁶⁶ Nthuše gore ke be le kwešišo le go ba le tsebo,Ka gobane ke tshepile ditaelo tša gago. ⁶⁷ Ke ile ka dira diphošo gomme ka tlaišega ka baka la tšona,Eupša gona bjale ke latela seo o se boletšego. ⁶⁸ O lokile e bile o dirile dilo tše dibotse. Nthute melao ya gago. ⁶⁹ Batho bao ba ikgogomošago ba mphara ka maaka.Eupša nna ke latela melao ya gago ka pelo ya ka ka moka. ⁷⁰ Dipelo tša bona di retetše.*Eupša nna ke rata molao wa gago. ⁷¹ Ke mo gobotse gore ke ile ka tlaišega,E le gore ke ithute ditaelo tša gago. ⁷² Molao woo o o boletšego o ntshwanetše,O ntshwanetše go feta ditšhelete tše dikete tša gauta le tša silifera. ^{י [Yod]} ⁷³ Diatla tša gago di ntirile tša ba tša ntiiša. Nthuše gore ke be le kwešišo,E le gore ke ithute ditaelo tša gago. ⁷⁴ Bao ba go boifago ge ba mpona ba a thaba,Ka gobane ke tshepile lentšu la gago. ⁷⁵ Wena Jehofa, ke a tseba gore dikahlolo tša gago di lokile,Le gore o ntaile ka gobane o botega. ⁷⁶ Anke lerato la gago le le botegago le nkhomotšeGo etša ge o tshepišitše nna mohlanka wa gago. ⁷⁷ Anke o nkwele bohloko gore ke dule ke phela,Ka gobane ke rata molao wa gago. ⁷⁸ Anke batho bao ba ikgogomošago ba hlabje ke dihlong,Ka gobane ba ntshwara gampe ntle le lebaka. Eupša nna ke tla naganišiša ka melao ya gago. ⁷⁹ Anke bao ba go boifago ba boele go nna,Bona bao ba tsebago melao ya gago. ⁸⁰ Nthuše gore ke kwe melao ya gago ka pelo ya ka ka moka,E le gore ke se hlabje ke dihlong. ^{כ [Kaph]} ⁸¹ Ke duma gore o tle o mphološe,Ka gobane ke tshepile lentšu la gago. ⁸² Ke letetše gore seo o se tshepišitšego se phethagale,Bjale ke ipotšiša gore: “O tla nkhomotša neng?” ⁸³ Ka gobane ke swana le lepotlelo la mokgopa leo le omišwago ke muši.Eupša ga ke lebale melao ya gago. ⁸⁴ Nna mohlanka wa gago ke tla leta go fihla neng? O tla ahlola neng batho bao ba ntlaišago? ⁸⁵ Go bjalo ka ge eka batho bao ba ikgogomošago ba nkepetše melete gore ke wele ka gare ga yona,Bona bao ba sa kwego melao ya gago. ⁸⁶ Ditaelo tša gago ka moka di a tshepega. Batho ba ntlaiša ntle le lebaka. Hle ke kgopela o nthuše. ⁸⁷ Go be go šetše ganyenyane gore ba mphediše lefaseng,Eupša nna ga se ka tlogela melao ya gago. ⁸⁸ Ka ge o na le lerato le le botegago, ntire gore ke dule ke phela,E le gore ke dule ke ekwa melao yeo o mphilego yona. ^{ל [Lamed]} ⁸⁹ Wena Jehofa, lentšu la gago le tla dula le le gona go ya go ileGo swana le magodimo. ⁹⁰ O dula o botega melokong ka moka. O tiišitše lefase gore le dule le le gona. ⁹¹ Ka baka la taelo ya gago, dilo tšeo o di bopilego di sa le gona go fihla le lehono,Ka gobane ka moka ga tšona di a go hlankela. ⁹² Ge nkabe ke be ke sa rate molao wa gago,Gona nkabe ke fedišitšwe ke tlaišego ya ka. ⁹³ Nka se tsoge ke tlogetše ditaelo tša gago,Ka gobane o dirile gore ke dule ke phela ka baka la tšona. ⁹⁴ Ke nna wa gago. Hle mphološe,Ka gobane ke leka ka thata go kwa melao ya gago. ⁹⁵ Ba babe