Psalme 31:1-24
Ditaelo tše di yago go mohlahli. Koša ya Dafida.
31 Wena Jehofa, ke tšhabetše go wena.
O se ke wa dumelela gore ke hlabišwe dihlong.
Mphološe ka gobane o lokile.
2 Ntheetše hle.
Etla kapelapela gomme o mphološe.
Eba thaba ya ka yeo ke tšhabelago go yona,O be lefelo leo le šireletšegilego leo le mphološago.
3 O leswika la ka le legolo le lefelo la ka leo le šireletšegilego.O tla ntlhahla le go mpontšha tsela ka baka la leina la gago.
4 O tla ntanyolla neteng ya go rea dihlapi yeo ba e beilego ka sephiring gore ba ntanye,Ka gobane o lefelo leo ke ikutago go lona.
5 Ke bea moya wa ka diatleng tša gago.
Wena Jehofa Modimo wa therešo, o nthekolotše.
6 Ke hloile bao ba rapelago medingwana ya diswantšho yeo e se nago mohola.Eupša ge e le nna ke tshepile wena Jehofa.
7 Ke tla thaba kudu ka baka la lerato la gago le le botegago leo o mpontšhago lona,Ka gobane o bone mohlako wa ka,E bile o a bona gore ke tlalelong e kgolo.
8 Ga se wa nkiša go lenaba la ka.Eupša o mpea lefelong leo le šireletšegilego.
9 Nkwele bohloko hle Jehofa, gobane ke mathateng a magolo.
Go tlaišega ga ka go dirile gore mahlo a ka a fokole. Mmele wa ka le wona o a fokola.
10 Bophelo bja ka bo tletše bohloko le manyami,Matla a ka a a fela ka baka la molato wa ka.
Marapo a ka ga a sa tiile.
11 Manaba a ka ka moka a a nnyatša,Kudukudu baagišane ba ka,
E bile batho bao ke bego ke ba tlwaetše ba a ntšhaba.Nako e nngwe le e nngwe ge ba mpona ba a tšhaba.
12 Dipelong tša bona ga ba sa nkgopola e bile ba ntebetše tše e kego ke hlokofetše.Ke swana le sebjana se se thubegilego.
13 Ke kwele dilo tše dintšhi tše mpe tšeo di bolelwago ka nna.Ke a boifa ka gobane ke tšhošetšwa ka mahlakoreng ka moka.
Ge ba ipopa ngatana e tee e le gore ba lwe le nna,Ba ntogela maanomabe a gore ba mpolaye.
14 Eupša nna ke tshepile wena Jehofa.
Ke re: “O Modimo wa ka.”
15 Bophelo bja ka bo diatleng tša gago.
Mphološe go manaba a ka le go bao ba ntlaišago.
16 Nkamogele nna mohlanka wa gago.
Mpontšhe lerato la gago le le botegago gomme o mphološe.
17 Wena Jehofa, anke o se dumelele gore ke hlabje ke dihlong ge ke go bitša.
Anke batho ba babe e be bona bao ba hlabjago ke dihlong.A ba ye Lebitleng* gomme ba homole.
18 Anke batho bao ba bolelago maaka ba hloke seo ba ka se bolelago,Bona bao ba bolelago ka moloki gampe le ka lenyatšo.
19 Ruri o dira dilo tše dintšhi tše dibotse!
O na le dilo tše dibotse tšeo o di beetšego bao ba go boifago le go tšhabela go wena,Le gona dilo tšeo, o di dirile pele ga batho ka moka.
20 O tla ba uta lefelong la gago leo le utegilego,Wa ba šireletša go batho bao ba ba logelago maanomabe.O tla ba uta ka tenteng ya gago,Wa ba šireletša go batho bao ba ba thomeletšago ka maaka.
21 Anke Jehofa a retwe,Ka gobane o mpontšhitše lerato la gagwe le le botegago ka tsela e makatšago motseng woo o dikaneditšwego ke manaba.
22 Ge e le nna, ke ile ka tlalelwa ke moka ka ipotša gore:
“Ke tla hwela pele ga gago.”
Eupša o ile wa nkwa ge ke go llela ke go kgopela gore o nthuše.
23 Ratang Jehofa lena bohle bao le mmotegelago.
Jehofa o šireletša bao ba botegago,Eupša o otla gabohloko motho le ge e le ofe yo a ikgogomošago.
24 Ebang sebete gomme le tie matla,Lena bohle bao le letetšego Jehofa.
Mengwalo ya tlase
^ Bona Tlhaloso ya Mantšu.
