Doiteronomio 20:1-20
20 “Ge le ka re le ile ntweng go yo lwa le manaba a lena, gomme la bona dipere tša ona, dikoloi tša ona tša ntwa le mašole a ona e le a mantšhi go feta a lena, le se ke la a boifa, ka gobane Jehofa Modimo wa lena yo a le ntšhitšego nageng ya Egepeta o na le lena.
2 Ge le le kgauswi le go ya ntweng, moperisita a tle gomme a bolele le setšhaba.
3 A se botše a re: ‘Theetšang lena Baisiraele, le kgauswi le go lwa le manaba a lena. Bjale le se ke la tšhaba. Le se ke la tlalelwa, e bile le se ke la thothomela ka baka la ge le boifa manaba a lena,
4 ka gobane Jehofa Modimo wa lena o sepela le lena gore a le lwele manabeng a lena e le gore a le phološe.’
5 “Balaodi ba mašole ba swanetše go botša mašole ba re: ‘Na go na le monna yo a agilego ntlo e mpsha gomme a se a tšwa a dula go yona? A a boele ntlong ya gagwe, go sego bjalo a ka hwela ntweng, gomme monna yo mongwe a tla a dula go yona.
6 Na go na le monna yo a bjetšego mašemo a gagwe a diterebe gomme a se a tšwa a thoma go buna dienywa tša wona? A a tloge a boele ntlong ya gagwe, go sego bjalo, a ka tla a hwela ntweng gomme monna yo mongwe a tla a buna diterebe tšeo.
7 Le gona, na go na le monna yo a tshepišitšego mosadi gore o tla mo nyala gomme a se a tšwa a mo nyala? A a boele ntlong ya gagwe, go sego bjalo a ka hwela ntweng gomme monna yo mongwe a tla a nyala mosadi yoo.’
8 Balaodi ba mašole ba swanetše go botšiša mašole ba re: ‘Na go na le monna yo a tšhogilego le yo a boifago? A a tloge a boele ntlong ya gagwe, e le gore a se tlo tšhoša mašole a mangwe go no swana le ge yena a tšhogile.’
9 E re ge balaodi ba mašole ba feditše go bolela le mašole, ba kgethe le balaodi ba bangwe ba mašole, e le gore ba tle ba etelele pele mašole ntweng.
10 “Ge le batamela motseng go yo lwa le batho ba moo, le thome pele ka go ba botša gore le tlile ka khutšo.
11 Ge e ba batho ba motse woo ba dumela go dira khutšo le lena, e bile ba le buletše dikeiti gore le tsene motseng wa bona, gona batho ka moka ba moo e tla ba ba lena, gore ba tle ba le šomele ka thata ba be ba le hlankele.
12 Eupša ge e ba batho ba motse woo ba gana go dira khutšo le lena, e bile ba elwa le lena, gona le ba hlasele,
13 gomme Jehofa Modimo wa lena o tla dira gore le ba fenye, ke moka le bolaye monna yo mongwe le yo mongwe ka tšhoša.
14 Le tlogele feela basadi, bana, diruiwa le dilo ka moka tša moo motseng gore le tle le di tšee e be tša lena. Le tla tšea dilo ka moka tše bohlokwa tša manaba a lena tšeo Jehofa Modimo wa lena a le neilego tšona.
15 “Se ke seo le tlago go se dira batho ba metse ka moka yeo e lego kgole kudu le lena, e lego batho ba metse ya ditšhaba tša kgauswi le lena.
16 Le bolaye batho ka moka* bao ba dulago metseng ya naga yeo Jehofa Modimo wa lena a tlago go le nea yona e le bohwa.
17 Le fediše Bahethe, Baamore, Bakanana, Baperetse, Bahefe le Bajebusi, feela bjalo ka ge Jehofa Modimo wa lena a le laetše.
18 E le gore ba se ke ba le ruta go dira dilo ka moka tše di šišimišago tšeo ba di dirago ge ba hlankela medimo ya bona. Modimo o hloile dilo tšeo ba di dirago, e bile di ka le dira gore le direle Jehofa Modimo wa lena sebe.
19 “Ge le ka hlasela motse ka matšatši a mantšhi, la lwa le wona e le gore le o thope, ga se la swanela go senya mehlare ya wona ka go e rema ka selepe. Le je dienywa tša mehlare yeo, eupša le se ke la e rema. Na le ka hlasela mehlare ya nageng bjalo ka ge eka le hlasela motho?
20 Le reme feela mehlare yeo le tsebago gore dienywa tša yona ga di jewe. Le ka rema mehlare yeo gomme la diriša dikota tša yona go ageletša motse woo le tlago go o hlasela, go ba go fihlela motse woo o fedišitšwe.
Mengwalo ya tlase
^ Goba, “selo le ge e le sefe se se phelago.”