ba ntaletše gore ba mpolaye,Eupša nna ke dula ke naganišiša ka ditaelo tša gago. ⁹⁶ Ke bone dilo tše dintšhi tšeo di phethagetšego,Eupša melao ya gago e di phala ka moka. ^{מ [Mem]} ⁹⁷ Ruri ke rata molao wa gago! Ke naganišiša ka wona letšatši ka moka. ⁹⁸ Molao wa gago o dira gore ke hlalefe go feta manaba a ka,Ka gobane o dula o ntlhahla. ⁹⁹ Ke hlalefile kudu go feta bohle bao ba nthutago,Ka gobane ke naganišiša ka dikgopotšo tša gago. ¹⁰⁰ Ke dira dilo ka bohlale go feta banna ba bagolo,Ka gobane ke latela ditaelo tša gago. ¹⁰¹ Ke gana go sepela tseleng le ge e le efe e mpe,E le gore ke dule ke ekwa lentšu la gago. ¹⁰² Ga ke tlogele go latela melao ya gago,Ka gobane ke wena o nthutilego. ¹⁰³ Dipolelo tša gago di bose kudu lelemeng la ka,Go feta mamapo a dinose! ¹⁰⁴ Ke dira dilo ka kwešišo ka baka la ditaelo tša gago. Ke ka baka leo ke hloilego tsela e nngwe le e nngwe yeo e fošagetšego. ^{נ [Nun]} ¹⁰⁵ Lentšu la gago le swana le lebone leo le mpontšhago mo ke gatago gona,Le seetša seo se bonegago tsela ya ka. ¹⁰⁶ Ke dirile keno ya gore ke tla kwa melao ya gago,E bile ke tla e phetha. ¹⁰⁷ Ke tlaišegile kudu ka baka la mathata ao a nkwetšego. Wena Jehofa, ntire gore ke dule ke phela ka ge o ntshepišitše. ¹⁰⁸ Wena Jehofa, ke kgopela o amogele dihlabelo tša ka tša go go tumiša, tšeo ke go direlago ka boithaopo,Gomme o nthute melao ya gago. ¹⁰⁹ Bophelo bja ka bo dula bo le kotsing,Eupša ga se ka lebala molao wa gago. ¹¹⁰ Go bjalo ka ge eka batho ba babe ba mpeetše molaba,Eupša nna ga se ka tlogela go kwa melao ya gago. ¹¹¹ Ke tla dula ke tšeela dikgopotšo tša gago godimo,Ka gobane di nthabiša pelo. ¹¹² Ke ikemišeditše go latela ditaelo tša gago ka dinako tšohle,Ke tla dula ke di kwa bophelo bja ka ka moka. ^{ס [Samekh]} ¹¹³ Ke hloile bao ba sa go botegelego ka pelo ka moka,Eupša ke rata molao wa gago. ¹¹⁴ O lefelo leo ke tšhabelago go lona le kotse ya kaKa gobane ke tshepile lentšu la gago.* ¹¹⁵ Tlogang go nna lena batho ba babe,E le gore ke latele ditaelo tša Modimo wa ka. ¹¹⁶ Wena Modimo, nthekge ka ge o ntshepišitše,E le gore ke dule ke phela.Ke tshepile wena, ka gona o se dumelele gore ke hlabišwe dihlong. ¹¹⁷ Nthekge gore ke phološwe.Ka go realo, ke tla dula ke nagana ka ditaelo tša gago. ¹¹⁸ Ga o amogele bao ba tlogelago ditaelo tša gago,Ka gobane ba na le maaka e bile ba tletše bofora. ¹¹⁹ O fediša batho ba babe ka moka ba lefase bjalo ka ge eka ke ditšhila. Ke ka baka leo ke ratago dikgopotšo tša gago. ¹²⁰ Ke go boifa moo e lego gore mmele wa ka o a thothomela,E bile dikahlolo tša gago di a ntšhoša. ^{ע [Ayin]} ¹²¹ Ke dirile dilo tša go loka le go ahlola ka toka. O se ntlogele ke tlaišwa ke manaba a ka! ¹²² Kgonthišetša gore dilo di ntshepelela gabotse nna mohlanka wa gago.Anke batho bao ba ikgogomošago ba se nkgatelele. ¹²³ Ke* lapišitšwe ke go hlwa ke go letetše gore o mphološeLe gore o phethagatše