Psalme 50:1-23
Koša ya Asafa.
50 Jehofa Modimo yo a fetago medimo e mengwe ka moka o boletše.O bitša badudi ka moka ba lefase,Go tloga ka bohlabela go fihla ka bodikela.
2 Modimo o romela seetša a le Tsione, e lego motse o mobotse kudu.
3 Modimo wa rena o tla tla e bile a ka se homole.
Pele ga gagwe go na le mollo wo o senyagoGomme yena o dikologilwe ke ledimo le legolo.
4 O bitša magodimo le lefaseE le gore a ahlole batho ba gagwe. O re:
5 “Emang mo pele ga ka lena batho ba ka bao ba botegagoBao le dirago kgwerano le nna ka sehlabelo.”
6 Magodimo a bolela gore Modimo o lokile,Ka gobane Modimo yena ke Moahlodi. (Selah)
7 “Theetšang lena batho ba ka gomme nna ke tla bolela,Lena batho ba Isiraele, ke bolela molato wa lena.
Ke nna Modimo, Modimo wa lena.
8 Ga ke le kgalemelele dihlabelo tša lena,Goba go le kgalemelela dibego tša lena tša go fišwa tše di dulago di le pele ga ka.
9 Ga ke hloke pooGoba dipudi* tšeo di tšwago mašakeng a lena.
10 Ka gobane phoofolo e nngwe le e nngwe yeo e lego nageng ke ya ka,Le dibata tše di lego dithabeng ka moka.
11 Ke tseba dinonyana ka moka tšeo di lego dithabeng,Le gona, diphoofolo tše dintšhintšhi tša naga ke tša ka.
12 Ge nkabe ke swerwe ke tlala ke be nka se le botše,Ka gobane lefase ke la ka le dilo ka moka tšeo di lego go lona.
13 Na ke swanelwa ke go ja nama ya dipooLe go nwa madi a dipudi?
14 Neang Modimo sehlabelo e le go mo leboga,Gomme le direng seo le se enetšego yo Godimodimo.
15 Le mpitšeng ge le le tlalelong.
Ke tla le phološa, gomme lena le tla ntlhompha.”
16 Eupša Modimo o tla re go yo mobe:
“O filwe ke mang tshwanelo ya go bolela ka ditaelo tša ka,Goba go bolela ka kgwerano ya ka?
17 Ka gobane wena o hloile tayo,E bile o dula o nyatša mantšu a ka.
18 Ge o bona lehodu, o thabišwa ke dilo tšeo le di dirago,*E bile o gwerana le batho bao ba sa botegelego balekane ba bona.
19 O dula o bolela dilo tše mpe,E bile o dula o bolela maaka.
20 O dula fase le ba bangwe gomme wa bolela gampe ka ngwaneno,O utolla diphošo tša ngwana wa mmago.
21 Ge o be o dira dilo tše, ke ile ka homola.Ka gona, wa nagana gore ke tla swana le wena.
Eupša gona bjale ke tlo go kgalemela,Gomme ka go bontšha diphošo tša gago.
22 Hle, kwešišang se lena bao le se nago taba le Modimo,E le gore ke se ke ka le rathaganya gwa hloka le yo a le phološago.
23 Yo a dirago sehlabelo e le go nteboga, ke yena a ntumišago.Ge e le yo a dulago a dira seo se lokilego,Ke tla mo phološa.”
Mengwalo ya tlase
^ Phetolelo ya lentšu ka lentšu e re, “diphooko.”
^ Goba mohlomongwe, “o utswa le lona.”
