Doiteronomio 19:1-21
19 “Ge Jehofa Modimo wa lena a fediša ditšhaba tša naga yeo yena Jehofa Modimo wa lena a tlago go le nea yona, gomme le di amogile naga yeo e bile le dula metseng ya tšona le dintlong tša tšona,
2 le kgethe metse e meraro nageng yeo Jehofa Modimo wa lena a le neago yona gore e be ya lena.
3 Le arole naga yeo Jehofa Modimo wa lena a le neilego yona ka diripa tše tharo, gomme le dire ditsela e le gore motho le ge e le ofe yo a bolailego yo mongwe ka phošo, a tšhabele go o mongwe wa metse yeo.
4 “Bjale seo motho yo a bolailego motho yo mongwe ka phošo a swanetšego go se dira gore a phološe bophelo bja gagwe ke se: Ge a ka bolaya motho ka phošo gomme a be a se a mo hloya,
5 go swana le ge a ka re a be a sepetše le motho yo mongwe sethokgweng go yo rwala dikgong, gomme ya re ge a emišitše letsogo gore a reme mohlare ka selepe, ke moka hlogwana ya selepe ya tšwa go mpheng wa sona gomme ya itia motho yoo a hwa, gona motho yoo a tšhabele go o mongwe wa metse yeo gore a phološe bophelo bja gagwe.
6 Eupša ge e ba motse woo mmolai yoo a swanetšego go tšhabela go wona o be o le kgole, motho yo a lefeletšago yo a bolailwego o be a ka kitimiša mmolai yoo, gomme a mo swara a mmolaya ka ge a tla be a sa kwatile kudu. Eupša motho yo a bolailego yo mongwe a be a se a ikemišetša, o be a se a swanela go hwa ka gobane o be a se a hloya motho yo a mmolailego.
7 Ke ka baka leo ke le laelago gore: ‘Le kgethe metse e meraro.’
8 “Jehofa Modimo wa lena o tla oketša tikologo ya lena feela bjalo ka ge a enetše borakgolokhukhu ba lena, e bile o tla le nea naga ka moka yeo a ba tshepišitšego yona.
9 O tla dira se ge e ba le latela melao ka moka yeo ke le neago yona lehono. Se se ra gore le swanetše go rata Jehofa Modimo wa lena e bile le dule le sepela ditseleng tša gagwe. Ke moka ge Modimo a okeditše tikologo ya lena, le oketše ka metse e mengwe e meraro go yela e mengwe e meraro.
10 Ge le ka dira bjalo, ga go na motho yo a se nago molato yo a tlago go bolawa nageng yeo Jehofa Modimo wa lena a le neago yona e le bohwa. E bile ga go na motho yo a tlago go le bona molato wa gore le bolaile motho yo mongwe.
11 “Eupša ge e ba motho a be a hloile motho yo mongwe gomme a be a mo laletše gore a tle a mo hlasele, ke moka a mo itia a mmolaya, gomme mmolai yoo a tšhabetše go o mongwe wa metse ye,
12 gona banna ba bagolo ba motse wa gabo ba romele batho gore a tšewe moo, gomme ba mo nee motho yo a lefeletšago yo a bolailwego ke moka a mmolaye.
13 O se ke wa mo kwela bohloko, gomme o tloše motho yo a bolayago batho bao ba se nago molato mo Isiraeleng, e le gore dilo di go sepelele gabotse.
14 “Ge o fihla nageng yeo Jehofa Modimo wa gago a go filego yona gore e be ya gago, o se ke wa fokotša goba wa oketša moo naga ya moagišane wa gago e felelago gona, e lego mellwane yeo e beilwego ke borakgolokhukhu ba gago.
15 “Motho a ka se bonwe molato ge e ba go na le hlatse e tee feela yeo e hlatselago gore motho yoo o dirile molato goba sebe. Go nyakega gore go be le dihlatse tše pedi goba tše tharo gore taba yeo e tiišwe.
16 Ge motho a ka nea bohlatse bja maaka ka motho yo mongwe gomme a mmea molato wa gore go na le phošo yeo a e dirilego,
17 gona batho bao ba babedi bao ba lwago ba eme pele ga Jehofa, e lego pele ga baperisita le baahlodi bao ba tla bego ba hlankela ka nako yeo.
18 Baahlodi ba tla nyakišiša taba yeo gabotse, gomme ge e ba motho yo a neilego bohlatse a boletše maaka ka motho yo mongwe, e bile a mo latofatša ka maaka,
19 gona le direng motho yoo seo a bego a nyaka go se dira motho wa gabo, le tloše motho yo mobe gare ga lena.
20 Ke moka batho ba bangwe ka moka ba tla kwa seo se diregilego gomme ba tšhoga, le gona mo gare ga lena ba ka se tsoge ba dirile selo se sebe sa go swana le se.
21 O se ke wa mo kwela bohloko. Bophelo bo patelwe ka bophelo, leihlo ka leihlo, leino ka leino, seatla ka seatla le lenao ka lenao.
