Ekisodo 11:1-10
11 Jehofa a re go Moshe: “Ke tlo otla Farao le Baegepeta ka kotlo ya mafelelo. Ka morago ga moo o tla le lesa la sepela. O tlo le lokolla ka go le raka.
2 Bjale botša batho gore banna le basadi ka moka ba kgopele baagišane ba bona gore ba ba fe dilo tša silifera le tša gauta.”
3 Ka gona Jehofa a dira gore Baegepeta ba bontšhe Baisiraele botho. Moshe o be a tumile kudu nageng ya Egepeta, go bahlanka ba Farao le go setšhaba.
4 Moshe a re go Farao: “Jehofa o re: ‘Mo e ka bago gare ga bošego, ke tlo feta nageng ya Egepeta,
5 gomme ngwana yo mongwe le yo mongwe wa mathomo nageng ya Egepeta o tlo hwa, go thoma ka ngwana wa mathomo wa Farao yo a bušago, go fihla ka ngwana wa mathomo wa mohlanka wa mosadi wa maemo a tlasana. E bile go tlo hwa le leitšibulo le lengwe le le lengwe la phoofolo.
6 Go tlo ba le sello se segolo kudu nageng ka moka ya Egepeta, e lego sello seo se sa kago sa ba gona, e bile se ka se tsoge se bile gona gape.
7 E bile ga go na mpša yeo e tlago go goba Baisiraele goba diphoofolo tša bona, e le gore le tle le tsebe gore Jehofa ga a sware Baisiraele go swana le Baegepeta.’
8 Le gona bahlanka ba gago ka moka ba tla tla go nna ba nkhunamela ba re: ‘Wena le batho ka moka bao ba go latelago, sepelang!’ Ka morago ga moo, ke tla sepela.” Ke moka Moshe a tloga pele ga Farao a galefile kudu.
9 Ke moka Jehofa a re go Moshe: “Farao a ka se le theetše, e le gore batho ba tle ba bone mehlolo ya ka e mengwe mo nageng ya Egepeta.”
10 Moshe le Arone ba be ba šetše ba dirile mehlolo ka moka pele ga Farao, eupša Jehofa a lesa Farao a thatafiša hlogo, gomme a se tlogele Baisiraele ba sepela nageng ya gagwe.
