Doiteronomio 6:1-25
6 “Bjale ye ke melao le ditaelo tšeo Jehofa Modimo wa lena a nneilego tšona gore ke le rute tšona, e le gore le tle le phele ka tšona nageng yeo le tshelelago go yona gore le e tšee e be ya lena,
2 e le gore lena le bana ba lena le ditlogolo tša lena le boife Jehofa Modimo wa lena bophelo bja lena ka moka, le be le latele melao ya gagwe ka moka le ditaelo tša gagwe tšeo ke le laelago tšona. Le dire seo e le gore le tle le phele nako e telele.
3 Theetšang lena Baisiraele le be le latele dilo tše, e le gore dilo di le sepelele gabotse gomme le be ba bantšhi kudu nageng yeo e elago maswi le todi ya dinose, feela bjalo ka ge Jehofa Modimo wa borakgolokhukhu ba lena a le tshepišitše.
4 “Theetšang lena Baisiraele: Jehofa Modimo wa rena ke yena Jehofa a nnoši.
5 O rate Jehofa Modimo wa gago ka pelo ya gago ka moka, ka moya wa gago ka moka le ka matla a gago ka moka.
6 Mantšu a ao ke go laelago ona lehono, o a bee pelong ya gago,
7 o dule o a ruta bana ba gago, o bolele ka ona ge o dutše ka ntlong ya gago, ge o sepela tseleng, ge o robala le ge o tsoga.
8 O a tlemelele seatleng sa gago e le gore o a gopole, e bile a be bjalo ka seka* mo phatleng ya gago.
9 O a ngwale diforeimeng tša mejako ya ntlo ya gago le dikeiting tša gago.
10 “Ge Jehofa Modimo wa lena a dira gore le fihle nageng yeo a enetšego borakgolokhukhu ba lena e lego Aborahama, Isaka le Jakobo gore o tla le nea yona, e lego metse e mebotse le e megolo yeo le sego la e aga,
11 dintlo tšeo di tletšego ka dilo tše dintšhi tše dibotse tšeo le sego la di šomela, didiba tšeo le sego la di epa, mašemo a diterebe le mehlare ya mehlware yeo le sego la e bjala, gomme le jele le khoše,
12 le itlhokomele gore le se ke la lebala Jehofa yo a le ntšhitšego nageng ya Egepeta moo le bego le le makgoba.
13 Le boife Jehofa Modimo wa lena, le hlankele yena gomme le ene ka leina la gagwe.
14 Le se ke la hlankela medimo e mengwe, e lego medimo le ge e le efe ya ditšhaba tšeo di dulago kgauswi le lena,
15 ka gobane Jehofa Modimo wa lena yo a lego gare ga lena ke Modimo yo a nyakago gore le hlankele yena a nnoši. Ge le ka se dire bjalo, Jehofa Modimo wa lena o tlo le galefela kudu gomme a le fediša mo lefaseng.
16 “Le se ke la leka Jehofa Modimo wa lena go swana le kamoo le ilego la mo leka ka gona kua Masa.
17 Le kwe melao, dikgopotšo le ditaelo tšeo Jehofa Modimo wa lena a le laetšego gore le di latele.
18 Le dire se se lokilego le se sebotse pele ga Jehofa, e le gore dilo di le sepelele gabotse gomme le tsene nageng e botse yeo Jehofa a e enetšego borakgolokhukhu ba lena le be le dule go yona.
19 Le tla raka manaba a lena ka moka pele ga lena, feela bjalo ka ge Jehofa a tshepišitše.
20 “Ge e ba nakong e tlago bana ba lena ba ka le botšiša ba re: ‘Dikgopotšo tšeo Jehofa Modimo wa rena a le neilego tšona, gotee le melao le ditaelo di ra go re’ng?’
21 Lena le ba botše le re: ‘Re be re le makgoba a Farao kua Egepeta, eupša Jehofa a re ntšha Egepeta a diriša matla a gagwe a magolo.
22 Jehofa o ile a ba bontšha dipontšho le go dira mehlolo e megolo le yeo e boifišago kua Egepeta, a e dira go Farao le go batho ka moka ba ntlong ya gagwe re lebeletše.
23 A re ntšha moo e le gore a re tliše mo gore a re nee naga yeo a e enetšego borakgolokhukhu ba rena.
24 Ke moka Jehofa a re laela gore re latele ditaelo tše ka moka, re boife yena Jehofa Modimo wa rena gore re tle re holege ka dinako ka moka, e le gore re tle re dule re phela go swana le ge re phela lehono le.
25 Le gona ge e ba re latela melao ye ka moka gomme re ekwa Jehofa Modimo wa rena, feela bjalo ka ge a re laetše, gona se se tla ba se bolela gore re lokile.’
Mengwalo ya tlase
^ Goba “lepanta la hlogong.”