tshepišo ya gago ya go loka. ¹²⁴ Bontšha nna mohlanka wa gago lerato le le botegago,Gomme o nthute ditaelo tša gago. ¹²⁵ Ke nna mohlanka wa gago. Mphe bohlaleE le gore ke kgone go kwešiša dikgopotšo tša gago. ¹²⁶ Nako ya gore wena Jehofa o gate mogato e fihlile,Ka gobane ba robile molao wa gago. ¹²⁷ Ke ka baka leo ke ratago melao ya gagoGo feta gauta le go feta gauta ye e sekišitšwego. ¹²⁸ Ka gona ke bona ditaelo tša gago ka moka di lokile.Ke hloile tsela e nngwe le e nngwe e fošagetšego. ^{פ [Pe]} ¹²⁹ Ditaelo tša gago di a kgahliša, Ke ka baka leo ke di latelago. ¹³⁰ Ge mantšu a gago a hlaloswa, batho ba ba le tsebo,E bile a dira gore batho bao ba sa tsebego selo ba kwešiše. ¹³¹ Ga ke kgone go hema gabotse,Ka gobane ke hlologetše go kwa melao ya gago. ¹³² Nagana ka nna gomme o mpontšhe botho,Ka ge o dula o dira bjalo go bao ba ratago leina la gago.* ¹³³ Ntlhahle ka dipolelo tša gago e le gore ke sepele tseleng yeo e šireletšegilego,O se ke wa ntumelela ke laolwa ke dilo tše mpe. ¹³⁴ Mphološe go batho bao ba nkgatelelago,Gomme ke tla latela ditaelo tša gago. ¹³⁵ Bontšha nna mohlanka wa gago gore o a nkamogela,Gomme o nthute melao ya gago. ¹³⁶ Mahlo a ka a elela megokgo bjalo ka nokaKa gobane batho ga ba latele molao wa gago. ^{צ [Tsade]} ¹³⁷ Wena Jehofa o lokile,Le dikahlolo tša gago di lokile. ¹³⁸ Melao* ya gago e lokileE bile re ka dula re ithekga ka yona. ¹³⁹ Ke fišegela go dira thato ya gago tše e kego ke fišwa ke mollo ka gare ga ka.Ka gobane manaba a ka ga a na taba le molao wa gago. ¹⁴⁰ Nna mohlanka wa gago ke rata dipolelo tša gago,Ka gobane di sekile kudu. ¹⁴¹ Ke tšewa ke se selo e bile ke nyatšega,Eupša ditaelo tša gago ga se ka di lebala. ¹⁴² Mediro ya gago ya go loka ke ya go ya go ile,Gomme molao wa gago ke wa nnete. ¹⁴³ Le ge ke wetšwe ke mathata e bile ke tlaletšwe,Ke tla dula ke rata melao ya gago. ¹⁴⁴ Dikgopotšo tša gago di dula di lokile go ya go ile. Ntire gore ke di kwešiše e le gore ke dule ke phela. ^{ק [Qop]} ¹⁴⁵ Ke go bitša ka pelo ya ka ka moka. Nkarabe hle Jehofa. Ke tla latela melao ya gago. ¹⁴⁶ Ke a go bitša hle, mphološe! Ke tla dula ke latela melao ya gago. ¹⁴⁷ Ke tsogile ka masa e le gore ke kgopele gore o nthuše,Ka gobane ke tshepile mantšu a gago.* ¹⁴⁸ Ke tsogile gare ga bošego,E le gore ke naganišiše ka dipolelo tša gago. ¹⁴⁹ Anke o kwe lentšu la ka ka baka la lerato la gago le le botegago. Dira gore ke dule ke phela ka gobane o ahlola ka toka, hle Jehofa. ¹⁵⁰ Bao ba itshwerego ka tsela yeo e lešago dihlong ba batametše kgauswi le nna,Ba gana molao wa gago. ¹⁵¹ Wena Jehofa o kgauswi le nna,Gomme melao ya gago ka moka e a tshepega. ¹⁵² Ke ithutile melao ya gago go tloga kgale,E lego melao* yeo o e beilego gore e be gona go ya go ile. ^{ר [Resh]} ¹⁵³ Bona kamoo ke hlakago ka gona gomme o mphološe,Ka gobane ga se ka lebala molao wa gago. ¹⁵⁴ Ntwele tshekong gomme o