Doiteronomio 32:1-52
32 “Lena bohle le lego legodimong, theetšang ke bolele,Le lena bohle bao ba le lego lefaseng, theetšang seo ke se bolelago.
2 Tayo ya ka e tla na bjalo ka pula,Mantšu a ka a tla wa bjalo ka phoka.Go no swana le ge dipula tša mesarasarane di nela bjang,Le go swana le ge dipula tša medupi di nela dimela.
3 Ka gobane ke tla tsebatša leina la Jehofa.
Lena batho, bolelang ka bogolo bja Modimo wa rena!
4 Yena ke Leswika, dilo ka moka tšeo a di dirago ga e ke e eba phošo,Ka gobane ka moka ga tšona o di dira ka toka.
Ke Modimo yo a tshepegago, yoo a ka se tsogego a dira dilo ka go hloka toka.O dira dilo tše di lokilego, e bile o di dira gabotse.
5 Batho ba setšhaba se ba dirile dilo tše mpe,
Ga se bana ba gagwe, ke bona ba ipaketšego molato.
Ke setšhaba* seo se dirago dilo tše mpe le seo se sa tshepegego!
6 Na ye ke yona tsela yeo le swanetšego go swara Jehofa ka yona,Lena setšhaba sa ditlaela le sa go se hlalefe?
Na ga se yena Tatago lena yo a le bopilego,Yena yo a le dirilego gore le be setšhaba se se tiilego?
7 Gopolang seo se diregilego kgale,Naganišišang ka seo se diragaletšego batho ba meloko e fetilego.
Botšišang botatago lena, gomme ba tla le botša,Le botšišeng le bakgalabje, le bona ba tla le anegela.
8 Ge yo Godimodimo a be a nea ditšhaba naga,Ge a be a aroganya bana ba Adama,O ile a bea mellwane ya ditšhaba ka moka,Go ya ka palo ya Baisiraele.
9 Ka gobane batho ba Jehofa ke setšhaba sa gagwe,Jakobo yena ke bohwa bja gagwe.
10 O mo hweditše lešokeng,Leganateng leo le se nago selo le leo le nago le medumo e tšhošago.
O ile a mo hlakodiša, a mo hlokomela,A ba a mo šireletša bjalo ka leihlo la gagwe.*
11 Go no swana le ge ntšhu e ruta mafotwana a yona go fofa,E phurulla maphego a yona gomme ya a tšea,Ya a rwala ka maphego a yona,
12 Jehofa le yena o ile a dula a hlahla Jakobo,Gomme ga se a ka a hlankela modimo wa ditšhaba tše dingwe.
13 O ile a dira gore a laole meboto le dithaba tša lefaseng,Moo a ilego a ja dilo tšeo naga e di tšweletšago.
O ile a dula a mo fepa ka todi ya dinose yeo e tšwago leswikeng le legolo,Le ka makhura ao a tšwago leswikeng le lethata.*
14 A dula a mo nea potoro le maswi ao a tšwago go dikgomo le go dinku le dipudi,Le makhura a dinku,Gotee le dinku tše tona tša kua Bashani le diphooko.A mo nea le korong e botsebotse,Le gona o ile a mo nea beine yeo e dirilwego ka jusi ya diterebe gore a e nwe.
15 Wena Jeshuruni* ge o be o thoma go nona, o ile wa hlanogela mong wa gago.
O nonne, o yo mokoto, e bile o khoše kudu.
Bjale o tlogetše Modimo yo a go dirilego,Le gona o nyaditše Leswika leo le go phološago.
16 Baisiraele ba ile ba galefiša Modimo ka go rapela medimo ya ditšhaba tše dingwe.Ba ile ba mo kweša bohloko ka go dira dilo tše di šišimišago.
17 Ba be ba direla batemona dihlabelo, ba sa direle Modimo,Ba direla medimo yeo ba bego ba sa e tsebe,E lego medimo e meswa, yeo e sa tšwago go fihla,Yeo borakgolokhukhu ba bona ba bego ba sa e tsebe.
