Doiteronomio 9:1-29
9 “Theetšang lena Baisiraele, lehono le tshela Noka ya Jorodane gore le yo tšea naga ya ditšhaba tšeo di le fetago ka bogolo le ka matla, metse e megolo le yeo e šireleditšwego go fihla magodimong,
2 setšhaba se segolo le sa batho ba batelele sa Baanaki, bona bao le ba tsebago le bao le kwelego batho ba bolela ka bona ba re: ‘Ke mang yo a ka fenyago Baanaki?’
3 Ka gona le swanetše go tseba gore lehono le Jehofa Modimo wa lena o tla le eta pele ge le tshela noka. O swana le mollo wo o tšhumago lorelore, gomme o tla ba fediša. O tla ba fenya pele ga lena e le gore le ba rake kapelapela gomme le ba fediše, feela bjalo ka ge Jehofa a le tshepišitše.
4 “Ge Jehofa Modimo wa lena a raka ditšhaba tšeo le se ke la bolela ka dipelong tša lena la re: ‘Jehofa o re tlišitše mo gore re tlo tšea naga ye ka gobane re lokile,’ mola e le gore Jehofa o raka ditšhaba tše mo pele ga lena ka baka la ge di dira dilo tše mpe.
5 Ga se ka baka la ge le lokile goba le tshepega go tšwa pelong ge le eya go tšea naga ya tšona, eupša Jehofa Modimo wa lena o raka ditšhaba tše mo pele ga lena ka baka la ge di dira dilo tše mpe le ka gobane yena Jehofa a phetha seo a se enetšego borakgolokhukhu ba lena, e lego Aborahama, Isaka le Jakobo.
6 Bjale tsebang gore Jehofa Modimo wa lena ga a le nee naga ye e botse gore le dule go yona ka ge le lokile. Ge e le gabotse lena le setšhaba sa dihlogo tše thata.
7 “Le se ke la lebala kamoo le ilego la dira gore Jehofa Modimo wa lena a galefe kua lešokeng. Le ile la se kwe Jehofa go tloga letšatšing leo ka lona le tšwilego nageng ya Egepeta go fihlela ge le fihla mo.
8 Le kua Horebe le ile la galefiša Jehofa, moo Jehofa a ilego a le galefela kudu a ba a nyaka le go le fediša.
9 Ge ke be ke ile thabeng gore ke yo tšea diphaphathi tša maswika, e lego diphaphathi tša kgwerano yeo Jehofa a e dirilego le lena, ke ile ka dula moo thabeng matšatši a 40 le mašego a 40 ke sa je selo e bile ke sa nwe meetse.
10 Ke moka Jehofa o ile a nnea diphaphathi tše pedi tša maswika tšeo di bego di ngwadilwe ka monwana wa gagwe, gomme mo go tšona go be go ngwadilwe mantšu ka moka ao yena Jehofa a le boditšego ona kua thabeng gare ga mollo letšatšing la ge le be le bokane moo.
11 Ge matšatši ao a 40 le mašego a 40 a fela, Jehofa a nnea diphaphathi tše pedi tša maswika, e lego diphaphathi tšeo di bego di ngwadilwe mantšu a kgwerano,
12 gomme Jehofa a re go nna: ‘Emelela, theoga kapelapela mo thabeng, ka gobane setšhaba sa geno seo o se ntšhitšego Egepeta se sentše. Se tlogetše kapelapela go dira dilo tšeo ke se laetšego. Se itiretše modimo wa seswantšho.’
13 Ke moka Jehofa a tšwela pele a re go nna: ‘Ke bone gore setšhaba se ke sa batho ba dihlogo tše thata.
14 E re ke se fediše, gomme ke phumole maina a sona ka tlase ga magodimo, ke moka wena ke go dire setšhaba seo se se fetago ka matla le ka bontšhi.’
15 “Ka gona ka retologa ka theoga moo thabeng ge e dutše e tuka mollo, gomme ke be ke swere diphaphathi tše pedi tša maswika tšeo di bego di ngwadilwe mantšu a kgwerano.
16 Ke moka ka lebelela ka bona gore le diretše Jehofa Modimo wa lena sebe! Le be le itiretše modimo wa seswantšho wa namane. Le tlogetše kapelapela go dira dilo tšeo Jehofa a le laetšego gore le di dire.
17 Ka gona ke ile ka tšea diphaphathi tšeo tše pedi tša maswika ka di lahlela fase, gomme ka di pšhatlaganya pele ga lena.
18 Ke moka ka khunama pele ga Jehofa ka matšatši a 40 le mašego a 40 go swana le nakong e fetilego. Ke be ke sa je selo goba go nwa meetse ka baka la dibe ka moka tšeo le di dirilego ka go dira dilo tše mpe pele ga Jehofa le ka go mo kweša bohloko.
19 Ke be ke tšhogile ka gobane Jehofa o be a le galefetše kudu moo a bego a nyaka le go le fediša. Eupša nakong yeo le yona Jehofa o ile a ntheetša.
20 “Jehofa o be a galefetše Arone kudu mo a bego a nyaka le go mo fediša, eupša ka nako yeo le yena ke ile ka mo rapelela gore Modimo a se ke a mo fediša.
21 Ke ile ka tšea namane yeo le dirilego sebe ka go e dira, ka e fiša mollong, ka e pšhatlaganya, ka e šilaganya go fihlela e swana le lerole. Ke moka ka tšea lerole leo ka le tšhollela ka nokeng e nyenyane yeo e elelago e etšwa thabeng.
22 “Le gona le ile la dira gore Jehofa a galefe kua Thabera, Masa le Kibirothe-hatafa.
23 Ge Jehofa a be a le ntšha Kadeshe-baranea, gomme a re go lena: ‘Sepelang le yo tšea naga yeo ke tlago go le nea yona gore e be ya lena,’ le ile la se kwe taelo ya Jehofa Modimo wa lena gape, la bontšha gore ga le na tumelo go yena ke moka la se mo kwe.
24 Le ile la se kwe Jehofa go tloga letšatšing leo ke le tsebilego ka lona.
25 “Ka gona ke ile ka khunama pele ga Jehofa ka matšatši a 40 le mašego a 40. Ke ile ka khunama ka tsela yeo ka gobane Jehofa a be a boletše gore o tla le fediša.
26 Ke ile ka rapela Jehofa ka go tšwa pelong ka re: ‘Wena Mmuši Morena Jehofa, o se ke wa fediša setšhaba sa gago. Ke setšhaba sa gago seo o se lokolotšego wa se ntšha Egepeta o diriša matla a gago a magolo.
27 Gopola bahlanka ba gago e lego Aborahama, Isaka le Jakobo. Lebalela setšhaba se sebe sa sona, o se lebalele ka ge se na le dihlogo tše thata e bile se dira dilo tše mpe.
28 Ge o ka se dire seo, batho ba naga yeo o re ntšhitšego go yona ba ka re: “Jehofa o paletšwe ke go ba fihliša nageng yeo a bego a ba tshepišitše yona, gomme ka ge a be a ba hloile, o ba ntšhitše mo Egepeta gore a ba bolaele lešokeng.”
29 Ka gobane ke setšhaba sa gago le batho ba gago bao o ba ntšhitšego Egepeta o diriša matla a gago a magolo.’