mphološe,Ntire gore ke phele go etša ge o ntshepišitše. ¹⁵⁵ Ba kgopo ba ka se phološweKa gobane ga se ba latela melao ya gago. ¹⁵⁶ Wena Jehofa, o na le kgaugelo e kgolo. Ntire gore ke phele ka go dumelelana le toka ya gago. ¹⁵⁷ Batho bao ba ntlaišago le manaba a ka ke ba bantšhi,Eupša nna ga se ka tlogela go kwa dikgopotšo tša gago. ¹⁵⁸ Ke hloile bao ba dirago dilo tša boradia,Ka gobane ga ba latele dilo tšeo o di boletšego. ¹⁵⁹ Anke o bone kamoo ke ratago melao ya gago. Hle Jehofa, dira gore ke phele ka baka la lerato la gago le le botegago. ¹⁶⁰ Dilo ka moka tšeo o di boletšego ke nnete,E bile dikahlolo tša gago tša go loka di dula di le gona go ya go ile. ^{ש [Sin] goba [Shin]} ¹⁶¹ Baetapele ba ntlaiša ntle le lebaka,Eupša ke dula ke boifa mantšu a gago. ¹⁶² Ke thabela dilo tšeo o di boletšegoGo swana le motho yo a hweditšego mahumo a mantšhi. ¹⁶³ Ke tloga ke hloile maaka,Eupša ke rata molao wa gago. ¹⁶⁴ Ke go tumiša gašupa ka letšatšiKa gobane dikahlolo tša gago di lokile. ¹⁶⁵ Bao ba ratago molao wa gago ba na le khutšo e ntšhi,E bile ga go na seo se ka dirago gore ba kgopše. ¹⁶⁶ Wena Jehofa, ke holofetše go phološwa ke wena,E bile ke latela melao ya gago. ¹⁶⁷ Ke boloka ditaelo tša gago,E bile ke di rata kudu. ¹⁶⁸ Ke kwa melao ya gago le dikgopotšo tša gago,Ka gobane wena o bona dilo ka moka tšeo ke di dirago. ^{ת [Taw]} ¹⁶⁹ Anke o nkwe ge ke go llela gore o nthuše hle Jehofa. Ntire gore ke kwešiše ka ge o boletše. ¹⁷⁰ Anke o nkwe ge ke kgopela gore o nkgaugele. Mphološe go etša ge o ntshepišitše. ¹⁷¹ Ke tla dula ke go reta,Ka gobane o nthuta melao ya gago. ¹⁷² Ke tla opela ka dilo tšeo o di boletšego,Ka gobane melao ya gago ka moka e lokile. ¹⁷³ Anke o nthušeKa gobane ke kgethile go kwa ditaelo tša gago. ¹⁷⁴ Wena Jehofa, ke hlologetše go phološwa ke wena,E bile ke rata molao wa gago. ¹⁷⁵ Anke ke dule ke phela e le gore ke go tumiše.Eka dikahlolo tša gago di ka nthuša. ¹⁷⁶ Ke ralala bjalo ka nku yeo e timetšego. Hle, ntsome nna mohlanka wa gago,Gobane ga se ka lebala ditaelo tša gago.

Mengwalo ya tlase

^ Goba, “bao ba se nago molato.”

^ Goba, “ithuta.”

^ Goba mohlomongwe, “o dira gore pelo ya ka e se boife selo.”

^ Goba, “Ntshepediše tseleng ya.”

^ Goba, “ga di sa kwa selo go swana le lekhura.”

^ Goba, “ke letetše lentšu la gago.”

^ Phetolelo ya lentšu ka lentšu e re, “Mahlo a ka.”

^ Phetolelo ya lentšu ka lentšu e re, “go ya kamoo o ahlolago bao ba ratago leina la gago.”

^ Goba, “Dikgopotšo.”

^ Goba, “ke letetše matšu a gago.”

^ Goba, “dikgopotšo.”

PHETOLELO YA LEFASE LE LEFSA YA MANGWALO A MAKGETHWA

Dipsalme 119

Sepedi

Bala Beibele Inthaneteng

https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg

nwt

Dihlatse tša Jehofa

Psalme 119:1-176

Mengwalo ya tlase

TAONELOUTA KA

Dipsalme

THULAGANYO YA DIKAGARE

Mengwalo ya tlase

TAONELOUTA KA

Dipsalme

Kgetha Leleme la Gago

Romela