18 Le lebetše Modimo wa lena, yena Leswika la lena, e lego tatago lena.Ee, la lebala yena Modimo yo a le neilego bophelo.
19 Ge Jehofa a bona seo ba se dirilego a ba lahla,Ka gobane barwa le barwedi ba gagwe ba mo kgopišitše.
20 Ka gona a re: ‘Nka se ba thuše,Ke tla bona gore ba tla feleletša kae.
Ka gobane ke setšhaba seo se dirago dilo tše mpe,Ke bana bao nka se ba tshepego.
21 Bona ba nkgalefišitše ka baka la go hlankela medimo ya maaka.Ba nkgopišitše ka medimo ye ya bona ya go hloka mohola.
Le nna ke tla diriša setšhaba seo se se nago mohola gore ba be le mona.Ke tla ba kgopiša ka setšhaba sa ditlaela.
22 Ka gobane ke galefile kudu bjalo ka mollo wo o tukago,O tlo tuka go fihla tlasetlase Lebitleng,*Ke moka, wa tšhuma lefase le dilo tšeo le di tšweleditšegoWa ba wa fiša le metheo ya dithaba.
23 Ke tla ba okeletša mathata,Go tlo ba bjalo ka ge eka ke ba betša ka mesebe e mentšhi.
24 Tlala e tla ba fetša matla, gomme ba fetšwa ke bolwetši bja go fiša kudu,E bile ba tla fedišwa gabohloko.
Ke tla romela dibata gore di ba lome,Ka ba ka romela le digagabi tšeo di nago le mpholo gore le tšona di ba lome.
25 Bao ba lego ka ntle ga dintlo ba tla fetšwa ke tšhoša,Gomme bao ba lego ka dintlong ba fetšwa ke letšhogo.Go tla fela masogana le dikgarebe,Gwa fela le masea gotee le bakgalabje le bakgekolo.
26 Nkabe ke rile: “Ke tla ba phatlalatša,E le gore batho ba se sa ba gopola,”
27 Eupša ke be ke sa nyake go kgopišwa ke lenaba,Ka gobane manaba a ka no se kwešiše taba yeo gabotse.
A ka no re: “Re fentše ka baka la matla a rena,Ga se Jehofa yo a dirilego tše ka moka.”
28 Ka gobane Baisiraele ke setšhaba sa batho bao ba se nago tlhaologanyo,E bile ga ba kwešiše.
29 Ge nkabe ba le bohlale, ba be ba tla naganišiša ka se.
Ba be ba tla nagana gore ba tlo felela kae.
30 Lenaba letee, le ka kgona bjang go kitimiša Baisiraele ba 1 000 (sekete),Gomme manaba a mabedi a kgona bjang go kitimiša Baisiraele ba 10 000 (dikete tše lesome)?
A ka kgona se ge feela Leswika la bona le ba lahlile,Gomme yena Jehofa a ba tlogetše gore manaba a bona a ba fenye.
31 Ka gobane leswika la lenaba, ga le swane le Leswika la rena Baisiraele,Gaešita le manaba a rena a kwešiša se.
32 Ka gobane ba swana le mehlare ya diterebe ya kua SodomaLe ya mašemong a kua Gomora.
Diterebe tša bona di na le mpholo,E bile di a baba.
33 Beine ya bona e swana le mpholo wa dinogaLe mpholo o kotsi wa dipeetla.
34 Ditiro tša bona ka moka ke di beile go nna,Ka di tswalelela mo ke bolokelago dilo.
35 Ke nna ke lefetšago le go otla batho ba babe,Ka nako e beilwego ge maoto a bona a thelela.Ka gobane letšatši la gore ba welwe ke kotsi le kgauswi,Gomme seo se tlago go ba diragalela se tla tla kapela.’
36 Ka gobane Jehofa o tla ahlola setšhaba sa gagwe,E bile o tla kwela bohloko bahlanka ba gagwe,Ge a bona gore ba feletšwe ke matla,Le gore go šetše feela bao ba sa kgonego go itwela le bao ba fokolago.
