Psalme 51:1-19
Ditaelo tšeo di yago go mohlahli. Koša yeo Dafida a e hlamilego ka morago ga gore moporofeta Nathane a mo kgalele gore o robetše le Batseba.
51 Nkwele bohloko hle Modimo, ka baka la lerato la gago le le botegago.
Phumola sebe sa ka ka baka la kgaugelo ya gago e kgolo.
2 Ntlhatswe molatong wa ka,O ntlhwekiše sebeng sa ka.
3 Gobane ke tseba diphošo tša ka,Gomme ke dula ke gopola sebe sa ka.
4 Ke tloga ke go diretše sebe,Ke dirile dilo tše mpe pele ga gago.
Ka baka leo o na le tshwanelo ya go nkahlola,Gomme kahlolo ya gago e lokile.
5 Ke belegwe ke na le molato,Le gona mma o nkimile ke na le sebe.
6 Wena o kgahlwa ke therešo yeo e lego pelong ya motho.Nthuše gore ke be le pelo e bohlale.
7 Ntlhwekiše sebeng sa ka ka semela se se bitšwago hisopo e le gore ke hlweke.Ntlhatswe e le gore ke šweufale go feta kapoko.
8 Anke o dire gore ke thabe gape,E le gore ke boele ke thabe le ge o pšhatlagantše marapo a ka.
9 Ntebalele dibe tša ka,O be o phumole le melato ya ka ka moka.
10 Modimo, ke kgopela o nthuše gore ke be le pelo e sekilego,Gomme o nthuše gore ka mehla ke kganyoge go dira dilo tše di lokilego.
11 O se ke wa ntahlela kgole le wena,Le gona o se ke wa nkamoga moya wa gago o mokgethwa.
12 Dira gore ke boele ke thabišwe ke gore o mphološitše,Ntire gore ke kganyoge go go kwa.
13 Ke tla ruta badirabobe ditsela tša gago,E le gore ba boele go wena.
14 Wena Modimo wa ka, ke wena o mphološago, ke kgopela o ntebalele ka ge ke bolaile motho,E le gore ke kgone go bolela ka go loka ga gago ke thabile.
15 Hle Jehofa, ntumelele ke bolele,E le gore ke kgone go go tumiša.
16 Gobane ga o nyake sehlabelo, go sego bjalo ke be ke tla go nea sona.Ga o thabišwe ke sebego sa go fišwa.
17 Modimo o amogela dihlabelo tša batho bao ba itsholago go tšwa pelong.Wena Modimo, o ka se furalele pelo e nyamilego le e kwelego bohloko.
18 Direla Tsione dilo tšeo di lokilego,Tsošološa maboto a Jerusalema.
19 Ke moka, o tla kgahlwa ke dihlabelo tša batho ba go loka,Dihlabelo tša go fišwa le diphoofolo tšeo di neelwago di feletše,Ke moka dipoo di tla neelwa aletareng ya gago.
