Doiteronomio 2:1-37
2 “Ke moka ra tloga ra boela lešokeng ka tsela ya Lewatle le Lehwibidu, feela bjalo ka ge Jehofa a mpoditše, gomme ra fetša matšatši a mantšhi re sepela go dikologa Thaba ya Seire.
2 Mafelelong Jehofa a re go nna:
3 ‘Ke kgale le sepela go dikologa thaba ye, bjale gona go lekane. Eyang ka thoko ya leboa.
4 O botše setšhaba o re: “Le tlo feta mollwaneng wa ditlogolwana tša Esau e lego banababo lena bao ba dulago Seire. Ba tlo le boifa, gomme lena le itlhokomeleng.
5 Le se ke la lwa le bona ka gobane nka se le nee naga le ge e le efe ya bona. Nka se le nee naga yeo e ka lekanago le moo motho a ka beago leoto, ka gobane ke neile Esau Thaba ya Seire gore e be ya gagwe.
6 Le je dijo tšeo le di rekilego go bona, le gona le nwe meetse ao le tlago go a reka.
7 Ka gobane Jehofa Modimo wa lena o le šegofaditše dilong ka moka tšeo le di dirilego. O be a dutše a le lebeletše ge le tšama le sepela lešokeng le le legolo. Jehofa Modimo wa lena o be a dutše a na le lena mengwageng ye e 40, e bile ga se la ka la hloka selo.”’
8 Ka gona re ile ra feta kgauswi le ditlogolwana tša Esau e lego bana babo rena bao ba dulago Seire, ra sepelela kgole le tsela ya Araba, go tloga Elathe le Etsione-gebere.
“Ka morago ga moo, ra boela morago ka tsela ya lešokeng la Moaba.
9 Ka morago Jehofa a re go nna: ‘Le se ke la hlasela Bamoaba goba la lwa le bona, ka gobane nka se le nee naga le ge e le efe ya bona, ka ge ke neile ditlogolwana tša Lota naga ya Ari gore e be ya bona.
10 (Baemi ba be ba kile ba dula moo nakong e fetilego. E be e le setšhaba se matla e bile e le se sentšhi. Le gona e le batho ba batelele go swana le Baanaki.
11 Barefai le bona ba be ba swana le Baanaki, gomme Bamoaba ba be ba bitša Barefai gore ke Baemi.
12 Nakong e fetilego Bahori ba be ba dula Seire eupša ditlogolwana tša Esau di ile tša ba amoga naga yeo, tša ba fediša gomme tša dula go yona. Di ile tša dira seo Baisiraele ba tlago go se dira nageng ya bona yeo Jehofa a tlago go ba fa yona.)
13 Bjale sepelang le yo tshela moedi wa Tsereda.’ Ke moka ra ya ra yo tshela moedi wa Tsereda.
14 Nako ka moka yeo re e feditšego re sepela go tloga Kadeshe-baranea go fihlela re tshela moedi wa Tsereda e bile mengwaga e 38. Re sepetše go fihlela moloko ka moka wa banna bao ba bego ba elwa ntweng ba ehwa, feela bjalo ka ge Jehofa a kile a ba enela.
15 Jehofa o ile a diriša matla* a gagwe go ba fediša go fihlela ba hwile ka moka.
16 “Ya re kapejana ge banna ka moka bao ba bego ba eya ntweng ba hwile mo setšhabeng,
17 Jehofa a bolela le nna gape a re:
18 ‘Lehono le tlo feta mollwaneng wa naga ya Moaba, e lego Ari.
19 Ge le feta kgauswi le Baamoni, le se ke la ba tshwenya goba la ba hlasela, ka gobane nka se le nee naga le ge e le efe ya Baamoni gore e be ya lena, ka ge ke e neile ditlogolwana tša Lota gore e be ya tšona.
20 Naga yeo le yona e be e tšewa e le naga ya Barefai. (Barefai ba be ba kile ba dula moo nakong e fetilego gomme Baamoni ba be ba ba bitša Batsamutsumi.
