Psalme 37:1-40
Koša ya Dafida.
א [Aleph]
37 O se ke wa kwatišwa ke batho ba babeGoba wa hufegela bao ba dirago dilo tše mpe.
2 Ba tlo omelela ka pela go swana le bjang,Gomme ba pona go swana le bjang bjo botala bjoo bo sa tšwago go mela.
ב [Beth]
3 Tshepa Jehofa gomme o dire dilo tše dibotse.Dula lefaseng gomme o botege dilong ka moka.
4 Thabela go hlankela Jehofa,Gomme yena o tla go fa tšeo pelo ya gago e di kganyogago.
ג [Gimel]
5 Dumelela Jehofa a go hlahla,Ithekge ka yena, gomme yena o tla go thuša.
6 O tla dira gore mediro ya gago ya go loka e phadime bjalo ka seetša sa mosegare,Gomme dilo tša go loka tšeo o di dirago tša phadima bjalo ka letšatši la mosegare wa sekgalela.
ד [Daleth]
7 Ikhomolele pele ga JehofaGomme o mo letele ka go se fele pelo.
O se ke wa kwatišwa ke mothoYo a atlegago ge a phetha maano a gagwe a mabe.
ה [He]
8 Lesa go kwata gomme o tlogele go galefa.O se tlale pelo gomme wa feleletša o dirile dilo tše mpe.
9 Gobane batho ba babe ba tla fedišwa,Eupša bao ba tshepilego Jehofa e tla ba beng ba lefase.
ו [Waw]
10 E se kgale batho ba babe ba tla be ba se gona,O tla lebelela moo ba bego ba dula gona,Gomme ba tla be ba se gona.
11 Eupša ba boleta e tla ba beng ba lefase,Gomme ba tla thaba kudu ka baka la khutšo yeo e sa lekanywego le selo.
ז [Zayin]
12 Motho yo mobe o logela moloki maanomabe,E bile ge a mmona o a tenega.*
13 Eupša Jehofa yena o tla mo sega,Ka gobane o a tseba gore letšatši la gore a fedišwe le tla tla.
ח [Heth]
14 Batho ba babe ba ntšha ditšhoša tša bona e bile ba nganga bora bja bona,Gore ba bolaye motho yo a hlokago thušo le modiidi,Gore ba bolaye bao ba dirago tše di lokilego.
15 Eupša tšhoša ya bona e tla hlaba dipelo tša bona,Gomme bora bja bona bja robja.
ט [Teth]
16 Dilo tše dinyenyane tšeo moloki a nago le tšona di kaone kuduGo phala mahumo ao batho ba bantšhi ba babe ba nago le ona.
17 Ba babe ba tla amogwa matla a bona,Eupša Jehofa o tla thekga baloki.
י [Yod]
18 Jehofa o bona seo se diragalelago bao ba se nago molato,Gomme bohwa bja bona bo tla dula bo le gona.
19 Go ka se be le seo se ba hlabišago dihlong nakong ya masetlapelo,Gomme nakong ya tlala ba tla ba le dijo tše dintšhi.
כ [Kaph]
20 Eupša ba babe ba tlo fedišwa,Manaba a Jehofa a tla nyamelela bjalo ka mafulo a matala ao a ponago gabonolo.E bile a tla hwelela bjalo ka muši.
ל [Lamed]
21 Yo mobe ge a adimile ga a buše,Eupša moloki ga a timane e bile o rata go nea.
22 Bao Modimo a ba šegofaditšego e tla ba beng ba lefase,Eupša bao a ba rogakilego ba tla fedišwa.
מ [Mem]
23 Ge Jehofa a kgahlwa ke tsela yeo motho a phelago ka yonaO tla mo hlahla.*
24 Le ge a ka wa a ka se we ka sefahlego,Ka gobane Jehofa o swere seatla sa gagwe gore a kgone go tsoga.
נ [Nun]
25 Nkile ka ba lesogana, e bile gona bjale ke tšofetše,Eupša ga sa nka ka bona Modimo a lahlile motho le ge e le ofe yo a lokilego,Goba ka bona bana ba moloki ba kgopela dijo.
26 Moloki o dula a adima batho dilo ka go rata,Le gona Modimo o tla šegofatša bana ba gagwe.
ס [Samekh]
27 Tlogela go dira dilo tše mpe o dire tše dibotse,Gomme o tla phela go ya go ile.
28 Jehofa o rata dilo tša go loka,E bile a ka se tlogele bao ba mmotegelago.
ע [Ayin]
O tla dula a ba šireletša,Eupša ditlogolo tša batho ba babe di tlo fedišwa.
29 Baloki e tla ba beng ba lefase,Ba tla dula mo go lona go ya go ile.
פ [Pe]
30 Dilo tšeo moloki a di bolelago di thuša ba bangwe gore ba be bohlale,E bile o bolela dilo tše di lokilego.
31 Molao wa Modimo wa gagwe o ka pelong ya gagwe,E bile o tla dula a o latela.
צ [Tsade]
32 Motho yo mobe o dula a laletše molokiGore a mmolaye.
33 Eupša Jehofa a ka se dumelele motho yo mobe gore a bolaye moloki,Goba a mmona molato ge a ahlolwa ke ba babe.
ק [Qoph]
34 Letela Jehofa ka go se fele pelo gomme o latele tsela ya gagwe,Le gona o tla dira gore o swanelege go dula lefaseng.
Wena o tla bona ge ba babe ba fedišwa.
ר [Resh]
35 Ke bone monna yo mobe le yo šoroA atlega bjalo ka mohlare wo o bjetšwego mobung wo o nonnego.
36 Eupša o ile a hlokofala ka pela gomme a se sa ba gona.Ke ile ka dula ke mo nyaka eupša ka se mo hwetše.
ש [Shin]
37 Šetša motho yo a se nago molato,Gomme o dule o lebeletše moloki,Ka gobane motho yoo o tla phela ka khutšo nakong e tlago.
38 Eupša batho ka moka bao ba tshelago molao ba tla fedišwa.Ba babe ba tlo fedišwa.
ת [Taw]
39 Jehofa o phološa baloki,Ba tšhabela go yena ge ba nyamile.
40 Jehofa o tla ba thuša a ba a ba šireletša.
O tla ba lamolela go batho ba babe gomme a ba phološa,Ka gobane ba tšhabetše go yena.
Mengwalo ya tlase
^ Phetolelo ya lentšu ka lentšu e re, “o mo lomaganyetša meno.”
^ Goba, “O tla tiiša dikgato tša gagwe.”
