Ekisodo 10:1-29
10 Ke moka Jehofa a re go Moshe: “Eya go Farao ka gobane ke nna ke mo lesitšego gore a thatafiše hlogo yena le bahlanka ba gagwe, gore a kgone go bona mehlolo yeo ke tlago go e dira mo pele ga gagwe.
2 Le gona, o bolele le bana ba gago le ditlogolo tša gago o ba botše kamoo ke otlilego Baegepeta o šoro le mehlolo yeo ke e dirilego go bona, e bile le tla tseba gore ke nna Jehofa.”
3 Ka gona Moshe le Arone ba ya go Farao gomme ba re go yena: “Jehofa Modimo wa Baheberu o re: ‘O tla gana go nkwa go fihlela neng? Lesa setšhaba sa ka se tloge gore se yo ntlhankela.
4 Ka gobane ge e ba o gana go lesa setšhaba sa ka se sepela, gona gosasa ke tlo tliša ditšie mo nageng ya gago.
5 Di tla tlala naga gomme mobu wa se sa bonala, di tla ja dimela ka moka tšeo di bego di se tša senywa ke sefako, e bile di tla ja mehlare ka moka yeo e golago nageng.
6 Di tla tlala ka dintlong tša gago, dintlong tša bahlanka ba gago ka moka le dintlong tša Baegepeta ka moka. E tla ba tše dintšhi kudu moo e lego gore botatago lena le borakgolokhukhu ba lena ga sa nka ba bona ditšie tše dintšhi ka tsela yeo ga e sa le ba belegwa.’” Ke moka Moshe le Arone ba tloga go Farao.
7 Ka morago ga moo bahlanka ba Farao ba re go yena: “Monna yo o tla re tshwenya go fihlela neng? Lokolla batho ba gore ba yo hlankela Jehofa Modimo wa bona. Na ga o bone gore Egepeta e šetše e senyegile?”
8 Ka gona Farao a bitša Moshe le Arone gomme a re go bona: “Sepelang le yo hlankela Jehofa Modimo wa lena. Eupša mpotšeng mo, ke bomang bao ba sepelago?”
9 Ke moka Moshe a re: “Re tlo sepela le baswa, batho ba bagolo, barwa ba rena, barwedi ba rena, dinku tša rena le dikgomo tša rena, ka gobane re nyaka go yo direla Jehofa monyanya wa go mo tumiša.”
10 Ke moka yena a re go bona: “Ke gore le nagana gore nka le tlogela la sepela le bana ba lena? Ge nka le tlogela gona go ra gore Jehofa o na le lena! Gape ke a le bona gore le loga maanomabe.
11 Nka se le dumelele gore le sepele, ge e ba le nyaka go yo hlankela Jehofa a go ye banna feela.” Ka morago ga moo Farao a ba raka pele ga gagwe.
12 Bjale Jehofa a re go Moshe: “Emišetša lepara la gago nageng ya Egepeta, gore ditšie di ye nageng ya Egepeta di je dimela ka moka tša naga e bile di je le dilo ka moka tšeo di sa kago tša senywa ke sefako.”
13 Ka yona nako yeo, Moshe a emišetša lepara la gagwe nageng ya Egepeta gomme Jehofa a dira gore go tšutle phefo ya ka bohlabela mo nageng mosegare woo ka moka le bošego ka moka. Ge go esa phefo ya bohlabela e be e tlišitše ditšie.
14 Ditšie tšeo tša tlala naga ka moka ya Egepeta gomme tša dula moo. Di ile tša senya kudu. Nageng ya Egepeta go be go sa nka gwa ba le ditšie tše dintšhi ka tsela ye, e bile di ka se tsoge di bile gona gape.
15 Tša tlala naga ka moka gomme naga ya swifala, tša ja dimela ka moka tša naga le dienywa ka moka tša mehlare yeo e bego e se ya senywa ke sefako, gwa se šale le ge e le botalanyana mehlareng goba dimeleng tša naga ka moka ya Egepeta.
16 Kapelapela Farao a bitša Moshe le Arone, a re: “Ke diretše lena le Jehofa Modimo wa lena sebe.
17 Bjale ke kgopela le ntebaleleng sebe sa ka la mafelelo hle, gomme le nkgopeleleng go Jehofa Modimo wa lena gore a tloše ditšie tše mo nageng.”
18 Ka gona Moshe a tloga go Farao gomme a yo mo kgopelela tshwarelo go Jehofa.
19 Ke moka Jehofa a tliša phefo e matla kudu ya ka bodikela, ya tloša ditšie tšeo ya di lahlela ka Lewatleng le Lehwibidu. Gwa se šale le tšie le e tee nageng ka moka ya Egepeta.
20 Eupša Jehofa a no tšwela pele a tlogela Farao a thatafiša hlogo, gomme a se lese Baisiraele gore ba sepele.
21 Ke moka Jehofa a re go Moshe: “Otlollela lepara la gago godimo gore naga ya Egepeta e aparelwe ke leswiswi le legolo kudu.”
22 Ka yona nako yeo Moshe a otlollela lepara la gagwe godimo, gomme nageng ya Egepeta gwa ba le leswiswi le legolo kudu ka matšatši a mararo.
23 Baegepeta ba se kgone go bonana, gomme ga go le o tee wa bona yo a ilego a kgona go tloga moo a bego a le gona ka matšatši a mararo, eupša go be go na le seetša moo Baisiraele ka moka ba bego ba dula gona.
24 Ka morago ga moo Farao a bitša Moshe, a re: “Sepelang le yo hlankela Jehofa. Le ka sepela le bana ba lena, go tla šala feela dinku tša lena le dikgomo tša lena.”
25 Eupša Moshe a re: “Re fe le diruiwa tša rena gore re tle re neele Jehofa Modimo wa rena dihlabelo.
26 Ka gona re tlo tloga le diruiwa tša rena. Ga go le setee sa diruiwa tše se se tlago go šala mo, ka gobane re tlo šomiša tše dingwe tša tšona go hlankela Jehofa Modimo wa rena, le gona ge re fihla moo ke gona re tlago go tseba gabotse gore re swanetše go direla Jehofa dihlabelo ka diphoofolo dife.”
27 Ke moka Jehofa a tlogela Farao a thatafiša hlogo ya gagwe, gomme a se ba dumelele ba sepela.
28 Ka gona Farao a re go Moshe: “Tloga mo go nna! O se ke wa leka wa tla mo go nna gape, ka gobane ge o ka boa gape mo go nna o tlo hwa.”
29 Ke moka Moshe a re go yena: “Go lokile. Ke tla dira ka mokgwa wo o boletšego ka gona, nka se tsoge ke boile mo go wena gape.”