21 E be e le setšhaba se matla le se sentšhi. Le gona batho ba gona e be e le ba batelele go swana le Baanaki. Eupša Jehofa o ile a thuša Baamoni gore ba fediše Barefai, e le gore ba ba rake nageng yeo gomme ba dule go yona.
22 Se ke seo a ilego a se dira ge a be a thuša ditlogolwana tša Esau tšeo di dulago Seire gore di fenye Bahori e le gore di ba amoge naga, gomme di tle di dule go yona go ba go fihla le lehono le.
23 Ge e le Baafi bona ba ile ba dula metseng yeo e fihlago ka Gatsa, go fihlela Bakafutori ba etla ba ba fediša gomme ba tšea metse yeo ba dula go yona.)
24 “‘Sepelang, le yeng le tshele Moedi wa Arinoni. Tsebang gore ke tlo dira gore le fenye Sihoni kgoši ya Heshibone wa Moamore. Ka gona, thomang go tšea naga ya gagwe gomme le lwe le yena.
25 Lehono ke tla dira gore batho ka moka lefaseng bao ba kwelego go bolelwa ka lena ba le boife le go le tšhaba. Ba tla ferekana le go thothomela ka baka la lena.’
26 “Ke moka ka romela batho go tšwa lešokeng la Kedemothe gore ba ye go Kgoši Sihoni wa Heshibone, gore ba mmotše molaetša* wo o rego:
27 ‘Re kgopela go feta nageng ya gago. Re tla sepela feela tseleng e kgolo. Re ka se ye ka go le letona goba ka go le letshadi.
28 Re tla ja feela dijo tšeo o tlago go re rekišetša tšona, le go nwa meetse ao o tlago go re rekišetša wona. Wena e no re dumelela feela gore re fete mo nageng ya gago,
29 go fihlela re tshetše Noka ya Jorodane gomme re tsene nageng yeo Jehofa Modimo wa rena a re neago yona, go no swana le ge ditlogolwana tša Esau tšeo di dulago kua Seire le Bamoaba bao ba dulago kua Ari ba ile ba re dumelelela gore re fete nageng ya bona.’
30 Eupša Kgoši Sihoni wa kua Heshibone ga se a re dumelela re feta nageng ya gagwe, ka gobane Jehofa Modimo wa lena o ile a mo lesa gore a be le manganga le go thatafiša pelo ya gagwe, e le gore le tle le mo fenye, go etša ge le dirile lehono le.
31 “Ke moka Jehofa a re go nna: ‘Tsebang gore ke šetše ke thomile go dira gore le fenye Sihoni le naga ya gagwe. Thomang go tšea naga ya gagwe gore e be ya lena.’
32 Ge Sihoni a etla le mašole a gagwe ka moka gore ba lwe le rena kua Jahatsa,
33 Jehofa Modimo wa rena o ile a re neela yena, gomme ra fenya yena, barwa ba gagwe le mašole a gagwe ka moka.
34 Ke moka ka nako yeo, re ile ra thopa metse ya gagwe ka moka, ra fediša motse o mongwe le o mongwe, go akaretša banna, basadi le bana, gomme ra se tlogele motho le ge e ka ba o tee yo a phologago.
35 Re ile ra tšea feela diruiwa le dilo tša metseng yeo re bego re e thopile.
36 Go tloga ka Aroere, yeo e lego moo go thomago Moedi wa Arinoni, le go tloga ka motse woo o lego moeding, go fihla ka Gileada, go be go se na motse woo re bego re sa kgone go fihla go wona. Jehofa Modimo wa rena o be a re neile yona ka moka.
37 Eupša ga se la ka la batamela naga ya Baamoni, e lego Moedi wa Jaboko ka moka le metse ya tikologong yeo go nago le dithaba. Le gona, ga se la ka la ya lefelong le ge e le lefe leo Jehofa Modimo wa rena a rilego le se ke la ya go lona.
Mengwalo ya tlase
^ Phetolelo ya lentšu ka lentšu e re, “letsogo la gagwe.”
^ Phetolelo ya lentšu ka lentšu e re, “mantšu a khutšo.”