37 Ke moka yena o tla re: ‘Medimo ya bona e kae,Lona leswika leo ba bego ba tšhabela go lona,
38 E lego yona medimo yeo e bego e eja makhura a dihlabelo tša bona,E enwa le beine ya dibego tša bona tša dino?
Anke e tleng gomme e le thuše.
Anke e be lefelo la lena leo le tšhabelago go lona.
39 Tsebang gore nna ke nna ModimoGomme ga go na modimo o mongwe ka ntle le nna.
Ke a bolaya e bile ke nea bophelo.
Ke dira gore batho ba gobale, e bile ke nna ke tlago go ba alafa,Le gona ga go na motho yo a ka phološago ba bangwe go nna.*
40 Ka gobane ke ikana ke emišeditše seatla sa ka godimo,Gomme ke re: “Ke ikana ka nna yo ke tlago go dula ke le gona go ya go ile,”
41 Ge ke loutša tšhoša ya ka yeo e phadimago,Gomme ke itokišeletša go ahlola,Gona ke tla lefetša manaba a ka,Gomme ka ba ka otla bao ba ntlhoilego.
42 Ke tla dira gore mesebe ya ka e tagwe ke madi,Gomme tšhoša ya ka yona e tla ja nama.Ke tla nwa madi a bao ba bolailwego gasehlogo le bao ba thopilwego,Gomme ka ja dihlogo tša baetapele ba lenaba.’
43 Thabang lena batho ba go tšwa ditšhabeng ka moka, le thabeng le batho ba gagwe,Ka gobane o tla lefeletša madi a bahlanka ba gagwe,A ba a itefeletša le go manaba a gagweGomme a lebalela batho ba gagwe bao ba dirilego dibe mo nageng.”
44 Ka gona Moshe a tla a bolela mantšu ka moka a koša ye gomme setšhaba se mo theeditše, o be a na le Hoshea* morwa wa Nuni.
45 Ka morago ga gore Moshe a fetše go botša Baisiraele ka moka mantšu a ka moka,
46 o ile a re go bona: “Le naganišišeng ka mantšu a ka moka ao ke le botšago ona lehono, gore le tle le rute bana ba lena e le gore ba tle ba latele mantšu ka moka a Molao wo.
47 Ka gobane mantšu a a bohlokwa kudu, gomme le tla phela ge e ba le a kwa. Le gona ge e ba le a kwa, le tla phela nako e telele nageng yeo le tshelago Noka ya Jorodane gore le yo e tšea e be ya lena.”
48 Letšatšing lona leo, Jehofa a bolela le Moshe a re:
49 “Rotogela thabeng ye ya Abarimi, e lego Thaba ya Nebo, yeo e lego nageng ya Moaba, e bile e lebanego le Jeriko, ke moka o bone naga ya Kanana yeo ke e neago Baisiraele gore ba e tšee e be ya bona.
50 Ke moka o tla hwela thabeng yeo o tlago go rotogela go yona, gomme wa bolokwa le batho ba geno, go no swana le ge Arone butiago a hwetše Thabeng ya Horo gomme a bolokwa le batho ba gabo,
51 ka gobane ka moka ga lena ga se la ka la mpotegela ge le be le na le Baisiraele kua meetseng a Meriba yeo e lego Kadeshe lešokeng la Tsini. E bile ga se la ka la ntira yo mokgethwa pele ga setšhaba sa Baisiraele.
52 O tla bona naga yeo ke e neago Baisiraele o le kgole, eupša o ka se tsene go yona.”
Mengwalo ya tlase
^ Goba “moloko.”
^ Goba, “thaka ya leihlo la gagwe.”
^ Phetolelo ya lentšu ka lentšu e re, “legakabjeng.”
^ Leina le le ra gore, “Yo a Lokilego”, e lego sereto sa Isiraele.
^ Bona Tlhaloso ya Mantšu.
^ Phetolelo ya lentšu ka lentšu e re, “ka seatleng sa ka.”
^ Le ke leina la Joshua la mathomong.
