Ekisodo 1:1-22
1 Ge Jakobo, yena Isiraele, a be a eya Egepeta, barwa ba gagwe ba ile ba sepela le yena le malapa a bona. Maina a barwa ba Jakobo šea:
2 Rubeni, Simeone, Lefi, Juda,
3 Isakara, Sebulone, Benjamini,
4 Dani, Nafutali, Gada le Ashere.
5 Lapa la Jakobo ka moka le be le na le batho ba 70, eupša Josefa yena o be a šetše a le Egepeta.
6 Mafelelong Josefa o ile a hlokofala, gwa hlokofala le bana babo ka moka, le batho ka moka bao ba phetšego ka nako e tee le yena.*
7 Baisiraele ba ile ba ba le bana ba bantšhintšhi, e bile ba ile ba oketšega ka lebelo le legolo, ya ba setšhaba se matla kudu, gomme ba tlala naga ka moka.
8 Ge nako e dutše e eya, go ile gwa ba le kgoši e mpsha nageng ya Egepeta yeo e bego e sa tsebe Josefa.
9 Ya bolela le setšhaba sa yona ya re: “Bonang! Baisiraele ke ba bantšhintšhi e bile ba re feta ka matla.
10 A re ba logeleng maano, gore ba se ke ba tšwela pele ba oketšega. Ka gore ge ba ka oketšega, ba ka tla ba thekga manaba a rena, ba lwa le rena gomme ba sepela nageng ye.”
11 Ka gona, ba kgetha batho gore ba ba hlokomele ge ba dira mošomo o thata wo ba bego ba ba gapeletša go o dira. Ba ile ba aga metse ya Pithome le Ramasese, yeo Farao a bego a tla bolokela dilo go yona.
12 Eupša ge ba be ba ba gatelela kudu, ke moo ba bego ba oketšega le go feta e bile ba tlala naga ka moka. Baegepeta ba ile ba tšhoga kudu e bile ba tenega ge ba be ba bona Baisiraele ba tlala naga.
13 Ka gona Baegepeta ba ile ba dira Baisiraele makgoba gomme ba ba gapeletša go šoma mošomo o boima.
14 Ba ile ba ba šulafaletša bophelo ka go dira gore ba šome mošomo o thata. Ba ile ba ba gapeletša go duba leraga, go dira ditena le go dira mošomo o mongwe le o mongwe o boima nageng. Ruri ba be ba ba swere gampe, ba ba diriša mešomo ka moka e boima!
15 Ka morago kgoši ya Egepeta ya bolela le basadi ba bangwe ba Baheberu bao ba bego ba belegiša, e lego Shifira le Pua.
16 Ke moka ya ba botša gore: “Ge le belegiša basadi ba Baheberu, le lebeleleng ngwana yo a belegwago. Ge e ba e le mošemane le mmolayeng, eupša ge e ba e le ngwanenyana le mo tlogele a phele.”
17 Eupša basadi bao ba babedi ba be ba hlompha Modimo wa nnete kudu, gomme ga se ba ka ba dira kamoo kgoši ya Egepeta e ba boditšego ka gona. Ka gona ba ile ba tlogela bana ba bašemane gore ba phele.
18 Ge nako e dutše e eya, kgoši ya Egepeta e ile ya bitša basadi bao ba go belegiša. Ya re go bona: “Ke ka baka la’ng le tlogetše bana ba bašemane gore ba phele?”
19 Basadi bao ba re go Farao: “Basadi ba Baheberu ga ba swane le basadi ba Baegepeta. Ka ge e le ba ba thata, ba belega le pele motho wa go belegiša a ka fihla go bona.”
20 Ka gona Modimo a šegofatša basadi bao. Ke moka Baisiraele ya ba ba bantšhintšhi, gomme ya ba setšhaba se matla kudu.
21 Ka ge basadi bao ba go belegiša ba be ba tloga ba hlompha Modimo wa nnete, o ile a ba šegofatša ka gore ba be le malapa a bona.
22 Mafelelong Farao a laela setšhaba sa gagwe ka moka a re: “Le lahleleng ngwana yo mongwe le yo mongwe wa mošemane yo a sa tšwago go belegwa wa Moheberu ka Nokeng ya Nile, eupša bana ba banenyana le ba tlogele ba phele.”
Mengwalo ya tlase
^ Goba “moloko.”
