Doiteronomio 30:1-20
30 “Ge dilo tše ka moka di le diragalela, e lego ditšhegofatšo le dithogako tšeo ke le dumeletšego gore le di kgethe, gomme le di gopola le le ditšhabeng tšeo Jehofa Modimo wa lena a le phatlaladitšego go tšona,
2 ke moka lena le bana ba lena la boela go Jehofa Modimo wa lena ka dipelo tša lena ka moka le ka moya wa lena ka moka, gomme la dira dilo ka moka tšeo ke le laetšego tšona lehono,
3 gona Jehofa Modimo wa lena o tla buša bao ba bego ba thopilwe, a le gaugela gomme a le kgobokanya go tšwa ditšhabeng ka moka tšeo yena Jehofa Modimo wa lena a bego a le phatlaladitše go tšona.
4 Le ge e ba setšhaba sa lena se phatlaletše go fihla mafelelong a lefase, Jehofa Modimo wa lena o tla le kgobokanya gomme a le buša.
5 Jehofa Modimo wa lena o tla le tliša nageng yeo botatago lena ba e tšerego ya ba ya bona, gomme le tla dula go yona. O tla le šegofatša, a ba a dira gore le be ba bantšhi go feta botatago lena.
6 Jehofa Modimo wa lena o tla hlwekiša dipelo tša lena le dipelo tša ditlogolwana tša lena, e le gore le rate yena Jehofa Modimo wa lena ka dipelo tša lena ka moka le ka moya wa lena ka moka, gomme le tle le phele.
7 Jehofa Modimo wa lena o tla rogaka manaba a lena, e lego bao ba bego ba le hloile le bao ba bego ba le tlaiša.
8 “Ge e le lena le tla boela la theetša lentšu la Jehofa la ba la dira dilo ka moka tšeo ke le boditšego tšona lehono.
9 Le gona Jehofa Modimo wa lena o tla šegofatša dilo ka moka tšeo le di dirago. O tla dira gore le be le bana ba bantšhi, diruiwa tše dintšhi e bile le dilo tšeo le di bjetšego e tla ba tše dintšhi, ka gobane Jehofa o tla thabela gore dilo di le sepelele gabotse go swana le ge a ile a thabela go di direla borakgolokhukhu ba lena.
10 Ka gobane le tla theetša Jehofa Modimo wa lena, la latela ditaelo tša gagwe le melao ya gagwe tšeo di ngwadilwego ka pukung ye ya Molao. Le gona le tla boela go Jehofa Modimo wa lena ka dipelo tša lena ka moka le ka moya wa lena ka moka.
11 “Ditaelo tšeo ke le botšago tšona lehono ga di thata e bile le ka kgona go di latela.
12 Ga di magodimong moo le ka rego: ‘Ke mang a ka yago magodimong gore a re tlele le tšona, e le gore re di kwe le go di latela?’
13 Le gona ga di ka kua ga lewatle, moo le ka rego: ‘Ke mang a ka tshelelago ka kua ga lewatle gore a re tlele le tšona, e le gore re di kwe le go di latela?’
14 Ka gobane mantšu a a kgauswi kudu le lena, a ka melomong ya lena le ka dipelong tša lena e le gore le a latele.
15 “Lehono kgethang bophelo goba lehu, dilo tše dibotse goba tše mpe.
16 Ge e ba le ka theetša ditaelo tša Jehofa Modimo wa lena tšeo ke le botšago tšona lehono, ka gore le rate Jehofa Modimo wa lena, le sepele ditseleng tša gagwe, le kwe melao ya gagwe le ditaelo tša gagwe, gona le tla dula le phela e bile le tla ba ba bantšhi, gomme Jehofa Modimo wa lena o tla le šegofatša nageng yeo le yago go e tšea gore e be ya lena.
17 “Eupša ge e ba dipelo tša lena di ka hlanogela Modimo gomme la se mo theetše, la goketšega gomme la thoma go rapela le go hlankela medimo e mengwe,
18 gona lehono ke le botša gore ruri le tlo fedišwa. Le ka se phele nako e telele nageng yeo le tshelago Noka ya Jorodane gore le yo e tšea gore e be ya lena.
19 Lehono magodimo le lefase ke dihlatse tša gore ke dirile gore le kgethe bophelo goba lehu, tšhegofatšo goba thogako. Ka gona lena le bana ba lena le kgethe bophelo e le gore le dule le phela.
20 Le rate Jehofa Modimo wa lena, ka go kwa lentšu la gagwe le ka go mmotegela, ka gobane ke yena a le neago bophelo e bile a ka dirago gore le phele nako e telele, e le gore le tle le dule nageng yeo Jehofa a enetšego borakgolokhukhu ba lena e lego Aborahama, Isaka le Jakobo gore o tla ba nea yona.”
