Doiteronomio 26:1-19
26 “Ge mafelelong o tsene nageng yeo Jehofa Modimo wa gago a go neilego yona gore e be bohwa bja gago, gomme o e tšere e le ya gago e bile o dula go yona,
2 gona o tšee tše dingwe tša dilo ka moka tšeo o di bunnego pele nageng yeo Jehofa Modimo wa gago a tlago go go nea yona. O tšee dilo tšeo o di tsenye ka manking gomme o ye lefelong leo Jehofa Modimo wa gago a tlago go le kgetha gore le mo hlankele go lona.*
3 O ye go moperisita yo a tla bego a hlankela ka nako yeo, gomme o re go yena: ‘Lehono ke tlile mo go tlo botša Jehofa Modimo wa gago gore ke fihlile nageng yeo Jehofa a enetšego borakgolokhukhu ba rena gore o tla re nea yona.’
4 “Ke moka moperisita a tšee manki woo ka seatleng sa gago, gomme a o bee ka pele ga aletare ya Jehofa Modimo wa gago.
5 O bolele o le pele ga Jehofa Modimo wa gago o re: ‘Rakgolokhukhu wa ka e be e le Moarama yo a bego a tšama a sepela le dinaga, gomme a ya Egepeta a yo dula moo e le motšwantle le ba lapa la gagwe, e le ba sego kae ka palo. Eupša ge a le moo o ile a fetoga setšhaba se segolo, se matla le se sentšhi kudu.
6 Le gona Baegepeta ba ile ba re swara gampe, ba re hlakiša e bile ba re šomiša ga boima.
7 Ka gona re ile ra thoma go llela Jehofa Modimo wa borakgolokhukhu ba rena, gomme Jehofa a re kwa, a bona go hlaka ga rena, mathata a rena le kamoo re bego re gatelelwa ka gona.
8 Mafelelong Jehofa o ile a re ntšha Egepeta a diriša matla a gagwe a magolo, dilo tšeo di boifišago kudu, gotee le dipontšho le mehlolo.
9 Ke moka a re tliša lefelong le gomme a re nea naga ye, e lego naga yeo e elago maswi le todi ya dinose.
10 Bjale ke tlišitše dilo tšeo ke di bunnego pele tšeo di tšwago nageng yeo Jehofa a nneilego yona.’
“O di bee pele ga Jehofa Modimo wa gago gomme o khuname pele ga Jehofa Modimo wa gago.
11 O thabele dilo ka moka tše botse tšeo Jehofa Modimo wa gago a di neilego wena le ba lapa la gago, a di neilego wena, Balefi le batho bao e sego Baisiraele bao ba dulago le lena.
12 “Ke moka, ka ngwaga wa boraro ge o feditše go kgoboketša karolo ya lesome ya dilo ka moka tše o di bunnego, o e fe Balefi, batho ba e sego Baisiraele, ditšhiwana le bahlologadi, gomme bona ba tla ja ba ba ba khora ba le metseng ya lena.
13 Ka morago ga moo o bolele pele ga Jehofa Modimo wa gago o re: ‘Ke ntšhitše dilo tše tše kgethwa ntlong ya ka ka di nea Balefi, batho ba e sego Baisiraele, ditšhiwana le bahlologadi, go ya le ka mokgwa wo o ntaetšego ka gona. Ga se ka tshela ditaelo tša gago goba go di lebala.
14 Ga se ka ja selo le ge e le sefe sa dilo tšeo ge ke be ke kwele bohloko ka baka la go hlokofalelwa, goba ka tloša selo le ge e le sefe sa dilo tšeo ge ke be ke se ka hlweka, e bile ga se ka nea motho yo a hwilego se sengwe sa dilo tšeo. Ke ile ka theetša seo Jehofa Modimo wa ka a se bolelago, gomme ka dira dilo ka moka tšeo o ntaetšego tšona.
15 Bjale lebelela fase o le lefelong la gago le lekgethwa, e lego magodimong, gomme o šegofatše setšhaba sa gago sa Baisiraele, feela bjalo ka ge o enetše borakgolokhukhu ba rena, e bile o šegofatše le naga yeo o re neilego yona, e lego yona naga yeo e elago maswi le todi ya dinose.’
16 “Lehono le Jehofa Modimo wa gago o go laela gore o latele ditaelo tše le melao ye, o di latele le go di dira ka pelo ya gago ka moka le ka moya wa gago ka moka.
17 Lehono Jehofa o le botša gore e tla ba Modimo wa lena ge le dutše le sepela ditseleng tša gagwe, le ekwa melao le ditaelo tša gagwe e bile le mo theetša.
18 Le gona lehono Jehofa o le kwele ge le bolela gore le tla ba setšhaba sa gagwe, e lego bona batho ba gagwe ba bohlokwa, feela bjalo ka ge a le tshepišitše, e bile le mo tshepišitše gore le tla kwa melao ya gagwe ka moka,
19 ke moka yena o tla dira gore le fete ditšhaba tše dingwe ka moka tšeo a di dirilego, o tla dira gore batho ba le rete le go le tumiša ge le dutše le tšwela pele le bontšha gore le setšhaba se sekgethwa go Jehofa Modimo wa lena, feela bjalo ka ge a tshepišitše.”
Mengwalo ya tlase
^ Phetolelo ya lentšu ka lentšu e re, “gore leina la gagwe le be go lona.”
